Ekondjelo kawɔ k’efula kakakombe kɛnɛ kakahombaka asekawɔ

L’ƆNƆNYI wa 49 T.D., Petero, Jakɔba la Joani “wanɛ wakɔsamaka oko dikundji dia l’etshumanelo” wakasha ɔpɔstɔlɔ Pɔɔlɔ nde la Barnabasɛ ɔkɛndɛ waha vɔ mbohɛ Akristo waki komonga la ekondjelo etena kakawatasambishaka ase Wedja. (Ngal. 2:9, 10) Ngande wakawakotsha ɔkɛndɛ ɔsɔ?

Mikanda wakafunde Pɔɔlɔ mɛnyaka woho wakandayakiyanyaka dia nkotsha ɔkɛndɛ ɔsɔ. Ɛnyɛlɔ, nde akafundɛ Akristo wa la Kɔrɛtɔ ate: “Lo kɛnɛ kendana la falanga yakɔngɔlɛnyu ekilami, nyoyele alako wakamasha tshumanelo dia la Ngalatiya. Lushi la ntondo la lo lomingu tshɛ, onto l’onto l’atei anyu kombake yangɔ mɔtshi lo ndjela ekondjelo kande diaha ɛkɔngɔ ndjosalema lam’ayomoya. Koko lam’ayomoya, dimi layotoma anto wakanyalowola lo mikanda dia vɔ ntɔla weshasha wakanyakimɔ l’otema ɔtɔi otsha la Jɛrusalɛma.”—1 Kɔr. 16:1-3.

Lo mukanda ande wa hende wakandafundɛ ase Kɔrɛtɔ, Pɔɔlɔ akanyomoyowatɛ nto ate ɔkɔngɔ ɔsɔ waki l’oyango wa “ekondjelo kanyu k’efula nkomba kɛnɛ kahombawɔ . . . dia wɛdimo kawoyale.”—2 Kɔr. 8:12-15.

Etena kakafundɛka Pɔɔlɔ Akristo w’ase Rɔma oya lo 56 T.D., lâsɔ ko ɔkɔngɔ ɔsɔ waya suke la nshila. Nde akate ate: “Dimi layanga minda lɔkɛndɔ otsha la Jɛrusalɛma dia tokimanyiya ekilami, nɛ dia wanɛ wele la Makɛdɔniya ndo la Akaya wakɛnyi dimɛna nkimɔ diangɔ diawɔ oko weshasha dikambo dia ase wola wele l’atei w’ekilami wa la Jɛrusalɛma.” (Rɔmɔ 15:25, 26) Pɔɔlɔ akakotsha ɔkɛndɛ ɔsɔ yema tshitshɛ oma lâsɔ nɛ dia l’ɔkɔngɔ wa nde nkalola la Jɛrusalɛma ndo mbidjama lo lokanu lɛkɔ, nde akatɛ nguvɛrnɛrɛ Feliksɛ k’ase Rɔma ate: “Dimi lakakome la Jɛrusalɛma dia ndjosha wodja ami weshasha wa kɛtshi ndo dia ndjolambola Nzambi elambo.”—Etsha 24:17.

Yimba yakakɛnɛmɔla Akristo wa lo ntambe ka ntondo mɛnamaka hwe lo kɛnɛ kakate Pɔɔlɔ dikambo di’Akristo wa la Makɛdɔniya. Nde akate ɔnɛ vɔ “vɔamɛ wakatetemala tɔsɛngasɛnga la etete dia vɔ monga la diɛsɛ dia nkimɔ weshasha wa la lolango.” Nde akakeketsha ase Kɔrɛtɔ dia vɔ ndjela ɛnyɛlɔ kɛsɔ lo mbatɛ ɔnɛ: “Onto l’onto akimɔ oko wakandashikikɛ l’otema ande, aha la lonyangu kana lotshutshuya, nɛ dia Nzambi nangaka onto lakimɔ l’ɔngɛnɔngɛnɔ.” Kakɔna kakatshutshuya Akristo asɔ dia vɔ mɛnya yimba ya lokaho? Vɔ wakalangaka “nkotsha ehomba w’ekilami, koko ndo dia ntshutshuya anto efula dia mbisha Nzambi losaka.” (2 Kɔr. 8:4; 9:7, 12) Sho lawɔ kokaka monga la lokaho l’ɔtɛ w’ɛkɔkɔ akɔ wâmɛ. Aha la tâmu, Jehowa Nzambi ayɔtshɔkɔla wanɛ wele la yimba ya ndjahombia ya ngasɔ ndo ɛtshɔkɔ ande mbatɔngɔnyaka.—Tok. 10:22.

