“Olimu wekɔ woke”

WONYA wa losanganya l’ohomba efula la la Jɛrusalɛma wambokoka. Nkumekanga Davidɛ ambelɛ ewandji, ɛnɛnɛ wa lakande ndo apami wa wolo. Vɔ wekɔ lo nomɔlomɔ dia mpokamɛ diewoyelo dia laande. Jehowa akasha Sɔlɔmɔna ɔna Davidɛ ɔkɛndɛ wa mbika dihole dia laande dikambo di’ɔtɛmwɛlɔ wa mɛtɛ waki Nzambi. Wakasha nkumekanga k’opalanga k’ase Isariyɛlɛ kɛsɔ ekongelo ka wokelo lo tshimbo ya nyuma ndo nde ambokisha Sɔlɔmɔna. Davidɛ ambota ate: “Olimu wekɔ woke, nɛ dia aha tɛmpɛlɔ k’onto ketɔ, koko kaki Jehowa Nzambi.”—1 Ɛkɔndɔ 28:1, 2, 6, 11, 12; 29:1.

Oma laasɔ, Davidɛ amboka dimbola nɛ: “Ko waa na wayakimɔ la lolango dia ntomba la ntondo ɛlɔ kaamɛ la woshasha awɔ lo anya dikambo dia Jehowa?” (1 Ɛkɔndɔ 29:5) Otondonga wɛ aki laawɔ, ngande wotoyokadimola? Onde wɛ ototshutshuyama dia nsukɛ olimu wa woke ɔsɔ? Ase Isariyɛlɛ wakatatɛ nkamba olimu akɔ. Lo mɛtɛ, vɔ “wakangɛnangɛna dia nkimɔ weshasha wa la lolango . . . , nɛ dia vɔ wakasha Jehowa weshasha wa la lolango ɛsɔ la otema ɔtɔi.”—1 Ɛkɔndɔ 29:9.

Ntambe efula l’ɔkɔngɔ wa laasɔ, Jehowa akashikikɛ ɛngɔ kɛmɔtshi kakaleke tɛmpɛlɔ kɛsɔ woke la fwa. Nde akashikikɛ tɛmpɛlɔ ka lo nyuma ka woke, mbuta ate yɛdikɔ yakimanyiya anto dia ndjasukanya la nde dia mbɔtɛmɔla diɛsɛ la olambo wa Yeso. (Hɛbɛru 9:11, 12) Ngande wakimanyiya Jehowa anto dia ndjaokanya la nde ɛlɔ kɛnɛ? Lo tshimbo ya olimu aso wa mbetɛ anto ambeki. (Mateo 28:19, 20) Etombelo wele l’olimu ɔsɔ ele, ɔnɔnyi tshɛ tekɔ lo mbetsha miliyɔ y’anto Bible, nunu di’ambeki wekɔ lo batizama ndo nkama ya tshumanelo di’eyoyo diekɔ lo kengama.

Lo wedi okina, ohamelo ɔsɔ nɔmbaka otondjelo w’ekanda efula walembetshiya Bible, wokelo ndo ɔlɔngɔswɛlɔ wa Mbalasa ya Diolelo ndo osombelo w’ahole wasalema nsanganya ya weke. Shi wɛ mbetawɔka dia olimu aso wa dianganya lokumu l’ɔlɔlɔ wekɔ olimu wa woke ndo wele la difuto?—Mateo 24:14.

Ngandji kokaso Nzambi ndo wanyaso anto ndo woho wele olimu w’esambishelo waanyandja mbatshutshuya ekambi wa Nzambi “dia ntomba la ntondo . . . kaamɛ la woshasha . . . lo anya dikambo dia Jehowa” lo nkimɔ weshasha wa la lolango. Ande dimɛna “[n]ɛmiya Jehowa la diangɔ dia[so] dia nɛmɔ” ndo mɛna woho wakambawɔ la diangɔ sɔ la kɔlamelo ndo la kɛsɔ tshɛ dia nsala elimu wa weke efula l’ɔkɔndɔ w’ana w’anto lee!—Tokedi 3:9.

