‘Lambonyosha ɛnyɛlɔ ka nyu ndjela’
‘Edja kɛnɛ tshɛ, tshike nyambotashilaka monga embetsha.’—HEBERU 5:12.
1. Lande na kakoka ɛtɛkɛta wa lo Heberu 5:12 kiyanya Okristo lo yɛdikɔ mɔtshi?
WONYA wadiayɛ ɛtɛkɛta wakasambiyama wa lo divɛsa diɔsami ɔtɛ aso wa sawo nɛ, onde wɛ ndjakiyanyaka lo yɛdikɔ mɔtshi lo dikambo sɔ? Naka ngasɔ, kete eya di’aha wɛmɛ oto mbayaoka ngasɔ. Oko weso ambeki waki Yeso, sho mbeyaka dia sho pombaka monga embetsha. (Mateu 28:19, 20) Sho mbeyaka di’etena kasɛnaso kɛnɛ tɔlɔmbaka efula dia mbetsha anto lo yɛdikɔ yɛdimi l’akoka aso. Ndo sho mbeyaka di’oma lo wetshelo aso, anto wetshaso kokaka kondja lɔsɛnɔ kana nyɔi! (1 Timote 4:16) Lâsɔ, sho kokaka ndjambola onto l’onto ɔnɛ: ‘Onde dimi mɛtɛ lekɔ woho w’ombetsha wahombami monga? Ngande wakokami ndjalowanya?’
2, 3. (a) Ngande wakalembetshiya ombetsha ɔmɔtshi etshina ka wetshelo wa dimɛna? (b) Ɛnyɛlɔ kakɔna kakatotshikɛ Yeso lo kɛnɛ kendana la wetshelo?
2 Ekiyanu wa ngasɔ hawohombe tɔkɔmɔla demba. Naka tayɔsa tsho wetshelo oko dikambo dimɔtshi dialɔmba dia paka ndjala la diewo dimɔtshi dia lânde, kete tayɛna di’ekɔ wolo efula sho ndjalowanya lo dikambo sɔ. Aha diewo dia mbetsha mbele etshina ka wetshelo wa dimɛna, koko ekɔ ɛngɔ kɛmɔtshi koleki diewo sɔ ohomba efula. Tende kɛnɛ kakafunde ombetsha ɔmɔtshi wa manamana lo dibuku dimɔtshi lo kɛnɛ kendana la dikambo sɔ: “Wetshelo wa dimɛna hendana la diewo kana toho tɔmɔtshi ta lânde ta mbetsha kana la dikongelo ndo la totshelo tɔmɔtshi. . . . Wetshelo ekɔ ntondo dikambo diendana la ngandji.” Ekɔ mɛtɛ di’ombetsha ɔsɔ kɔtɛkɛta dikambo dia wetshelo wendana l’ɔtɛmwɛlɔ. Koko kanyi yande kokaka mbɔtɔnɛ dimɛna la wetshelo aso oko weso Akristo. Woho akɔna?
3 Yeso Kristo oto mbele Ɛnyɛlɔ kaso lo dikambo dia wetshelo. Yeso akatɛ ambeki ande ate: ‘Dimi lambonyosha ɛnyɛlɔ ka nyu ndjela.’ (Joani 13:15) Nde akatɛkɛtaka dikambo di’ɛnyɛlɔ kakandasha lo kɛnɛ kendana la ndjakitshakitsha, koko ɛnyɛlɔ kakatosha Yeso kɛsɔ mendanaka mɛtɛ ndo l’olimu woleki ohomba wakandakambe lam’akinde lanɛ la nkɛtɛ, mbut’ate olimu wa mbetsha anto lokumu l’ɔlɔlɔ la Diolelo diaki Nzambi. (Luka 4:43) Lâsɔ, naka vɔ kɔlɔmba dia sɔna tshɛkɛta tshɔi dia nembetshiya olimu waki Yeso, kete mɛtɛ wɛ ayɔsɔna tshɛkɛta “ngandji,” shi mɛtɛ? (Kolosai 1:15; 1 Joani 4:8) Ngandji kaki la Yeso otsha le She lele l’olongo mbaki dikambo diakaleke tshɛ ohomba le nde. (Joani 14:31) Oko wakinde ombetsha, Yeso akɛnya ngandji lo toho tokina tohende. Nde akalangaka akambo wa mɛtɛ wakandetshaka ndo anto wakandetshaka. Nyɛsɔ tɔsɛdingole dimɛna dimɛna akambo ahende asɔ wendana l’ɛnyɛlɔ kakatotshikɛ Yeso.
