Wolo wa Dui dia Nzambi
1 Bible akonge la shɛngiya ya wolo efula lo lɔsɛnɔ la miliyɔ y’anto. Kɛnɛ kele lɔkɔ sokoyaka anto efula dia vɔ sala dikambo dimɔtshi oleki ekanda ekina tshɛ wambofunda anto. (Heb. 4:12) Tênde kɛnɛ kakasale Bible lo dikambo diaso shoamɛ. Mɛtɛ, ohomba atɔ hɛdimi l’abuku akina tshɛ.
2 Ɛmɛnyi wa Jehowa wekɔ ambeki wa Bible wa sɔlɔ sɔlɔ ndo amamedi atɔ wa ntondo. Sho pombaka mbɔsa walelo wa Bible oko etenyi k’ohomba efula k’ekongelo kaso ka Teokrasi ka nshi tshɛ, ndo kidja lo dihole dia ntondo oleki televiziɔ kana tɔkɛnyɔ tokina tshɛ.
3 Mbekelo: Anto wa Jehowa mbeyaka ɔnɛ walelo wa Bible wa tena la tena ndjalaka la shɛngiya y’ohomba efula. Tamba ɛnɔnyi efula, awui amɔtshi wakafundama l’ehele ka luudu lɔmɔtshi la l’atei a mvudu ya yaandjo y’ofundelo yaki la Société la Brooklyn wakalɔmbaka ambetshitshi ɔnɛ: “Konyalake Bible k’Ekila, Dui dia Nzambi nshi tshɛ.” Vɔ nɔmbaka wanɛ weke ka ndjâla ase Betɛlɛ dia mbala Bible k’otondo l’edja k’ɔnɔnyi awɔ wa ntondo lo Betɛlɛ.
4 Kânga mbeso kema la wenya efula, onde tayelakɔ ekongelo ka walelo wa Bible wa lomingu la lomingu wakalɔngɔsɔma lo dikambo dia Kalasa k’Olimu wa Teokrasi? Naka takayala l’ekakatanu lo dikambo sɔ, lande na ahatalɔngɔsɔla ekongelo kaso lo ngɔndɔ ka Yitshu? Walelo wa Bible wakalɔngɔsɔma lo ngɔndɔ k’otondo ayotatɛ oma lo Tokedi 21 polo lo Tokedi 31, lâsɔ tayalaka ndjɛkɛ shato kana nyɛi lo lomingu. Anto amɔtshi mbɔsaka tɛdikɔ ta mbalaka tshenyi ya tshitshɛ lushi tshɛ, ondo la pindju ka pɛ kana la dikɔlɔ la ntondo ka ntshɔ a tolala. Oyadi wonya akɔna wayoyɔsɔna, kɛnɛ kele ohomba ele wɛ kondja ɛlɔlɔ watomba oma lo walelo wa Dui dia Nzambi tena la tena.
5 Tosha Anto Bible lo Yitshu: Anto efula wakatetemala nɛmiya Bible ndo vɔ nangaka mboka etena keso lo mbawalɛ avɛsa amɔtshi. Lo Yitshu, tayosha anto Traduction du monde nouveau kâmɛ la dibuku La Bible: Parole de Dieu ou des hommes? Ɔsɔ mɛtɛ ekɔ diaaso di’ɔlɔlɔ efula dia mɛnya anto w’etema ɔlɔlɔ ohomba wa Dui dia Nzambi! Tokiɛnyanya la wangasanu.
6 Tɔlɔngɔsɔlɛ elembetshiyelo w’amɛna dia mɛnya akambo wa lânde wele la Traduction du monde nouveau wakoka mbisha anto saki ka ndjâla latɔ. Toke epole ɔsɛkɛ lo dikambo di’ohomba atɔ. Sho kokaka sɔnɔla ɔtɛ ɔmɔtshi a dui l’atei a wɛnɛ wele lo “Sujets de conversation bibliques” ko mbowɔtɔnganyiya la dibuku La Bible: Parole de Dieu ou des hommes? Kokaka nto tɛkɛta di’ohomba wa index w’ɛtɛkɛta wa lo Bible wele la ndjɛkɛ 102 lo mɛnya woho wakoka index akɔ kimanyiya onto lâla dia nde mbishola avɛsa weyande. Ondo apandjudi amɔtshi wayɔsa tɛdikɔ dia sɔtɔla “Appendice” kana “Table des livres de la Bible” lo nembetshiya ohomba awɔ lo wekelo wa Dui dia Nzambi.
7 Tokanyiya dia mbuta ɔnɛ: Traduction du monde nouveau akakadimɔma lo Falase ka nshi nyɛ, diɔ diakɔ dietɔ kema wolo mboka. Sho mbeyaka kiɛdika l’ekadimwelo ekina efula weyaso lo Mateu 5:3 la 1 Koreto 16:22. Traduction du monde nouveau kambaka olimu la lokombo la Nzambi Jéhovah mbala 7210.
8 Mɛtɛ, Bible ekɔ Dui dia Nzambi. Naka sho kiala, ndjâla la mbetawɔ lo losango lele lɔkɔ ndo ndjela alako wele lɔkɔ lo lɔsɛnɔ laso, kete tayokondja ɛlɔlɔ efula. Tɔ kakafundama dia tosha wetshelo ndo elongamelo. (Romo 15:4) Ekɔ ohomba efula dia sho kialaka nshi tshɛ ndo dia sho kamba latɔ olimu dia mbetsha anyaso.