Woho wasukɛ anto amɔtshi olimu w’esambishelo wa l’andja w’otondo

Anto efula ɛlɔ kɛnɛ ‘mombaka yangɔ mɔtshi’ kana yema ya dikuta ndo ndjidjaka lo tɔshɛtɛshɛtɛ ta l’etshumanelo tofundami laadiko ɔnɛ: “Olimu wa l’andja w’otondo.” (1 Kɔrɛtɔ 16:2) Ngɔndɔ tshɛ, tshumanelo tomɛka Bɛtɛlɛ k’Ɛmɛnyi wa Jehowa ka lo wodja awɔ weshasha ɛsɔ. Ndo wɛ la wɔ koka ntoma weshasha lo lokombo leyama Ɛmɛnyi wa Jehowa wa lo wodja anyu. Dia mbeya lokombo la tshunda dia ntondo di’Ɛmɛnyi wa Jehowa dieyama le lɛɛta lo wodja anyu, wɛ koka fundɛ kɔmite ka filialɛ ka lo wodja anyu. Wɛ koka ntana adrɛsɛ wa filialɛ ka lo wodja anyu lo sitɛ kaso k’Ɛtɛrnɛtɛ ka www.jw.org. Weho wa weshasha wakokayɛ tomɛ Bɛtɛlɛ mbala kakɔ ɔtɔi vɔ ɛnɛ:

WESHASHA WA LA LOLANGO

Onto koka ntoma l’Ɛtɛrnɛtɛ weshasha wa falanga yele la nde lo bankɛ kana dibasa diande diokolami anto. Lo filialɛ mɔtshi, vɔ koka nkamba la jw.org kana sitɛ kekina.
Weshasha wa falanga, dɛngalɛnga kana diangɔ dikina dia nɛmɔ diele l’onto. Funda mukanda dia mɛnya lofulo la falanga kana nɛmɔ dia diangɔ diakimɔyɛ.

YƐDIKƆ YENDANA LA ƆSƆNDJƐLƆ WA FALANGA

Vɔ kokaka nkaloya kanga falanga falanga yande naka nde ambonga l’ohomba ayɔ.
Funda mukanda dia mɛnya lofulo la falanga kana nɛmɔ dia diangɔ diakimɔyɛ.

WEHO EKINA WAKIMƆ ANTO WESHASHA

Laadiko dia falanga ndo diangɔ dikina dia nɛmɔ diele l’onto, ekɔ diangɔ dikina diakokaso nkimɔ dia ntɔla olimu wa Diolelo wa l’andja w’otondo otsha la ntondo. Diɔ mɛnyama lanɛ l’ɛse. Oyadi ɛngɔ kakɔna kalangayɛ nkimɔ, lam’alangɛ elɛ kana fundɛ Bɛtɛlɛ ka lo wodja anyu dia wɛ mbeya woho wakokayɛ nkimɔ ɛngɔ kakɔ. Lam’ele ɛlɛmbɛ wa lɛɛta ntshikitana lo wodja la wodja, ekɔ ohomba tambodi kanyi y’owandji wa lɛɛta wendana l’ofutshanyelo w’elambo la ntondo ka wɛ nsɔna yoho yoleki dimɛna ya tomɛ Bɛtɛlɛ woshasha ayɛ.

Asiransɛ wa lɔsɛnɔ: Woshasha wakimɔma lo lokombo la tshunda dimɔtshi dieyama le lɛɛta di’Ɛmɛnyi wa Jehowa l’oyango wa diɔ ndjokamba l’asiransɛ wa lɔsɛnɔ kana la falanga ya pasiɔ y’onto layikimɔ.

Kɔntɛ ya lo bankɛ: Onto mbeyaka mbuta dia l’ɔkɔngɔ wa nyɔi kande ko vɔ mbisha okongamelo waki Jehowa falanga yande yele lo bankɛ lo ndjela kɛnɛ kalɔmba bankɛ ka lo dihole diende.