Ngandji k’oma ko mɔmbɔkɔmbɔla k’akambo wa mɛtɛ waki Nzambi
4. Ngande wakakome Yeso lo monga la ngandji ka wetshelo waki Jehowa?
4 Woho wɔsa ombetsha akambo wetshande ekɔ la shɛngiya ya wolo lo wetshelo ande. Naka nde hɔshi kɛnɛ ketshande la nɛmɔ, kete nd’ambeki ande hawotokiɔsa la nɛmɔ. Yeso akalangaka akambo wa mɛtɛ w’ohomba efula wakandetshaka wendana la Jehowa ndo la Diolelo Diande. Yeso aki la ngandji k’efula k’akambo asɔ. Oko wakinde ombeki, nde aki la woho wa ngandji kɛsɔ. Edja tshɛ kakinde l’olongo, mbut’ate la ntondo ka nde ndjotɔ oko onto, Ɔna ɛtɔi laki Nzambi lakandote aki ombeki waki la nsaki k’efula ka mbeka. L’Isaya 50:4, 5 sho tanaka ɛtɛkɛta ɛnɛ wasungana mɛtɛ wata ɔnɛ: ‘Jehowa Nkum’Olongo ndamɛ ambombisha lolemi l’anto wambetshama, dia dimi mbeya keketsha ɔnɛ lambɔkɔmɔ. Nde atomemulaka pindju tshɛ, atodiholaka atui ami dia vɔ mboka oko anto wambetshama. Nkum’Olongo Jehowa ndamɛ akandjihola atui. Ndo lo wedi ami, dimi kombohedia kana nkalola ɛkɔngɔkɔngɔ.’
5, 6. (a) Kakɔna kakakomɛ Yeso lo batismu kande, ndo dikambo sɔ diaki la shɛngiya yakɔna le nde? (b) Otshikitanu akɔna watanaso lam’asa Yeso nde la Satana lo woho wakawakambe l’Ɔtɛkɛta wa Nzambi?
5 Lam’akandayahamaka lo demba lanɛ la nkɛtɛ, Yeso akatetemala nanga lomba laki Nzambi. (Luka 2:52) Ɔnkɔnɛ, l’etena ka batismu kande, dikambo dimɔtshi dia diambo diakôkomɛ. Luka 3:21 mbutaka di’‘olongo wakadihɔ.’ Ondo l’etena kakadihɔ olongo kɛsɔ, Yeso akakoke mbohɔ lɔsɛnɔ laki lande l’olongo. Oma lâsɔ, nde akasale nshi 40 l’oswe aha la nde ndɛ kana nɔ. Mɛnamaka dia nde tanaka ɔngɛnɔngɛnɔ w’efula lo kana yimba la wetshelo w’efula wakandalongola oma le Jehowa. Koko oshimu kele edja, ngandji kande k’akambo wa mɛtɛ waki Nzambi kakɔtɔ l’ohemba.
