Ɛnya lowando lo lokaho la Jehowa

JEHOWA ekɔ Nzambi ka lokaho. (Jakɔba 1:17) Sho koka mɛna lokaho lande l’oseka ema tshɛ kakandatonge. Nde akalodia loowa la tɔɔtɔ ndo akakombe nkɛtɛ l’etamba w’amɛna.—Esambu 65:12, 13; 147:7, 8; 148:3, 4.

Ofundji w’Osambu 104 akɛnya lowando lo kɛnɛ tshɛ kakatonge Jehowa, diakɔ diakandafunde osambo ɔmɔtshi dia mbotombola. Etena kadiayɛ osambo akɔ onde wɛ mɛnyaka lowando layɛ oko wakɛnya omembi w’esambo? Nde akate ate: ‘Dimi layembɛka Jehowa lɔsɛnɔ lami l’otondo; Dimi layembɛka Nzambi kami esambo wa lotombo edja tshɛ kemi la lɔsɛnɔ.’ (Osambu 104:33) Onde wɛ kombolaka nsala woho akɔ waamɛ?

ƐNYƐLƆ KOLEKI WOKE TSHƐ KA LOKAHO

Jehowa nangaka sho mbokoya lokaho lande. Nde toshaka ɛkɔkɔ w’eshika wa monga la lokaho. L’ekimanyielo ka nyuma kande ɔpɔstɔlɔ Pɔɔlɔ akafunde ate: “Ote wanɛ wele ɛngɔnyi l’etena kɛnɛ diaha vɔ monga etako ndo diaha vɔ nkitsha elongamelo kawɔ lo efumbɔfumbɔ k’ɔngɔnyi, koko le Nzambi latosha diangɔ tshɛ diangɛnangɛnaso la diɔ la lokaho tshɛ. Owate dia vɔ nsala kɛnɛ kele ɔlɔlɔ, monga ɛngɔnyi lo etsha w’ɛlɔlɔ, dia vɔ monga la lokaho ndo monga suke dia nkahana l’anto akina. Lo nsala ngasɔ, vɔ wayoyaombɛ ehikamelo k’ɔlɔlɔ ka lo nshi yayaye lo dihole dia dimɛna dia vɔ nkukutɛ lɔsɛnɔ l’oshika.”—1 Timɔte 6:17-19.

Lo mukanda ande wa hende otsha le ase Kɔrɛtɔ, Pɔɔlɔ akalembetshiya dui diakoka totshutshuya etena kakahɛso anto akina. Nde akate ate: “Onto l’onto akimɔ oko wakandashikikɛ l’otema ande, aha la lonyangu kana lotshutshuya, nɛ dia Nzambi nangaka onto lakimɔ l’ɔngɛnɔngɛnɔ.” (2 Kɔrɛtɔ 9:7) Onto akɔna akimanyiyaso etena keso la lokaho? Pɔɔlɔ akate dia sho kimanyiyaka anto akina lo mbasha kɛnɛ kewɔ la tɔ ohomba, koko sho ndjakimanyiyaka nto shɔamɛ nɛ dia Jehowa ayotɔtshɔkɔla.—2 Kɔrɛtɔ 9:11-14.

Pɔɔlɔ akɛdika djembetelo ya woshasha woleki woke tshɛ ya lokaho laki Nzambi etena kakandate ate: “Losaka le Nzambi l’ɔtɛ wa woshasha ande waheyama mbuta.” (2 Kɔrɛtɔ 9:15) ‘Woshasha w’ofele’ waki Jehowa nembetshiyaka diangɔ tshɛ di’amɛna diatoshande oma lo tshimbo ya Yeso Kristo. Ɛtɛkɛta pombamaka dia nembetshiya woke woke wa nɛmɔ dia woshasha ɔsɔ.

Ngande wakokaso mɛnya ɔnɛ tekɔ la lowando lo kɛnɛ tshɛ katosalɛ Jehowa nde la Yeso ndo kɛnɛ kayowotosalɛ? Yoho mɔtshi yakokaso mɛnya lokaho laso ele woho wakambaso la wenya aso, wolo aso, ndo diangɔ diaso dia l’emunyi dikambo dia ntɛmɔla Jehowa ndo nkimanyiya anto akina dia vɔ mbeka akambo wendana la nde. Sho koka nsala dui sɔ oyadi t’ekɔ l’efula kana yema tshitshɛ.—1 Ekondo 22:14; 29:3-5; Luka 21:1-4.