[Kiombo ya lo lɛkɛ 9]

WOHO WASUKƐ ANTO AMƆTSHI OLIMU W’ESAMBISHELO WA L’ANDJA W’OTONDO

Oko wakidiɔ lo nshi y’ɔpɔstɔlɔ Pɔɔlɔ, anto efula ɛlɔ kɛnɛ ‘mombaka yangɔ mɔtshi’ kana yema ya dikuta ndo ndjidjaka lo tɔshɛtɛshɛtɛ ta l’etshumanelo tofundami lâdiko ɔnɛ: “Olimu wa l’andja w’otondo.” (1 Kɔr. 16:2) Ngɔndɔ tshɛ, tshumanelo tomɛka Bɛtɛlɛ k’Ɛmɛnyi wa Jehowa ka lo wodja awɔ weshasha ɛsɔ. Ndo wɛ lawɔ koka ntoma weshasha ɛsɔ lo lokombo leyama Ɛmɛnyi wa Jehowa wa lo wodja anyu. Dia mbeya lokombo la tshunda dia ntondo di’Ɛmɛnyi wa Jehowa dieyama le lɛɛta lo wodja anyu, wɛ koka fundɛ kɔmite ka filialɛ ka lo wodja anyu. Wɛ koka ntana adrɛsɛ wa filialɛ ka lo wodja anyu l’Ɛtɛrnɛtɛ lo sitɛ kɛnɛ: www.jw.org. Weho wa weshasha wakokayɛ tomɛ Bɛtɛlɛ mbala kakɔ ɔtɔi vɔ ɛnɛ:

WESHASHA WA LA LOLANGO

• Weshasha wa falanga, dɛngalɛnga kana diangɔ dikina dia nɛmɔ diele l’onto.

• Funda mukanda dia mɛnya lofulo la falanga kana nɛmɔ dia diangɔ diakimɔyɛ.

YƐDIKƆ YENDANA LA ƆSƆNDJƐLƆ WA FALANGA

• Vɔ kokaka nkaloya kanga falanga falanga yande naka nde ambonga l’ohomba ayɔ.

• Funda mukanda wɛnya ɔnɛ ɔsɔ ekɔ sɔmbɔ.

WEHO EKINA WAKIMƆ ANTO WESHASHA

Lâdiko dia falanga ndo diangɔ dikina dia nɛmɔ diele l’onto, ekɔ diangɔ dikina diakokaso nkimɔ dia ntɔla olimu wa Diolelo wa l’andja w’otondo otsha la ntondo. Diɔ mɛnyama lanɛ l’ɛse. Oyadi ɛngɔ kakɔna kalangayɛ nkimɔ, lam’alangɛ elɛ kana fundɛ Bɛtɛlɛ ka lo wodja anyu dia wɛ mbeya woho wakokayɛ nkimɔ ɛngɔ kakɔ. Lam’ele ɛlɛmbɛ wa lɛɛta ntshikitana lo wodja la wodja, ekɔ ohomba tambodi kanyi y’owandji wa lɛɛta wendana l’ofutshanyelo w’elambo la ntondo ka wɛ nsɔna yoho yoleki dimɛna ya tomɛ Bɛtɛlɛ woshasha ayɛ.

Asiransɛ wa lɔsɛnɔ: Woshasha wakimɔma lo lokombo la tshunda dimɔtshi dieyama le lɛɛta di’Ɛmɛnyi wa Jehowa l’oyango wa diɔ ndjokamba l’asiransɛ wa lɔsɛnɔ kana la falanga ya pasiɔ y’onto layikimɔ.

Kɔntɛ ya lo bankɛ: Onto mbeyaka mbuta dia l’ɔkɔngɔ wa nyɔi kande ko vɔ mbisha okongamelo waki Jehowa falanga yande yele lo bankɛ lo ndjela kɛnɛ kalɔmba bankɛ kawɔ.

Diangɔ diakatômbe kana falanga yokolami lɛɛta: Onto mbeyaka mbisha okongamelo waki Jehowa lotshungɔ la nkamba la diangɔ diakandômbe kana falanga yande yokolami lɛɛta.

Lokombo kana luudu: Onto koka mbisha okongamelo waki Jehowa lokombo kana luudu lande ndo naka lɔkɔ mbodjashinde, kete nde mbeyaka mbuta dia vɔ ndjoliɔsa l’ɔkɔngɔ wa nyɔi kande ndo tosinya mikanda laka lɛɛta dia lolango lande nɛmiyama.

Dia mbeya awui akina lo kɛnɛ kendana la nkimɔ weho wa weshasha ɛsɔ, fundɛ Ɛmɛnyi wa Jehowa lo adrɛsɛ wele l’ɛse kana elɛ Bɛtɛlɛ ka lo wodja anyu lo telefɔnɛ.

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefɔnɛ: (845) 306-0707

[Osato wa lo lɛkɛ 8]