“Kanga lokaho ayɔtshɔkwama”

WESHASHA wokongaka etenyi kɛmɔtshi k’ohomba k’ɔtɛmwɛlɔ wa mɛtɛ. Ase Isariyɛlɛ wakakimɔka weshasha wa nyama ndo Akristo wokeyamaka tena tshɛ dimɛna l’ɔtɛ wakimɔwɔ “olambo wa lotombo.” Lo mɛtɛ, ekɔ weshasha ekina wangɛnyangɛnya Nzambi. (Hɛb. 13:15, 16) Weshasha ɛsɔ mbelaka ɔngɛnɔngɛnɔ ndo ɛtshɔkɔ oko wɛnya bɛnyɛlɔ diayela nɛ.

Hana, okambi wa kɔlamelo wa lo nshi y’edjedja aki la nsaki k’efula ka mbota ɔna, koko nde komonga l’akoka wa mbota. Lo dɔmbɛlɔ, nde akalake Jehowa ɔnɛ naka lambota ɔna, kete “layowokimɔ le yɛ wɛ Jehowa nshi tshɛ ya lɔsɛnɔ lande.” (1 Sa. 1:10, 11) L’ɔkɔngɔ diko, Hana akatshu diemi ndo akote ɔna pami ko akawɔlɛ Samuɛlɛ. L’ɔkɔngɔ wa Samuɛlɛ nkila awɛlɛ, Hana akawɔtɔlɛ lo tabɛrnaklɛ paka oko wakandatshike dɔkɔlɔkɔ. Jehowa akatshɔkɔla Hana l’ɔtɛ wa yimba yande ya ndjahondja. Nde aki la diɛsɛ dia ndjota ana akina atanu ndo Samuɛlɛ akayala omvutshi ndo ofundji wa Bible.—1 Sa. 2:21.

L’ɛnyɛlɔ ka Hana la Samuɛlɛ, ɛlɔ kɛnɛ Akristo wekɔ la diɛsɛ dia nkamba la nsɛnɔ yawɔ lo ndjasha la kɔlamelo tshɛ l’olimu w’Otungi awɔ. Yeso nde la wɔ akalake dia tayofutama efula l’ɔtɛ wa kɛnɛ tshɛ kayahondjaso dia ntɛmɔla Jehowa.—Makɔ 10:28-30.

Lo ntambe ka ntondo, Okristo wa womoto wakawelɛka Dɔrkasɛ akeyamaka dimɛna nɛ dia nde “akasalaka akambo w’ɛlɔlɔ efula ndo akashaka anto weshasha efula wa kɛtshi,” mbuta ate nde akakimɔka weshasha dia nkimanyiya anto akina. Lonyangu ko, “nde akandama la hemɔ ko akavu,” dui diakasha ase etshumanelo ɔkɛyi w’efula. Etena kakoke ambeki dia Petero aki l’ɛtshi ka nkɛtɛ kakɔ, vɔ wakɔlɔmbɛ dia ntshɔ esadi eto. Ohokanyiya ɔngɛnɔngɛnɔ waki la wɔ etena kakakome Petero ndo kakandolola Dɔrkasɛ, ɔsɔ mbaki mbala ka ntondo kakolola ɔpɔstɔlɔ ɔmɔtshi onto! (Ets. 9:36-41) Nzambi kombohɛ weshasha wa Dɔrkasɛ. (Hɛb. 6:10) Ɔkɔndɔ ande wendana la lokaho wakafundama l’Ɔtɛkɛta wa Nzambi oko ɛnyɛlɔ ka dimɛna ka sho ndjela.