6 Etena kakalɛmbɛ Yeso ndo kakandoke ndjala, Satana akayange dia mbohemba. Otshikitanu w’efula wekɔ mɛtɛ lam’asa ana waki Nzambi asɔ ahende! Vɔ akɔ ahende wakashile awui w’oma l’Afundelo w’ase Hɛbɛru koko la tokanyi totshikitanyi. Satana akengesola Ɔtɛkɛta wa Nzambi, nde akakambe lawɔ lo yoho ya kɔlɔ dia ngɛnyangɛnya nsaki yande ya lokaki. Lo mɛtɛ, ɔtɔmbɔki ɔsɔ konangaka akambo wa mɛtɛ waki Nzambi kânga yema. Lo wedi okina, Yeso akashile awui w’oma l’Afundelo la ngandji ka mɛtɛ, lo kamba l’Ɔtɛkɛta wa Nzambi la yambalo tshɛ l’okadimwelo tshɛ wakandashaka. Yeso akatongama edja k’efula la ntondo k’ɛtɛkɛta wakasambiyama ɛsɔ fundama, koko nde akâlɛmiyaka. Vɔ waki akambo wa mɛtɛ w’ohomba efula w’oma le She lele l’olongo! Nde akatɛ Satana di’ɛtɛkɛta w’oma le Jehowa ndeka diangɔ dia ndɛ ohomba efula. (Mateu 4:1-11) Eelo, Yeso akalangaka akambo wa mɛtɛ tshɛ wakawetsha Jehowa. Ko ngande wakandɛnya ngandji kɛsɔ oko wakinde ombetsha?
Ngandji k’akambo wa mɛtɛ wakandetsha
7. Lande na kaki Yeso kotshula wetshelo ande hita?
7 Ngandji ka Yeso k’akambo wa mɛtɛ wakandetshaka kakɛnamaka mbala tshɛ. Otondonga komonga ngasɔ, tshike nde akakoke mɔmbɔla tokanyi tande hita. Nde aki l’ewo ndo la lomba la mamba. (Kolosai 2:3) Koko, mbala la mbala nde akoholaka ampokami ande di’akambo tshɛ wakandetshaka komonga wakinde, koko waki She lele l’olongo. (Joani 7:16; 8:28; 12:49; 14:10) Nde akalangaka akambo wa mɛtɛ waki Nzambi woho w’anyanya, woho ɔnɛ wele takandakokakatshindja akambo asɔ l’ɔkɔngɔ ko tatɛ mbetsha tokanyi tande hita.
8. L’etatelo k’olimu ande, ngande wakasha Yeso ɛnyɛlɔ kendana la ndjaɛkɛ l’Ɔtɛkɛta wa Nzambi?
8 Lam’akatatɛ Yeso kamba olimu ande wa lo sɛkɛ, nde kotshimbatshimba dia mbisha ɛnyɛlɔ. Tende yoho ya ntondo yakandatɛ ekambi waki Nzambi dia nde mbaki Mɛsiya wakalakema. Onde nde akayaɛnya tsho la ntondo k’elui w’anto, ko pomɛ ntolo ɔnɛ dimi kele Kristo, oma lâsɔ ko nde tatɛ sala ahindo wa diambo dia shikikɛ kɛnɛ kakandate? Ndoko. Nde akatshu lo shinangɔnga, lɛnɛ aki ekambi waki Nzambi la mbekelo ka mbadiaka Afundelo. Lɛkɔ nde akadia la dui dia wolo prɔfɛsiya k’Isaya 61:1, 2 ndo akalembetshiya di’akambo wa mɛtɛ wa prɔfɛsiya asɔ wambokotshama le nde. (Luka 4:16-22) Efula k’ahindo wakandasale akɛnya dia Nzambi akosukɛka. Kânga mbakidiɔ ngasɔ, nde akayaɛkɛka l’Ɔtɛkɛta wa Nzambi lo wetshelo ande.
