EKADIMWELO WA AMBOLA W’OMA LO BIBLE
Lande na kele ekɔ dui dia wolo di’andja ɔnɛ monga lo wɔladi?
Paka lowandji lakoka ntshikitanya etema w’anto mbayela wɔladi la nkɛtɛ
Bible mbishaka ɛkɔkɔ ehende wa weke. Ɔkɔkɔ wa ntondo ele, anto wekɔ lo ndjasha l’awui wa kɔlɔ, ndo vɔ kootongama la dikoka dia ndjaalɔmbɔla. Ɔkɔkɔ wa hende ele, anto hawokotsha eyango awɔ nɛ dia “andja w’otondo wekɔ lo nɔmbɔma oma le Kanga kɔlɔ,” Satana Diabolo. Diakɔ diele welo wadja anto dia mbidja wɔladi l’andja ɔnɛ wambɔtɔ l’ashi.—Adia Jeremiya 10:23; 1 Joani 5:19.
Woho wele anto l’eyango wa lokaki ekɔ dui dikina diambokonya diaha andja ɔnɛ monga lo wɔladi. Paka lowandji lakeketsha ambolami alɔ dia nanga losembwe ndo kokanɛ lam’asawɔ mbakoka mbela wɔladi l’andja ɔnɛ.—Adia Isaya 32:17; 48:18, 22.
Onto akɔna layodja wɔladi la nkɛtɛ?
Nzambi Kaanga-Wolo-Tshɛ akalake dia nde ayoshikikɛ Diolelo diayonga paka la Nkumekanga ɔtɔi kayɔlɔmbɔlaka nkɛtɛ k’otondo. Diɔ diayɔhɛna waolelo tshɛ w’ana w’anto. (Danyele 2:44) Yeso, Ɔna Nzambi, ayonga Owandji wa ki. Nde ayonya awui tshɛ wa kɔlɔ oma la nkɛtɛ ndo ayetsha anto dia vɔ nsɛna lo wɔladi.—Adia Isaya 9:6, 7; 11:4, 9.
Miliyɔ y’anto wa l’andja w’otondo wele l’ɛse k’ɛlɔmbwɛlɔ kaki Yeso wekɔ lo nkamba l’Ɔtɛkɛta wa Nzambi, Bible dia mbetsha anto woho wa nsɛna l’anto akina lo wɔladi. Kema edja, wɔladi wayanga monga l’andja w’otondo.—Adia Isaya 2:3, 4; 54:13.