Diangɔ diakatoombe kana falanga yokolami lɛɛta: Onto mbeyaka mbisha okongamelo waki Jehowa lotshungɔ la nkamba la diangɔ diakandombe kana falanga yande yokolami lɛɛta.

Lokombo kana luudu: Onto koka mbisha okongamelo waki Jehowa lokombo kana luudu lande ndo naka lɔkɔ mbodjashinde, kete nde mbeyaka mbuta dia vɔ ndjoliɔsa l’ɔkɔngɔ wa nyɔi kande ndo tosinya mikanda laka lɛɛta dia lolango lande nɛmiyama.

Woshasha w’oma lo wahɔ wa l’ɔnɔnyi: Onto koka nkimɔ falanga kana falanga yawombɛwɔ laka lɛɛta (I.N.S.S.) le ɔlɔngɔswamelo ɔmɔtshi weyama laka lɛɛta wakamba l’Ɛmɛnyi wa Jehowa ndo mbɔsa yɛdikɔ ya nongolaka yema ya falanga mɔtshi ɔnɔnyi tshɛ, lo nshi tshɛ yekende la lɔsɛnɔ. Vɔ mbeyaka mbokitshɛkitshɛ taksɛ yafutawɔ lo ndjela wahɔ wakakondja onto l’ɔnɔnyi w’otondo l’ɔtɛ wa woshasha w’oma lo wahɔ wa l’ɔnɔnyi wakandakimɔ.

Tɛstama la mukanda wa mbɛkɛ otema: Onto koka mbɔsa yɛdikɔ ya nkimɔ lokombo lande oko woshasha l’ɔkɔngɔ wa nyɔi kande. Nde koka nsala dikambo sɔ oma lo tshimbo ya tɛstama kana mfunda mukanda ɔmɔtshi wa mbɛkɛ otema washa dikimɔ, lo mfunda lokombo l’ɔlɔngɔswamelo ɔmɔtshi weyama laka lɛɛta wakamba l’Ɛmɛnyi wa Jehowa dia vɔ ndjowɔsa. Mukanda akɔ mbishaka diaaso di’oshinga wa taksɛ mɔtshi nkitakita.

Wɛ kokaka ntana awui efula wendana la woho wa nkimɔ woshasha l’olimu wa l’andja w’otondo w’Ɛmɛnyi wa Jehowa lo biukubuku Charitable Planning to Benefit Kingdom Service Worldwide, yakafundama paka l’Angɛlɛ la lo Espagnole. Biukubuku yakɔ yekɔ lo mɛnya toho efula totshikitanyi takoka onto nkimɔ woshasha ɔmɔtshi. Akambo wofundami lo biukubuku shɔ mbeyaka ndjala ko hawosalema tshɛ lo tshɛ lo kɛnɛ kendana la yɛ l’ɔtɛ wa ɛlɛmbɛ wendana la taksɛ kana ɛlɛmbɛ wendana la wodja anyu. Anto efula wakimanyiya dia nsukɛ olimu aso wa l’andja w’otondo kondjaka okitshekitshelo w’oshinga wa taksɛ yendana la wahɔ wa l’ɔnɔnyi oma lo nkimɔ woshasha ɔmɔtshi l’atei wa weshasha woshilami engo. Naka biukubuku shɔ yekɔ lo wodja anyu, wɛ mbeyaka nɔmba sekeletɛlɛ ka l’etshumanelo kanyu.

Dia mbeya akambo efula, ɔtɔ lam’ofundjiwɔ ɔnɛ: “Nkimɔ woshasha dikambo dia olimu wa l’andja w’otondo,” l’ɛse ka lɛkɛ latomba ntondo lo jw.org, kana mbola Bɛtɛlɛ k’Ɛmɛnyi wa Jehowa ka lo wodja anyu.