Ekɔ ɔlɔlɔ dia nsanya kɛnɛ kakasale Jehowa

¹ Oma l’etshutshuyelo ka spirito ka Nzambi, ofundji w’Osambu 48 akakeketsha ase Isariyɛlɛ dia vɔ ‘kɛndakɛnda lo Siɔna, dia vɔ mbala efula ka dikundji di’osomba akɔ, dia vɔ menda mvudu y’edjaselo y’osomba akɔ, dia vo ndjosanyiya lɔlɔnga layaye.’ Oma lo ngandji kakawokaka Jehowa, vɔ wakahombaka ndjasha l’akambo tshɛ w’ɔmɔmɔ wa l’osomba ɔsɔ, wɔnɛ wâki etshina k’ɛlɔmbwɛlɔ ka lo Teokrasi la kɛtɛ. Akambo asɔ w’ɔmɔmɔ wâki ohomba efula, nɛ dia l’osomba ɔsɔ mbakakitsha Jehowa lokombo lande. Vɔ wotɔtɛkɛta di’akambo asɔ, ndo lâdiko dia tshɛ, vɔ wakahombe nama dia tokanula tawɔ ndjôka awui w’endana la dikola sɔ tshɛ diaki l’etema awɔ.​—Osam. 48:12, 13.

² Ɛlɔ kɛnɛ, etshina k’ɛlɔmbwɛlɔ ka Teokrasi k’Okitami waki Jehowa, kaya bu Siɔna ka la kɛtɛ, koko Jerusalɛma ya l’olongo. (Heb. 12:22) Diolelo dia Jehowa diakandasha Yeso Kristo diambotatɛka mbolɛ mako 1914. (Eny. 12:10) Olimu adiɔ wekɔ la wahɔ a woke le so. Yâmbalo yakiso kotɔmaka nto otsha lo yoho yalɔmbɔla Jehowa ekambi ande la kɛtɛ, wanɛ wele ɛmɛnyi w’ɛnama wa Diolelo sɔ, dia vɔ kotsha lolango lande. Ɛkɔndɔ w’ɔmɔmɔ w’amɛna efula w’endana la dikambo sɔ tanemaka lo dibuku nɛ di’oma la tomba: Les Témoins de Jéhovah: Prédicateurs du Royaume de Dieu. Diewoyelo di’otombelo wa dibuku sɔ lo losanganya la distrikɛ l’etshi (“wetshelo w’oma le Nzambi”) akasha anto ɔngɛnɔngɛnɔ a mamba.

³ Lo Lovula 1, 1993, dibuku sɔ diakatanemaka l’ɛtɛkɛta 20, ndo diɔ diaki lo kadimɔma ndo fundama l’ɛtɛkɛta ekina 13. Onde na wɛ ekɔ la dimɔtshi? Wɛ akatatɛ la diala oka? Onde na, wɛ ekɔ lo sanya kɛnɛ k’ekayɛ oma lo wadielo adiɔ oka?

⁴ L’ɔkɔngɔ wa vɔ sɛdingola esato la waɔmbwɛlɔ awɔ, efula k’anangɛso l’akadiyɛso wakayasha dia mbadia wadielo w’oshika wa dibuku diakɔ, oko akadiatama lo losanganya la woke. Ngande wakayala asolo awɔ na? Tênde diɛnyɛlɔ nɛ.

⁵ Kadiyɛso kɛmɔtshi akafunde ate: “Ndoko dibuku diakambisha posa ka ngasɔ ka dimana esadi dia dimi tatɛ la nyomodiadia nto. Laya lo tshapita 25 ya dibuku diakɔ. Lâtamaleke mbadia, kataleke ndo washo ami ndola l’asɔi ndo kataleke otema ami ndola la ngandji ka Jehowa. Ɔsɔ ekɔ dibuku diele l’ekeketshelo efula ndo dia keketsha mbetawɔ!”

⁶ Ɔnangɛso ɔmɔtshi lambokambɛ Jehowa ndekana ɛnɔnyi 40 akate ate: “Dimi kokanyiyaka edja ka tena dingana diotɔmbɔsɛ dibuku sɔ. Lakalalaka l’ɔkɔngɔ diko, ndo lakemɔka kɔ̂lɔmɔ, ko lakayodialaka lo mingu hiende. ɔsɔ ekɔ dibuku diakamâdia diakaleke mambiami. Diɔ diakɔ nyango dibuku, ndo diɔ ndola l’ekeketshelo.”

⁷ Ekongelo ka wadielo wa mbala la mbala: L’ɔkɔngɔ wa vɔ shidiya la menda dibuku diakɔ, amɔtshi wakɔshi tɛdikɔ dia nyomodiadia ɔkɔkɛ ɔkɔkɛ.