Ɔpɔstɔlɔ Pɔɔlɔ nde la wɔ akatshike ɛnyɛlɔ ka dimɛna efula k’onto laki la lokaho ndo lakadjanaka yimba lo nshi yande. Pɔɔlɔ akafundɛ anango wa la Kɔrɛtɔ ate: “Dimi lo wedi ami, layokimɔ kɛnɛ kele la mi l’ɔngɛnɔngɛnɔ woleki tshɛ ndo layoyakimɔ tshɛ dikambo dianyu.” (2 Kɔr. 12:15) Pɔɔlɔ akeye oma lo kɛnɛ kakokomɛ ɔnɛ ndjahondja lo wahɔ w’anto akina mbishaka onto aha tsho ɔngɛnɔngɛnɔ, koko kɛnɛ koleki tshɛ ele, nde kondjaka ɛtshɔkɔ oma le Jehowa ndo mbetawɔmaka le nde.—Ets. 20:24, 35.

Mbokɛmaka hwe dia, Jehowa ngɛnangɛnaka etena kakambaso la wenya ndo wolo aso dia ntɔla wahɔ wa Diolelo otsha la ntondo ndo nkimanyiya asekaso ambetawudi. Ko onde ekɔ toho tokina takokaso nsukɛ olimu w’esambishelo ka Diolelo? Eelo! Laadiko dia nkamba la wenya ndo welo aso, sho koka ntombola Nzambi lo kimɔka weshasha wa la lolango. Weshasha akɔ kimanyiyaka lo olimu w’esambishelo wa l’andja w’otondo, sukɛka waa misiɔnɛrɛ ndo ekambi ekina wa laande wa lo tena tshɛ. Laadiko dia laasɔ, ɔlɔngɔswɛlɔ, okadimwelo w’ekanda walembetshiya Bible ndo tovidɛo, nkimanyiya wanɛ wambohomɔ mpokoso ndo wokelo wa Mbalasa ya Diolelo y’eyoyo tshɛ sukamɛka oma lo weshasha aso wa la lolango. Tonge l’eshikikelo ɔnɛ “kanga lokaho ayɔtshɔkwama.” Koko, etena kakimɔso diangɔ diaso dia nɛmɔ lo dikambo dia Jehowa, sho mbotombolaka.—Tok. 3:9; 22:9.

Woho wasukɛ anto amɔtshi olimu w’esambishelo wa l’andja w’otondo

Oko wakidiɔ lo nshi y’ɔpɔstɔlɔ Pɔɔlɔ, anto efula ɛlɔ kɛnɛ ‘mombaka yangɔ mɔtshi’ kana yema ya dikuta ndo ndjidjaka lo tɔshɛtɛshɛtɛ ta l’etshumanelo tofundami laadiko ɔnɛ: “Olimu wa l’andja w’otondo.” (1 Kɔr. 16:2) Ngɔndɔ tshɛ, tshumanelo tomɛka Bɛtɛlɛ k’Ɛmɛnyi wa Jehowa ka lo wodja awɔ weshasha ɛsɔ. Ndo wɛ la wɔ koka ntoma weshasha lo lokombo leyama Ɛmɛnyi wa Jehowa wa lo wodja anyu. Dia mbeya lokombo la tshunda dia ntondo di’Ɛmɛnyi wa Jehowa dieyama le lɛɛta lo wodja anyu, wɛ koka fundɛ kɔmite ka filialɛ ka lo wodja anyu. Wɛ koka ntana adrɛsɛ wa filialɛ ka lo wodja anyu lo sitɛ kaso k’Ɛtɛrnɛtɛ ka www.jw.org. Lo ndjela awui wa lo dihole dienyu, weho wa weshasha wakokayɛ tomɛ Bɛtɛlɛ mbala kakɔ ɔtɔi vɔ ɛnɛ:

WESHASHA WA LA LOLANGO

Onto koka ntoma l’Ɛtɛrnɛtɛ weshasha wa falanga yele la nde lo bankɛ kana dibasa diande diokolami anto. Lo filialɛ mɔtshi, vɔ koka nkamba la jw.org kana sitɛ kekina.
Weshasha wa falanga. Funda mukanda dia mɛnya ɔnɛ falanga yamboyokimɔ yekɔ woshasha.