9. Lam’akandatɛkɛtaka l’Afarisɛ, ngande wakɛnya Yeso ngandji ka kɔlamelo kaki lande otsha l’Ɔtɛkɛta wa Nzambi?
9 Lam’akadjana atunyi w’akambo w’ɔtɛmwɛlɔ tâmu vɔ la nde, Yeso kokamba l’ewo kande dia mbaɛnya dia ndoko keyawɔ kânga mbakinde l’akoka wa mbahekoya lo tâmu tawɔ. Koko nde akatshike di’Ɔtɛkɛta wa Nzambi mɛnya kashi kawɔ lo sɛkɛ. Ɛnyɛlɔ, tohɔ dia lam’akate Afarisɛ vate ambeki waki Yeso wambɔnyɔla ɔlɛmbɛ wa lushi la Sabato, lo muna nanula ndo ndjilɛ lam’akawatetaka l’ekambɔ kɛmɔtshi, Yeso akakadimola ate: “Nyu nyatali dikambu diakatshi Davidi lam’akindi la ndjala, ndi la wane waki la ndi?” (Mateu 12:1-5) Lo mɛtɛ, ondo anto asɔ wakayaɔsaka vamɛ oko anto wa losembwe wakadia ɔkɔndɔ wakasambiyama ɔsɔ wele lo 1 Samuele 21:1-6. Naka aki ngasɔ, kete vɔ koshihodia wetshelo w’ohomba waki l’ɔkɔndɔ ɔsɔ. Koko Yeso kopembetɛ tsho lo mbadia ɔkɔndɔ ɔsɔ. Nde akakane la wɔ yimba ndo aketawɔ atɔndɔ wakokaso mbeka oma l’ɔkɔndɔ akɔ. Nde akangɛnangɛna atɔndɔ waketsha Jehowa l’etenyi k’Afundelo kɛsɔ. Ɔnkɔnɛ, nde akakambe l’ɔkɔndɔ ɔsɔ oko ɛnyɛlɔ k’oma l’Ɛlɛmbɛ wa Mɔsɛ dia mɛnya di’Ɛlɛmbɛ wakikɔ ɔlɔlɔ. Woho akɔ wamɛ mbele nganɛ wakayaɛkɛka Yeso la losembwe tshɛ l’Ɔtɛkɛta wa Nzambi akotshutshuya dia mamɛ Ɔtɛkɛta wa Nzambi la ntondo k’ewandji w’ɛtɛmwɛlɔ wakayangaka tshikitanya ɔtɛkɛta akɔ dikambo dia wahɔ awɔ hita wa lokaki kana wanɛ wakayangaka dia mbishɛ ɔtɛkɛta akɔ lo wahɔ wa mbekelo y’anto yaheyama ɔtɛ l’ekolo.
10. Ngande wakakotsha Yeso prɔfɛsiya yendana la wetshelo wa dimɛna?
10 Ngandji ka Yeso k’akambo wa mɛtɛ wakandetshaka kokoka mbokonya pondjo dia mbetsha anto akambo oko onto latawatshanya, mbut’ate lo yoho yakoka nɛndja ampokami kana lo yoho yaheyama ɔtɛ l’ekolo. Prɔfɛsiya yakasambiyama yakate dia Mɛsiya ayotondja ɛtɛkɛta wa ‘ngandji ka mamba oma l’ɛlɔmɔ ande,’ mbut’ate ayokamba la ‘ɛtɛkɛta w’amɛna efula.’ (Osambu 45:2; Etatelu 49:21) Yeso akakotsha prɔfɛsiya shɔ lo mbetɛ losango lande losango la dimɛna ndo lakakatɛ lo timba t’anto, lo kamba ‘l’ɛtɛkɛta wa ngandji ka mamba’ lam’akandetshaka akambo wa mɛtɛ wakandalangaka efula. (Luka 4:22) Aha la tâmu, wangasanu waki lande wakɛnamaka l’elongi kande ndo washo ande wakɛnyaka ngandji ka shikaa kaki lande l’akambo wa mɛtɛ wakandetshaka. Aki mɛtɛ ɔngɛnɔngɛnɔ efula dia mbohokamɛ, ndo ekɔ mɛtɛ ɛnyɛlɔ ka dimɛna efula ka sho ndjela lam’asawolaso l’anto akina akambo wakateke!
11. Bonde kele akoka w’ombetsha waki la Yeso oko ombetsha kombotshutshuya dia monga la lotamanya?
11 Onde eokelo k’efula kaki la Yeso lo kɛnɛ kendana l’akambo wa mɛtɛ waki Nzambi ndo diewo diande dia tɛkɛta akotshutshuya dia monga la lotamanya? Dikambo sɔ mɛnamaka mbala efula le embetsha w’ana w’anto. Koko tohɔ dia Yeso aki la lomba lakɛnyaka wɔma wokande Nzambi. Lomba la woho ɔsɔ hatshutshuya onto dia monga la lotamanya nɛ dia “[lomba] latuyalaka kame la kanga ndjakitshakitsha.” (Tukedi 11:2) Aki dikambo dikina mbakakimanyiya Yeso di’aha monga la lotamanya kana otako.
