Tosambisha Dimɛna Efula
1 Olimu wa sambisha ekɔ dikambo dioleki ohomba efula. Anto wayotatetemalaka la sɛna kana mvɔ lo ndjela lɔkɛwɔ lawɔ lo kɛnɛ k’endana la lokumu l’ɔlɔlɔ. (1 Petero 4:5, 6, 17; Eny. 14:6, 7) Diɔ diakɔ diatetemalaso la nyanga woho wa sambisha dimɛna efula. Kakɔna kokokiso sala dia ntsha ngasɔ?
2 Toyalɔngɔsɔlɛ Dimɛna: Tɔsɔnɔlɛ sawo dimɔtshi, l’Olimu Aso wa Diolelo wa ngɔndɔ keso, diɛnaso ɔnɛ diayokoka kotola yambalo y’anto wa lo mbilo kaso, ndo tɔtɔnganyiya kɛnɛ kataso l’akambo awɔ. Onyake kana tayɛna dimɛna kamba olimu la yoho mɔtshi yɛnaso shoamɛ yɔlɔngɔsɔmi la tokanyi tɔmɔtshi ndo l’avɛsa amɔtshi weyaso ɔnɛ wekɔ la shɛngiya ya wolo. Lâsɔ todje yimba dia mbɔtwɛlɔ kaso ka lo sawo mbotsha onto saki. (enda lo dibuku Comment raisonner, lɛkɛ 9-15) Ondo tayolanga mumbola ɔtɛkɛtshi aso dimbola di’oshika kana mbombola kɛnɛ kakanande lo kɛnɛ k’endana l’akambo amɔtshi weke ka tomba wakotola yambalo y’anto wele lo dihata diande. Naka tambokimɛ sawo diaso l’ɔtɛ, totahembi l’ose nkumbo kaso ɔmɔtshi kana l’opandjudi ɔmɔtshi wakoka tosha alako wahombama dia sho pama.
3 Tosawole l’Anto: Oyango aso ele wa dianganya losango l’ohomba. Sho kokaka disala lo tahɔhɔlaka ɛkɛtshanyelo w’eshika. Naka ɔtɛkɛtshi aso ambombola dimbola dimɔtshi kana ambotosha lokanyi lande lo dikambo dimɔtshi, tôlonge la yambalo tshɛ. Kɛnɛ katande kokaka tokimanyiya dia sɛdingola avɛsa akɔna wa lo Bible wakokaso kamba lawɔ olimu dia mbokadimola ndo kahana lande elongamelo kaso. (1 Petero 3:15) Naka kanyi yande hɔtɔnɛ la wetshelo wele lo Bible, sho kokaka mbotɛ la loshilambo tshɛ ɔnɛ: “Anto efula mɛnaka akambo oko wɛnayɛ. Koko, ohenda yoho kina nyɛ yokokiso mɛna dikambo diakɔ.” Towale divɛsa dimɔtshi diasungana ndo towombole kɛnɛ kakanande.
4 Toyalake l’Ekongelo Kokokiso Tshikitanya: Naka sho ndjalɔngɔsɔla dimɛna, ko hatotanyi ndoko onto, ɔsɔ kema dikambo dia woke. Nshi nyɛ, tena efula anto hawoleke tanema la wakawɔ etena katatasambisha. Ko naka ɔsɔku mbediɔ lo mbilo kaso, lande na ahatatshikitanya ekongelo kaso dia sho ntshɔka lo luudu la luudu l’etena kaleka anto efula mbidjasɛ la wakawɔ? Ondo tayɔfɔnya ɔnɛ wikɛndɛ mbele tena dioleki sungana dia tenda anto. Mbala mɔtshi, l’atei a lomingu, djekoleko la dikɔlɔ, mbokokiso mbatana. Lo ngelo mɔtshi, apandjudi mɛnaka dimɛna sambisha nshi y’afɛstɔ, nɛ dia nshi shɔ vɔ kokaka mbewoya anto efula lokumu l’ɔlɔlɔ. Nshi ya ngasɔ anto tongaka tena efula la wangasanu ndo nangaka sawola l’anto. Lo tena sɔ sunganaka dia mbɔtɔnganyiya mbɔtwɛlɔ yaso y’asawo ndo kakatanya ɛtɛkɛta aso la sawo dimɔtshi dia lo Bible.
5 Tende Kana Asawo Aso Wekɔ Amɛna Efula: L’ɔkɔngɔ wa sho mangana l’onto, toyambole ɔnɛ: “Onde lakanandi otema ande? Onde lakotshutshuyisha dia nde mbuta kɛnɛ kele l’atei w’otema ande ndo lakolongi? Onde lakokadimodi la loshilambo? Lo ndjela akambo wele lande, onde yoho yakamasadi aki dimɛna efula?” Mbeyaka ndjâla ohomba dia sambishaka tena la tena kâmɛ l’opandjudi ɔmɔtshi wambekesanɛ l’olimu kana l’ombatshi mboka ndo mbidja yambalo tshɛ lo asawo ande, ndo kɛsɔ tshɛ l’oyango wa sambisha wɛmɛmɛ dimɛna efula.
6 Naka tekɔ la yewo l’olimu aso, kete tayokoka mbewoya akambo a mɛtɛ w’endana la Diolelo, akambo wayotokimanyiya dia ‘sho ndjashimbela, ndo sho ndo wanɛ watolonga.’—1 Tim. 4:16; Tok. 22:29.