⁸ Naka nkumbo kanyu kekɔ l’anto efula wele lo mɛtɛ, kete ondo nyayolanga kamba la tenyi dia dibuku diakɔ olimu lo wekelo anyu wa lo nkumbo. Kɛsɔ kakasale nkumbo mɔtshi l’ɔkɔngɔ wa vɔ nongola dibuku dimɔtshi lo losanganya la woke. Dikambo sɔ halange mbuta ɔnɛ nyu pombaka tshika elimu ekina, oko ɔlɔngɔswɛlɔ wa wekelo wa La Tour de Garde. Koko nyayɛna ohomba dia mbɔsaka taahe 15 kana 20 dia mbadiaka awui amɔtshi wotombi oma lo dibuku Prédicateurs ndo dia kɛtshanyaka lɔkɔ.

⁹ Nkumbo kina mbadiaka ndjɛkɛ y’akatshi hiende kana shato (ɛnyɛlɔ oko ɛtɛ w’asawo wahɔnyi ehende kana ɔtɔi) la dikɔlɔ tshɛ l’ɔkɔngɔ w’olelo. Ondo onto l’onto l’atei a nkumbo akashile mbadia etenyi ka woke ka dibuku sɔ ndamɛmɛ, koko ekɔ ohomba dia diadia kâmɛ ɔkɔkɛ ɔkɔkɛ ndo tâkɛtshanyaka lɔkɔ. Lo nkumbo shɔ, amɔtshi wambokambɛ Jehowa ay’ɛnɔnyi efula. Lo wadielo wakiwɔ, vɔ mbohɔka akambo efula. Asolo awɔ kashimɔka lam’ohɔwɔ akambo amɔtshi wakâkomɛ.

¹⁰ Lo menda eongelo ka nkumbo kanyu, mbeyaka monga dia wɛ ekɔ lo mbadia dibuku diayɛ wɛmɛ. Kadiyɛso kɛmɔtshi akafundɛ la Société ate: “Dikɔlɔ tshɛ la ntondo ka dimi ndala, dimi dialaka yema. Dibuku diakɔ mbishakami lowando l’efula ndo ngandji ka mamba lo kɛnɛ k’endana la mɛtɛ, ndo lamboyaoka dia laya suke la Jehowa, lawândola ɔtɛkɔya dia monga ɔtɔi ɔmɔtshi l’ɔlɔngɔswamelo ande. Lekɔ lo mbadia dibuku sɔ l’ɔlɔ tshɛ dikatshi la dikatshi.”

¹¹ Mɛtɛ, dibuku diakɔ diekɔ woke efula, koko aha tenyi diadiɔ di’otshikitanyi. Etenyi ka mbɔtwɛlɔ kekɔ lo kɔndɔla akambo wakasalema mako etena k’Abɛlɛ polo ndo lo 1992, lo yoho y’esadi esadi koko yasungana​—lo ndjɛkɛ y’akatshi 108 tsho. Tenyi dikina tshikitanaka l’asa ndjɛkɛ y’akatshi 13 la 150. Etenyi l’etenyi kahanyema lo totshapita efula. L’ɔtɛ wa sho dimana l’ehatohato, tâdia etenyi kɛmɔtshi, tshapita mɔtshi kana ɔtɛ ɔmɔtshi wa sawo wahɔnyi mbala ɔtɔi dia sho mbaɔsa l’ɔngɛnɔngɛnɔ w’efula ndo dia sho kondja wahɔ oma lɔkɔ.

¹² Ɔsa etena ka wɛ kanyiya lo kɛnɛ kadiayɛ: La kanyi yakɔna yahombayɛ sala wadielo ɔsɔ na? Tônake paka dia mana akatshi efula. Dibuku Prédicateurs tondjaka ɛkɔndɔ ɛmɔtshi w’endana la ekola kayɛ ka lo nyuma lo sɛkɛ. Wɛ pombaka dimana fundo. Ɔsa etena ka wɛ kanyiyaka l’akambo w’eyɛ lo mbadia. Lam’atayashola olimu wakasalaka ɛmɛnyi wa Jehowa wa lo nshi yakete, yambola woho wokokiyɛ mbokoya mbetawɔ kawɔ. (Heb. 12:1, 2) Lo ɔkɔndɔ wa ɛtɔngwɛlɔ w’ɔtɔmbɔkwɛlɔ w’oma l’ɔtɛmwɛlɔ a mɛtɛ, lembetɛ tolonga takayɔkɔshaka amɔtshi, ndo dikambo sɔ ayokokimanyiya dia wɛ kokɛ lonyuma layɛ. Lam’atayashola ɔkɔndɔ aso w’etena kɛnɛ, lembetɛ waonga wa lo nyuma w’apami la amato wakakambe Nzambi lawɔ olimu, woho wakawɛnya kɛnɛ kaki l’etema awɔ dia sala ntondo lolango la Nzambi, woho wakawasale la ntondo k’akambo amɔtshi, wa pâ efula, wakatshikaka Nzambi.​—Heb. 13:7.