Yeso akalangaka anto wakandetshaka
12. Ngande wakɛnya Yeso dia nde konanga dia mbokiya ambeki ande wɔma?
12 Ngandji k’efula kaki la Yeso otsha le anto kakɛnamaka tena tshɛ oma lo wetshelo ande. Otshikitanyi la wetshelo w’akanga wa lotamanya, wetshelo waki Yeso kombokiyaka anto wɔma kana mbaɛnya woho walekinde. (Undaki 8:9) L’ɔkɔngɔ wa nde mɛna dihindo dimɔtshi diaki Yeso, Petero akâmbe heyama ko akayakɔsha l’adwe waki Yeso. Koko Yeso kombetawɔ di’ambeki ande mboka wɔma wele kema dimɛna. La ngandji tshɛ nde akatɛ Petero ate, “tukake woma” ndo oma lâsɔ, nde akawewoya olimu wa dimɛna efula wa mbetɛ anto ambeki wayondokamba. (Luka 5:8-10) Yeso akalange di’ambeki ande tshutshuyama la ngandji kawɔ hita k’akambo wa mɛtɛ w’ohomba wendana la Nzambi, koko aha oma lo wɔma w’ombetsha awɔ.
13, 14. Lo toho takɔna takoke Yeso anto kɛtshi?
13 Ngandji kaki la Yeso le anto wakandetshaka kakɛnama nto oma lo kɛtshi kakandawaokaka. “Lam’akandenyi elui w’antu, ndi akawauki ketshi, ne dia vo wakahenyahenyama, ndu kundjala la ekimanyelu, uku ekoko waha la ulami.” (Mateu 9:36) Nde akawaoke kɛtshi lo pâ kaki lawɔ ndo akatshutshuyama dia mbakimanyiya.
14 Tende woho wakɛnya Yeso dionga dia nde dia kɛtshi lo diaaso dikina. Lam’akasukana womoto ɔmɔtshi laki l’ɛkɛlɛlɔ ka dikila oya le nde l’atei wa lemba l’anto ndo kimɛ ohembo ande wa dihɔndɔ, nde akakɔnɔ lo dihindo. Yeso akoke dia yema ya wolo yambotomba oma lo demba diande, koko nde kɔmɛna onto lakakɔnɔ. Nde akasale tshɛ dia mbishola womoto ɔsɔ. L’oyango akɔna? Aha dia mbɔwɔnyɔla lo woho wakandɔnyɔla Ɛlɛmbɛ kana atɔndɔ waki afundji l’Afarisɛ, oko wakinde la woho wa wɔma ɔsɔ. Koko nde akawotɛ ate: “On’ami, mbetawo kaye kambukokonoya; utshu la ki, okono tshe uma lu hemo kaye.” (Mako 5:25-34) Ɛtɛkɛta ɛsɔ mɛnyaka dia nde aki la kɛtshi. Nde kombotɛ tsho ate “okono.” Koko nde akawotɛ ate: ‘Ɔkɔnɔ oma lo hemɔ kayɛ ka wolo.’ Lanɛ Mako akakambe la tshɛkɛta yalembetshiya mɛtɛ mɛtɛ ɔnɛ “oshingɔ,” woho ɔmɔtshi wa lofimbo lakawakambaka lalɔ dia kɔmɔla kana pɛnyahɛnya onto. Ɔnkɔnɛ, Yeso akeye dia hemɔ kande kakawoshaka pâ heyama, ondo kakawoshaka ndo kandji efula lo demba ndo lo yimba. Nde akawoke kɛtshi.
15, 16. Akambo akɔna wakakomɛ Yeso l’olimu ande wɛnya dia nde akayangaka akambo w’ɔlɔlɔ wakasalaka anto?
