Ɛnyɛlɔ ka Ndjela lo Nna ndo lo Nna
1 Aha la tamu, Yeso ekɔ onto loleki woke lo tena tshɛ. Nde akatshikɛ ambeki ande ɛnyɛlɔ ka kokele. Kânga mbahatakoke mbɛdima lande lo lokokele, tambɔlɔmbama dia ‘ndjela wanya ande dimɛna.’ (1 Pet. 2:21) Ɛngɔ kahombaso kombolaka ele dia fɔna la Yeso lo akambo tshɛ, djekoleko lo mbewoyaka anto akina akambo a mɛtɛ l’ohetoheto tshɛ.
2 Yeso kondjala paka opandjudi oto: nde aki ombetsha woleki embetsha ekina tshɛ. ‘Elui a wake w’anto wakambaka dia wetshelo ande.’ (Mat. 7:28) Lande na akandalakanya dimɛna efula ngasɔ na? Tɔsɛdingole “wetshelu andi” la yambalo tshɛ.
3 Woho wa Ndjela Yeso: Yeso aketshama oma le She. (Joa. 8:28) Saki kande aki ka nɛmiya Jehowa ndo tombola lokombo lande. (Joa. 17:4, 26) Otombelo aso l’olimu w’esambishelo ndo w’olakanyelo pombaka sokoyama la saki kaso ka nɛmiya Jehowa koko aha ka sho mbɔsa dihole dia ntondo.
4 Kɛnɛ tshɛ kakalakanya Yeso kaki l’etshina katɔ lo Dui dia Nzambi. Nde akashilaka Afundelo tena tshɛ. (Mat. 4:4, 7; 19:4; 22:31) Sho kombolaka kotola yambalo y’atɛkɛtshi aso otsha lo Bible. Ɔsɔku mbayoweya ɔnɛ kɛnɛ kasambishaso ndo kalakanyaso ndjaka oma le ɔnɛ lôle tshɛ.
5 Yeso akakambaka olimu la ɛtɛkɛta wa lo tshena pe, w’eshika ndo wele kema wolo mboka. Ɛnyɛlɔ, lam’akandalembetshiya ambeki ande woho wa kondja edimanyielo oma le Nzambi, nde akâkeketsha dia vɔ dimanyiya anto akina. (Mat. 6:14, 15) Sho pombaka ndjatshutshuya dia mbewoyaka losango l’endana la Diolelo l’ɛtɛkɛta wele kema wolo mboka.
6 La yewo tshɛ mbakayakimanyiyaka Yeso la wɛla ndo la wembola dia tshutshuya atɛkɛtshi ande dia vɔ kana lomba. (Mat. 13:34, 35; 22:20-22) Wɛla w’akambo wasalema lushi la lushi kokaka kimanyiya anto dia vɔ shihodia wetshelo ɛmɔtshi wa wolo mboka wele lo Bible. Sho pombaka mboka wembola wawatshutshuya dia vɔ kana lomba. Wembola wa lo lowanya mbeyaka mbakonya lo vɔ shihodia dimɛna.
7 Yeso akɔsaka etena ka mɔmbɔlɛ wanɛ wakakombolaka shihodia akambo wa wolo. Wanɛ wakayashaka mɛtɛ lo akambo akɔ, oko ambeki ande, wakashihodia kɛnɛ kakalakanyaka Yeso. (Mat. 13:36) Ndo sho lawɔ pombaka ndjâlaka l’etena ka kadimula l’otema ɔtɔi lo wembola watombola anto. Naka hateye okadimwelo wa wembola ɛmɔtshi wa l’atei awɔ, kete sho pombaka toyangayanga ko ndjowosha elembetshiyelo walangande l’ɔkɔngɔ diko.
8 Yeso akalakanyaka nto oma lo ɛnyɛlɔ. Nde akɔtsha ekolo w’ambeki ande, nde ɔnɛ laki Nkumɛwɔ. (Joa. 13:2-16) Naka tekɔ la lomba la ndjakitshakitsha, kete anto walakanyaso wayosokoyama dia ndjela kɛnɛ kekawɔ.
9 Yeso akanandaka etema w’anto ndo akâkotolaka dia vɔ nanga losembwe. Ndo sho lawɔ nangaka munanda etema w’anto. Tekɔ lo pemba dia nomialomia saki kawɔ ka lôtɔ kele le onto tshɛ ka tɛmɔla onto lôle tshɛ ndo ka mbidjasɛ l’asekande anto lo wɔladi ndo l’ɔngɛnɔngɛnɔ.
10 Lo Mam’ɛkɔngɔ la Tange, tayonga la diaaso dia tɛkɛta kɛnɛ kakateke lo dikambo dia Yeso lo mbisha anto dibuku Le plus grand homme de tous les temps. Naka sho ndjela yewo ya ndakanya ya Yeso, kete tayotshutshuya anto w’etema ɛlɔlɔ dia vɔ nonga wetshelo ande.—Mat. 10:40.