¹³ Wɛ ayokeketsha mbetawɔ kayɛ oma l’ɛkɔndɔ w’ɔmɔmɔ wɛnya woho wakela Jehowa wodja ande oya lo eokelo k’oshika ka mɛtɛ ya lo Bible yele laso ɛlɔ kɛnɛ. Lam’ayoyohotɔ woho wakakongɛma ɔlɔngɔswamelo, wɛ ayoleka kakatana lo dikongelo diakamba Jehowa ladiɔ olimu la kɛtɛ. Mɛtɛ wɛ ayonga l’osalosalo dia mbeya woho wakakome lokumu l’ɔlɔlɔ polo ndo lo ahole wa tale wa lo kɛtɛ, dia kotsha pɔlɔfɛsi. Wɛ ayambiama oma l’ɛkɔndɔ w’anto wa kɔlamelo wa lo wedja tshɛ, wanɛ wakayasha l’ohetoheto dia sambisha Diolelo. Wɛ ayokeketala dia ntokomɛ ehemba ayɛ lam’ayoyadia kɛnɛ kakakikɛ anangɛso l’akadiyɛso wâki la kɔlamelo oma lo ngandji kakawokaka Jehowa.

¹⁴ L’ɔkɔngɔ a wɛ mbadia etenyi kɛmɔtshi ka dibuku, ɔsa etena ka nyu kɛtshanyaka l’atei a nkumbo lo dikambo dia nɛmɔ diadiɔ la vusola ɛkɔndɔ w’ɔmɔmɔ wele lɔkɔ. Naka wɛ ekɔ l’ana w’akɛnda, mbolawɔ dia vɔ kolembetshiya esato ndo dia vɔ kotɛ kɛnɛ k’eyawɔ lo dikambo di’anto wele l’esato akɔ. Kânga wɛ ekɔ lo mbadia wɛmɛ, hemba dia wɛ nsanyia anto akina akambo w’ekayɛ. Lo ndjela akambo wayohomanaka layɛ, kamba l’ewo kɛsɔ olimu lam’ayoyosalaka waembwelo w’eyoyo ndo lam’ayoyetshaka ambeki wa Bible. Ovuswelo ayɔkɔkɔmiya tokanyi tɔsɔ lo yimba yayɛ ndo l’otema ayɛ, ndo wɛ ayokimanyiya anto akina.

¹⁵ Yasha l’akambo w’ɔmɔmɔ: Wadielo ayɛ wa dibuku Prédicateurs pombaka kosha ɔngɛnɔngɛnɔ efula.

¹⁶ Onde na, wɛ nangaka membola mbalasa ka woke k’Ɛmɛnyi waki Jehowa ka l’andja w’otondo kâmɛ la nkumbo kayɛ oka? Lɛkɛ la dikatshi 208 la 209 mɛnyaka mvudu yakakambaka la Société layɔ olimu ambeta oko eleko ɔtɔi la Pittsburgh. Lɛkɛ la dikatshi 216 la 217 kɛ̂nyaka mvudu yakayokambema olimu la Broklyn l’ɔkɔngɔ diko. Fɔtɔ ya lo lɛkɛ la dikatshi 352 polo 356 koshaka ɛnɛlɔ ka mbalasa ka l’andja w’otondo ɛlɔ kɛnɛ. Tshapita 26 la 27 mbishaka ɔkɔndɔ w’ɔmɔmɔ w’olimu wasalema lo Bɛtɛlɛ, ndo lɛkɛ la dikatshi 295 polo 298 mbishaka elakanyelo ekina lo kɛnɛ k’endana la lɔsɛnɔ la lo Bɛtɛlɛ

¹⁷ Anto yema tshitshɛ wa l’atei aso mbele l’akoka wa membola mbalasa efula yaki la Société. Lɛkɛ la dikatshi 357 polo 401 lo dibuku Prédicateurs koshaka ɛnamelo ka l’andja w’otondo. Ndoko ohomba wa wɛ samanya esadi esadi. Ɔsa etena ka wɛ mbishola wodja la wodja. Ɔsa kartɛ k’andja kele lo lɛkɛ la dikatshi 415 polo 417, kamba latɔ olimu dia wɛ mbeya lo dihole diatanema mbalasa la mbalasa. Adia waɔmbwɛlɔ wele lo fɔtɔ tshɛ. Diɛsɛ oma lo dionelo kana ɛndɛksɛ, wɛ kokaka mbishola elakanyelo ekina w’endana la wodja la wodja. Ɔsa diaaso sɔ dia wɛ mbeya ase nkumbo kayɛ ka lo nyuma wele lo wedja ekina.