Woho Wa Nsukɛ Anto Amɔtshi Olimu Wa L’andja W’otondo

Oko Akristo wakasɛnɛ lo ntambe ka ntondo, ɛlɔ kɛnɛ anto efula mombaka falanga dikambo di’olimu wa l’andja w’otondo ndo mbidjaka lo shɛtɛshɛtɛ ya l’etshumanelo kawɔ. (1 Kɔrɛtɔ 16:2) Ngɔndɔ tshɛ, tshumanelo tomɛka Bɛtɛlɛ k’Ɛmɛnyi wa Jehowa kenda wodja awɔ weshasha ɛsɔ. Ndo wɛ lawɔ koka ntoma weshasha mbala kakɔ ɔtɔi le ɔlɔngɔswamelo ɔmɔtshi weyama laka Lɛɛta wakamba l’Ɛmɛnyi wa Jehowa wa lo wodja anyu. Dia mbeya lokombo la ɔlɔngɔswamelo akɔ, lam’alangayɛ ɔtɔ lo www.jw.org ndo fundɛ biro k’Ɛmɛnyi wa Jehowa ka lo wodja anyu. Wɛ koka ntoma weshasha wayela ɛnɛ:

WESHASHA

Weshasha watomama lo bankɛ lo tshimbo y’Ɛtɛrnɛtɛ, ya kartɛ ya ntondja kana ya mbidja falanga. Lo wedja ɛmɔtshi wɛ kokaka nto mbisha woshasha ayɛ lo tshimbo ya jw.org kana lo tshimbo ya sitɛ kekina.
Weshasha wa falanga, dɛngalɛnga, kana diangɔ dikina dia nɛmɔ diele l’onto. Funda mukanda dia mɛnya lofulo la falanga kana ɛngɔ kokimweyɛ kekɔ woshasha waha la wekamu.

WESHASHA WELE ƆNƐ LAKIMƆ PIKAKA AWUI AMƆTSHI

Weshasha wa falanga yakoka kaloyama naka wɛ aya layɔ ohomba.
Funda mukanda walembetshiya dia woshasha wakimɔyɛ wekɔ l’awui amɔtshi wahikayɛ.

WEHO EKINA WAKOKAYƐ NKIMƆ WESHASHA

Weho ekina wakokayɛ nkimɔ weshasha dia nsukɛ olimu w’esambishelo wa l’andja w’otondo mɛnyama l’ɛse. La ntondo ka nkimɔ woshasha, ewoya lam’alangayɛ Biro wa filialɛ kalɔmbɔla wodja anyu dia wɛ mbeya kana woshasha walangayɛ nkimɔ mbetawɔmaka lɛnɛ adjasɛyɛ. Lam’ele ɛlɛmbɛ la wa taksɛ keema woho ɔtɔyi l’ahole tshɛ, mbola onto leya awui wendana l’ɛlɛmbɛ la ntondo ka wɛ nkimɔ woshasha ayɛ ɔmɔtshi.

Asiransɛ wa lɔsɛnɔ: Naka onto ekɔ la asiransɛ wa lɔsɛnɔ weyama hwe laka Lɛɛta woho wakandokana la kɔpanyi k’asiransɛ kana ekɔ la kartɛ ka pasiɔ, nde kokaka mbisha woshasha ande lo nshila lokombo la ɔlɔngɔswamelo ɔmɔtshi weyama laka Lɛɛta wakamba l’Ɛmɛnyi wa Jehowa lawɔ dia vɔ ndjɔsa woshasha akɔ.

Kɔntɛ ya lo bankɛ: Lo ndjela ɛlɛmbɛ wa bankɛ ya lo dihole diele onto, nde kokaka ndjihola kɔntɛ lo bankɛ, sɛrtifika ka wombelo w’ema, kana dikatshi dia kɔntɛ ka pasiɔ oko djembetelo ya mbɛkɛ otema. Nde kokaka nto nshikikɛ dia ɔlɔngaswamelo ɔmɔtshi weyama laka Lɛɛta wakamba l’Ɛmɛnyi wa Jehowa ndjolongola falanga oma l’ɔkɔngɔ wa nyɔi kande.

