Onde Olimu Ayɛ W’esambishelo Wekɔ Oko Loonge?
OLIMU aso w’esambishelo wekɔ ohomba ndo la nɛmɔ. Koko aha onto tshɛ lasambishaso mbashihodia dui sɔ. Kaanga mbele anto ndjashaka lo kɛnɛ kata Bible, aha mbala tshɛ mbatowɛnaka dia ekɔ ohomba mbeka Ɔtɛkɛta wa Nzambi kaamɛ la so.
Tɔshi ɛnyɛlɔ kaki Gavin. Nde akatshɔka lo nsanganya lo Mbalasa ka Diolelo, koko nde konangaka mbeka Bible. Gavin mbutaka dia nde akeyaka akambo wa lo Bible yema tshitshɛ koko nde konangaka di’anto akina mbeya dikambo sɔ. Nde akokaka wɔma dia wayowɔlɔmba dia mbɔtɔ lo ɔtɛmwɛlɔ ɔmɔtshi ndo nde konangaka nkesama. Ngande wɛnayɛ? Onde Gavin akakoke kimanyiyama? Kana yimba lo shɛngiya y’ɔlɔlɔ yakoka wetshelo w’oma lo Bible monga la yɔ le onto ɔmɔtshi. Jehowa akatɛ ase Isariyɛlɛ ate: ‘Ɛtɛkɛta ami wayɔlɔ oko loonge, oko vulavula laadiko dia adiyo.’ (Euhwelu k’Elembe 31:19, 30; 32:2) Nyɛsɔ tɔsɛdingole akambo amɔtshi wendana la loonge ndo tɛdike olimu aso w’esambishelo la lɔ dia sho monga l’akoka wa nkimanyiya “weho w’anto tshɛ” dimɛna dimɛna.—1 Timɔte 2:3, 4.
NGANDE WAKOKA OLIMU ASO W’ESAMBISHELO MONGA OKO LOONGE?
Loonge lekɔ dimɛna. Loonge l’ekama lele lo loowa ndɛlɔka yema yema otsha lo apɔpɔ wa totshitshɛ w’ashi. Ngande wele ‘wakalɔka ɛtɛkɛta wa Jehowa oko loonge’? Nde akatɛkɛta la wodja ande la ngandji, lo yoho ya dimɛna ndo yɛnya dia nde ndjakiyanyaka dikambo diawɔ. Sho mbookoyaka etena kɛnyaso dilɛmiɛlɔ diaso lo dietawɔ di’anto akina. Sho mbakeketshaka dia vɔamɛ nkana yimba ndo mbɔsa tɛdikɔ tawɔ hita. Naka sho ndjasha le anto lo yoho ya ngasɔ, kete vɔ wayetawɔ la lolango tshɛ kɛnɛ kawatɛso ndo olimu aso w’esambishelo ayonyomoleka monga l’etombelo w’ɛlɔlɔ.
Loonge keketshaka. Olimu aso w’esambishelo wayokeketsha anto akina naka sho nkana yimba lo toho totshikitanyi ta mbakimanyiya dia vɔ mbeka awui efula wendana l’akambo wa mɛtɛ. Ɔnangɛso Chris, lakeke la Gavin Bible mbala ka ntondo, kombotshutshuya dia nde mbetawɔ wekelo akɔ. Koko, nde akahembe dia ntana toho tokina totshikitanyi dia Gavin ndeka ndjaoka dimɛna etena kekawɔ Bible. Chris akatɛ Gavin dia nde ekɔ la losango lɔmɔtshi l’ohomba latɛkɛtama lo Bible ndo ɔnɛ naka nde mbeka akambo wendana la losango lakɔ, kete dui sɔ diayowokimanyiya dia nshihodia nsanganya dimɛna. Oma laasɔ, Chris akalembetshiya Gavin dia prɔfɛsiya ya lo Bible mbakawetawoya ndamɛ ɔnɛ Bible kekɔ mɛtɛ. Etombelo waki la dui sɔ ele, wakayɔkɛtshanyaka efula lo kɛnɛ kendana la woho wakakotshama prɔfɛsiya efula. Asawo asɔ wakakeketsha Gavin, ndo l’ekomelo nde akayetawɔka mbeka Bible.
Loonge lekɔ ohomba efula lo lɔsɛnɔ. L’eleko k’ɔwɔ l’Isariyɛlɛ, mvula kokokaka ndɔ ngɔndɔ efula. Aha la apɔpɔ w’ashi wakatondjaka loonge, etamba wakomaka ndo wakavɔka. Jehowa akatatshi dia lo nshi yaso nyɛ, ayonga oko nshi y’ɔwɔ mbuta ate, anto wayonga la mposa ka ‘mboka ɛtɛkɛta wa Jehowa.’ (Amose 8:11) Nde akate dia akitami wayonga ‘oko loonge l’oma le Jehowa’ etena kasambishawɔ lokumu l’ɔlɔlɔ la Diolelo, ndo kakimanyiyamawɔ oma le “ɛkɔkɔ ekina.” (Mika 5:7; Joani 10:16) Losango lasambishaso lekɔ l’atei wa yɛdikɔ yakɔshi Jehowa dia mbisha wanɛ wele la mposa k’akambo wa mɛtɛ lɔsɛnɔ. Onde wɛ mbɔsaka losango lakɔ la nɛmɔ?
Loonge lekɔ ɔtshɔkɔ ɔmɔtshi w’oma le Jehowa. (Euhwelu k’Elembe 33:13) Olimu aso w’esambishelo koka monga ɔtshɔkɔ ɔmɔtshi, kana woshasha ɔmɔtshi le wanɛ walietawɔ. Wekelo wa Bible waki ɔtshɔkɔ le Gavin nɛ dia vɔ wakokimanyiya dia nde nkondja okadimwelo lo ambola ande tshɛ. Nde akasale ehamelo esadi esadi, akabatizama ndo ɛlɔ kɛnɛ nde ekɔ lo ngɛnangɛna nsambisha lokumu l’ɔlɔlɔ la Diolelo kaamɛ la wadɛnde Joyce.
ƆSA OLIMU AYƐ W’ESAMBISHELO LA NƐMƆ
Mbɛdika olimu aso w’esambishelo la loonge koka tokimanyiya nto dia nshihodia ɔnɛ welo wadja ɔmɔmɔ a l’atei aso l’olimu w’esambishelo wekɔ la nɛmɔ. Lande na kataso ngasɔ? Dipɔpɔ di’ashi ɔtɔi kimanyiyaka yema tshitshɛ koko etena kongawɔ miliyɔ y’apɔpɔ w’ashi, nkɛtɛ ndolaka l’ashi wa tshitshi. Woho akɔ waamɛ mbele, kɛnɛ kasalaso shoamɛ l’esambishelo mbeyaka mɛnama yema tshitshɛ le so. Koko, diɛsɛ la welo wadja miliyɔ y’ekambi wa Jehowa, esambishelo kekɔ lo sambishama “lo wedja tshɛ.” (Mateo 24:14) Onde olimu aso w’esambishelo wayonga ɔtshɔkɔ ɔmɔtshi w’oma le Jehowa le anto akina? Eelo, losango laso layonga oko loonge mbuta ate, ɔlɔlɔ, dimɛna ndo ohomba dia lɔsɛnɔ!