Tɛnake Akambo la Sso di’Ɔlɔlɔ
1 Ande ɔlɔ wele laso dia mɛna ohamelo wa diambo wosalemi lo wedja efula lee! Koko, sho mbeyaka ɔnɛ lo bɛkɛ dimɔtshi dia kɛtɛ, wanɛ wasambisha losango la Diolelo wekɔ lo pomana tena efula la wendjodi kânga ndo wekamu wa wolo l’olimu aso w’esambishelo. Woho akɔna wokokiso mɛnaka akambo nshi tshɛ la sso di’ɔlɔlɔ, naka ɔsɔku mbasalema lo mbilo kaso na? Woho akɔna wokokiso mbewɔ di’aha mɛna ɔnɛ ndoko di’ɔlɔlɔ diayotomba, lɔkɛwɔ layoshidiya ɔngɛnɔngɛnɔ aso kana tutsha ohetoheto aso l’olimu wa mbetɛ anto ambeki na?
2 Mɛnaka akambo la sso di’ɔlɔlɔ ayotokimanyiya di’aha mɛngɛnga. Kânga l’ehemba, sho pombaka mɛnaka akambo nshi tshɛ la sso di’ɔlɔlɔ. Yeso akatotshikɛ ɛnyɛlɔ ka kokele. Lo menda mɛtɛ, anto yema tshitshɛ tsho mbaketawɔ kɛnɛ kakandetshaka. Efula wakatakana lo wetshelo ande. Nde akatokomɛ akambo wakadje etetemalo kande l’ohemba wa mamba. Ewandji wa tɛmwɛlɔ wakɔ̂nyɔla olimu ande ndo wakadje sheke dia mbodiaka. Wakawotela sɔi, wakɔ̂sɔkɛ, wakɔ̂kɔmɔla ndo l’ɔkɔngɔ diko wakodiake. Koko nde akayalaka l’ɔngɛnɔngɛnɔ l’olimu wakandasalaka. Lande na? Nde akeyaka ohomba wa sala lolango la Nzambi ndo nde kopekɔ.—Joani 4:34; 13:17; Heb. 12:2.
3 Toyalake la Kanyi y’Ɔlɔlɔ l’Olimu Aso: Dia sho kotsha dikambo sɔ, sho pombaka momba aui efula lo yimba. Tôhɔ dia tekɔ lo mbewɔnya losango lahalange anto efula mboka kana latonawɔ. (Mat. 13:14, 15) Kânga mbakawadjangɛ apɔstɔlɔ oma le lɛɛta dia vɔ tshika mbetsha lo lokombo la Yeso, vɔ wakatshikala la kɔlamelo lo lotumu lakiwɔ ndo dinela diakatetemala la mbidjama lo shɛkɔ. (Etsha 5:28, 29; 6:7) Tamboshilaka mbeya ɔnɛ mɛtɛ, lo mbilo mɔtshi, anto yema tshitshɛ tsho mbayolonga. (Mat. 7:14) Koko, kânga mbediɔ ɔsɔku, sho tekɔ l’ɛkɔkɔ wa ngɛnangɛna naka kânga onto ɔtɔi oto ambohoke lotui. Tôhɔ nto dia kânga wanɛ watona pombaka ndjâla la diaaso dia mboka losango. (Ezek. 33:8) L’atei awɔ, amɔtshi kadimɔka ndo ndjâlaka atɛmɔdi wa Jehowa. Etena keso la lokanyi l’ɔlɔlɔ l’olimu, olimu akɔ toshaka ɔngɛnɔngɛnɔ kânga anto yema tshitshɛ tsho mbolongi. Woho wɛnamaso l’asoko oto dia mbewoya losango la Diolelo dia Nzambi ekɔ esambishelo.—Ezek. 2:4, 5.
4 Tekɔ l’ɛkɔkɔ w’ɛlɔlɔ wahombaso mɛnaka akambo la sso di’ɔlɔlɔ. Ohamelo w’olimu l’andja w’otondo ndo woho wayasukana fɔnu ka woke pombaka tshutshuya onto l’onto l’atei aso dia nde sala la wolo ande tshɛ ndo kamba olimu la dilɛmiɛlɔ dia Nzambi. (2 Petero 3:11, 14) Naka sho kamba olimu l’ohetoheto lo ngɔndɔ ka Yâta afusa, kete ayônga yoho mɔtshi y’ɔlɔlɔ ya sho mɛnya lowando laso lo kɛnɛ kakatêke. Sho kombolaka nto dia asekaso w’eyoyo kamba olimu la sso di’ɔlɔlɔ oma lo kɛnɛ k’ekawɔ. Naka anto amɔtshi wa l’atei a wanɛ weka laso Bible wambohama efula lo yɛdikɔ yokokiwɔ koma apandjudi wahatabatizama, kete, aha la tâmu, ngɔndɔ ka Yâta afusa kayônga etena k’ɔlɔlɔ efula ka sho mbatshutshuya dia vɔ tatɛ la sambisha.
5 Oyadi apandjudi mbeso kana ambatshi mboka, sho tshɛ tayokimanyiyama naka sho momba lo yimba ɔnɛ: Jehowa hatɔlɔmbɛ ndoko dikambo diele wolo le so. (1 Joani 5:3) Nde ekɔ lo tolaka dia tosukɛ. (Heb. 13:5b, 6) Sho pombaka mɛnaka akambo la sso di’ɔlɔlɔ ndo tetemala la sambisha kânga mbele wendjodi la wekamu w’anto tokomɛka, nɛ dia ɔsɔ kele lolango la Nzambi.—1 Tim. 2:3, 4.