Falanga yatendjendjɛwɔ kana y’osanga: Onto koka nkimɔ falanga yande yawendjendjɛwɔ kana y’osanga oko woshasha le ɔlɔngɔswamelo ɔmɔtshi weyama laka Lɛɛta wakamba l’Ɛmɛnyi wa Jehowa. Nde kokaka nto mfunda mukanda washa dikimɔ dia falanga yande ndjɔsama oma lo kɔntɛ kande otsha kɔntɛ kekina oma l’ɔkɔngɔ wa nyɔi kande.

Lokombo kana luudu: Naka onto ekɔ la lokombo kana luudu lakoka sondjama, nde koka lisha ɔlɔngɔswamelo ɔmɔtshi weyama laka Lɛɛta wakamba l’Ɛmɛnyi wa Jehowa. Naka nde mbidjasɛka laawɔ, nde koka mbɔsa tɛdikɔ ta ntetemala mbidjasɛ laawɔ polo lushi la nyɔi kande.

Woshasha w’oma lo waahɔ wa l’ɔnɔnyi: Onto koka nkimɔ falanga kana falanga yawombɛwɔ laka lɛɛta (I.N.S.S.) le ɔlɔngɔswamelo ɔmɔtshi weyama laka Lɛɛta wakamba l’Ɛmɛnyi wa Jehowa ndo mbɔsa yɛdikɔ ya nongolaka yema ya falanga mɔtshi ɔnɔnyi tshɛ, lo nshi tshɛ yekende la lɔsɛnɔ. Vɔ mbeyaka mbokitshɛkitshɛ taksɛ yafutawɔ lo ndjela waahɔ wakakondja onto l’ɔnɔnyi w’otondo l’ɔtɛ wa woshasha w’oma lo waahɔ wa l’ɔnɔnyi wakandakimɔ.

Tɛstama la mukanda wa mbɛkɛ otema: Onto koka mbɔsa yɛdikɔ ya nkimɔ lokombo lande oko woshasha oma l’ɔkɔngɔ wa nyɔi kande. Nde koka nsala dikambo sɔ oma lo tshimbo ya tɛstama kana mfunda mukanda ɔmɔtshi wa mbɛkɛ otema washa dikimɔ, lo mfunda lokombo l’ɔlɔngɔswamelo ɔmɔtshi weyama laka Lɛɛta wa nkamba l’Ɛmɛnyi wa Jehowa dia vɔ ndjowɔsa. Mukanda akɔ mbishaka diaaso di’oshinga wa taksɛ mɔtshi nkitakita.

Wɛ kokaka ntana awui efula wendana la woho wa nkimɔ woshasha l’olimu wa l’andja w’otondo w’Ɛmɛnyi wa Jehowa lo biukubiuku Charitable Planning to Benefit Kingdom Service Worldwide, yakafundama paka l’Angɛlɛ la lo Espagnole. Biukubiuku yakɔ yekɔ lo mɛnya toho efula totshikitanyi takoka onto nkimɔ woshasha ɔmɔtshi. Akambo wofundami lo biukubiuku shɔ mbeyaka ndjala ko hawosalema tshɛ lo tshɛ lo kɛnɛ kendana la yɛ l’ɔtɛ wa ɛlɛmbɛ wendana la taksɛ kana ɛlɛmbɛ wendana la wodja anyu. Ɔnkɔnɛ, l’ɔkɔngɔ wa mbadia biukubiuku shɔ, wɛ koka kɛtshanya l’Avocat kana la kɔnsɛye kanyu kendana l’akambo wa taksɛ. Anto efula wakimanyiya dia sukɛ olimu aso wa l’andja w’otondo kondjaka ekitshekitshelo k’oshinga wa taksɛ yendana la waahɔ wa l’ɔnɔnyi oma lo nkimɔ woshasha ɔmɔtshi l’atei wa weshasha woshilami engo. Naka biukubiuku shɔ yekɔ lo wodja anyu, wɛ mbeyaka nɔmba sekeletɛlɛ ka l’etshumanelo kanyu.

Dia mbeya akambo efula, wɛ mbeyaka mimbola Biro k’Ɛmɛnyi wa Jehowa ka lo wodja anyu.