WEHO EKINA WAKIMƆ ANTO WESHASHA

Laadiko dia falanga, ekɔ diangɔ dikina diakokaso nkimɔ dia ntɔla olimu wa Diolelo wa l’andja w’otondo otsha la ntondo. Diɔ mɛnyama lanɛ l’ɛse. Oyadi ɛngɔ kakɔna kalangayɛ nkimɔ, lam’alangɛ elɛ kana fundɛ Bɛtɛlɛ ka lo wodja anyu dia wɛ mbeya woho wakokayɛ nkimɔ ɛngɔ kakɔ. Lam’ele ɛlɛmbɛ wa lɛɛta ntshikitana lo wodja la wodja, ekɔ ohomba tambodi kanyi y’owandji wa lɛɛta wendana l’ofutshanyelo w’elambo la ntondo ka wɛ nsɔna yoho yoleki dimɛna ya tomɛ Bɛtɛlɛ woshasha ayɛ.
Asiransɛ wa lɔsɛnɔ: Woshasha wakimɔma lo lokombo la tshunda dimɔtshi dieyama le lɛɛta di’Ɛmɛnyi wa Jehowa l’oyango wa diɔ ndjokamba l’asiransɛ wa lɔsɛnɔ kana la falanga ya pasiɔ y’onto layikimɔ.

Kɔntɛ ya lo bankɛ: Onto mbeyaka mbuta dia l’ɔkɔngɔ wa nyɔi kande ko vɔ mbisha okongamelo waki Jehowa falanga yande yele lo bankɛ lo ndjela kɛnɛ kalɔmba bankɛ ka lo dihole diende.

Diangɔ diakatoombe kana falanga yokolami lɛɛta: Onto mbeyaka mbisha okongamelo waki Jehowa lotshungɔ la nkamba la diangɔ diakandombe kana falanga yande yokolami lɛɛta.

Lokombo kana luudu: Onto koka mbisha okongamelo waki Jehowa lokombo kana luudu lande ndo naka lɔkɔ mbodjashinde, kete nde mbeyaka mbuta dia vɔ ndjoliɔsa l’ɔkɔngɔ wa nyɔi kande ndo tosinya mikanda laka lɛɛta dia lolango lande nɛmiyama.

Tɛstama la mukanda wa mbɛkɛ otema: Onto koka mbɔsa yɛdikɔ ya nkimɔ lokombo lande oko woshasha l’ɔkɔngɔ wa nyɔi kande. Nde koka nsala dikambo sɔ lo tshimbo ya tɛstama kana mfunda mukanda ɔmɔtshi wa mbɛkɛ otema washa dikimɔ, lo mfunda lokombo l’ɔlɔngɔswamelo ɔmɔtshi weyama laka lɛɛta wakamba l’Ɛmɛnyi wa Jehowa dia vɔ ndjowɔsa. Mukanda akɔ mbishaka diaaso di’oshinga wa taksɛ mɔtshi nkitakita.

Oko wakataditshi lo kɛnɛ kendana la “weho ekina wakimɔ anto weshasha,” weshasha wa ngasɔ nɔmbaka dia ɔnɛ lakimɔ nkongɛ awui amɔtshi. Lo nkamba la toho tokina ta nkimɔ weshasha tɔsɔ, anto efula wakakimanyiya dia nsukɛ ɔtɛmwɛlɔ aso ndo elimu wa nkimanyiya anto wa l’andja w’otondo ndo vɔ kondjaka wahɔ efula oma l’okitshekitshelo w’oshinga wa taksɛ.

Dia mbeya akambo efula, ɔtɔ lam’ofundjiwɔ ɔnɛ: “Nkimɔ woshasha dikambo dia olimu wa l’andja w’otondo” l’ɛse ka lɛkɛ latomba ntondo lo jw.org, kana mbola Bɛtɛlɛ k’Ɛmɛnyi wa Jehowa ka lo wodja anyu.