¹⁸ Tɔkɛnyɔ ta la Société nɔmbaka di’onto mbeya awui amɔtshi weta lo bɛkɛ dikina dia l’andja ndo mbeya Ɔkɔndɔ w’anto. Onde na, hatonga ohomba dia mbeya adatɛ l’akambo wa l’ɔkɔndɔ wa lo nshi yaso nyɛ wa wodja wa Jehowa oka? Wɛ ayotana ɛnɔngɔ a weke w’adatɛ akɔ lo lɛkɛ la dikatshi 718 polo 723 lo dibuku Prédicateurs. Ɔkɔndɔ ɔsɔ kema l’ɔmɔmɔ; koko wɛ kokaka mbɔsa eshika w’akambo watanema lo dibuku ko wɛ mbakotsha lɔkɔ. Kamba lawɔ olimu dia wɛ salaka ovuswelo. Ɛlɔngɔlɔngɔ wayokimɛ esadi eto mɛtɛ. Ondo akɛnda wayonga l’okakatanu. Koko awui asɔ wekɔ ɛkɔndɔ w’ɔmɔmɔ w’endana la l’akambo wa Teokrasi wahombaso mbeya sho tshɛ. L’ɔkɔngɔ a wɛ mbeka adatɛ l’akambo woleki ohomba, lembetɛwɔ dimɛna. Hemba dia wɛ kimɛ akambo amɔtshi w’ɔmɔmɔ wa lo dikambo la dikambo. L’ɔkɔngɔ, wɛ pombaka mbuta ɔkɛndɛ wa dikambo la dikambo lo okotshamelo wa sangwelo dia Nzambi. L’ɔkɔngɔ diko, yanga shɛngiya yakɔna yâki l’akambo asɔ lo lɔsɛnɔ layɛ ndo dihole diayɛ lo kɛnɛ kasala Jehowa.

¹⁹ Waaso wekɔ la ntondo kayɛ: Lo yɛdikɔ yayoyoshila la nembetɛ Les Témoins de Jéhovah: Prédicateurs du Royaume de Dieu, wɛ ayɛna okotshamelo wa pɔlɔfɛsi k’Isaya 60:22. Ɔnkɔnɛ mbâdiaso lo lɛkɛ la dikatshi 519: “Daka di’ɔnɛ ‘ɔnɛ lele tshitshɛ ayoyala kinunu’ diambokotshama mɛtɛ, ndo diamboleka kotshama lâdiko! Lo wedja olekani 50 lɛnɛ aki kondjala kânga ‘onto ɔtɔi lele tshitshɛ’ (lɛnɛ aki kondjala kânga ɔmɛnyi ɔtɔi wa Jehowa l’ɔnɔnyi 1919, lɛnɛ aki ndoko onto lakasambisha), ɛlɔ kɛnɛ atɛmɔdi wa Jehowa wambolekana kinunu lɛkɔ. Lo tena dimɔtshi, aya akumi wa nunu, ndo olekani kama ya nunu y’Ɛmɛnyi waki Jehowa mbele lo sambisha Diolelo dia Nzambi l’ohetoheto! L’andja w’otondo, Ɛmɛnyi waki Jehowa wamboyala ‘wodja a wolo,’ wamboleka ndo anto wa lo wedja 80 wayalɔmbɔla wa l’andja efula.”

²⁰ Olimu wa Diolelo, wɔnɛ washa ohamelo ɔsɔ, watashile. Koko, Jehowa ekɔ lo tɔ̂kɛndjakɛndja esadi esadi. Naa lotumu lakambayɛ lɔkɔ na? Onde mɛtɛ wɛ ekɔ lo mɛna waaso tshɛ wele la ntondo kayɛ oka? Lo yoho y’ekayɛ kɛnɛ kasala anto akina, otema ayɛ akutshutshuya dia wɛ ndjâla la diaaso dia kamba efula l’olimu wa wokewoke walɔmbwama oma le Nzambi kaso ka ngandji l’etena kaso kɛnɛ oma l’ekimanyielo ka Yeso Kristo!