15 Yeso akɛnya nto ngandji kakandokaka anto lo nyanga waonga w’ɔlɔlɔ waki lawɔ. Tende kɛnɛ kakatombe lam’akandahomana la Natanyɛlɛ, ɔnɛ lakayokomaka ɔpɔstɔlɔ l’ɔkɔngɔ. “Jesu akenyi Natanyele ayayi le ndi, akati dikambu diandi ati: Enda, usi Isariyele mete, laha la lukesu!” Lo dihindo, Yeso akasɛdingola waonga wa l’etei k’otema waki Natanyɛlɛ, ko nde akeye akambo efula wendana la nde. Lo mɛtɛ, Natanyɛlɛ komonga kokele kânga yema. Oko sho tshɛ, nde lawɔ aki la munga yande. Lam’akandoke lokumu la Yeso nde akate la yema ya diɔnyɔ ate: “Engo k’ololo mbeyaka ndja uma la Nazareta uka?” (Joani 1:45-51) Koko kɛnɛ tshɛ kakokaso mbuta lo dikambo diaki Natanyɛlɛ tɔ kɛnɛ: Yeso akadje yimba lo dionga dimɔtshi di’ɔlɔlɔ diaki lande, dionga diakɔ ko losembwe lande.
16 Woho akɔ wamɛ, lam’akaye owandji ɔmɔtshi w’alembe, ondo ose Wodja, mbut’ate ose Rɔma oya le Yeso ndo wakandɔlɔmbɛ dia kɔnɔla ose olimu ande laki la hemɔ, Yeso akeyaka dia ɔsɔlayi ɔsɔ aki otshi w’akambo wa kɔlɔ. Owandji w’alembe wa lo nshi shɔ akakokaka monga la yoho ya lɔsɛnɔ yoludi l’akambo wa kɔlɔ, ɛnyɛlɔ awui wa ngala, odiakanelo, kana monga onto latɛmɔla nzambi ya kashi. Koko Yeso akadje yimba lo dikambo dimɔtshi di’ɔlɔlɔ diaki l’onto ɔsɔ, mbut’ate mbetawɔ ka mamba kaki lande. (Mateu 8:5-13) L’ɔkɔngɔ diko, lam’akatɛ Yeso otshi w’akambo wa kɔlɔ wakawahanɛ suke la nde l’otamba, Yeso kombohangwɛ l’ɔtɛ w’akambo wa kɔlɔ wakandatshaka ntondo, koko akôkeketsha lo mbosha elongamelo kendana la nshi yayaye. (Luka 23:43) Yeso akeyaka dimɛna efula dia naka nde kanɛ anto akina kɔlɔ kana mbaɔnyɔla, kete nde ayowakɔmɔla otema. Aha la tâmu, welo wakandadjaka dia tana dikambo dimɔtshi di’ɔlɔlɔ diele l’anto akina akakeketsha anto efula dia nyomoleka tshikitanya nsɛnɔ yawɔ.
Nde aketawɔ kambɛ anto akina
17, 18. Lo mbetawɔ dia ndja lanɛ la nkɛtɛ, ngande wakɛnya Yeso dia nde akalangaka kambɛ anto akina?
17 Ɛnyɛlɔ kekina ka dimɛna kɛnya ngandji kaki la Yeso otsha le anto wakandetshaka aki woho wakandetawɔka mbakambɛ. La ntondo ka nde ndjoya lanɛ la nkɛtɛ, Ɔna Nzambi akangɛnangɛnaka nshi tshɛ lo dikambo di’ana w’anto. (Tukedi 8:30, 31) Oko wakinde “Ɔtɛkɛta” wa Jehowa kana onyimpala ande, nde akakokaka mbala efula mbɔtɔ la diɔtɔnganelo l’anto. (Joani 1:1) Koko, l’oyango wa ndjetsha anto okoko l’okoko, “ndi akayanya uma lu lutumbu, akayala uku ukambi, akuto lu efanelu k’antu,” nde akatshike dihole diande dia lokumu dia l’olongo. (Filipi 2:7; 2 Koreto 8:9) Lam’akinde la nkɛtɛ, Yeso konongamɛka kana nɔmba di’anto mbokambɛ olimu. Diakɔ diakandate ate: “On’a untu, kundja dia antu mbukambela ulimu, keli akayi dia mbakambela ulimu, la dia mbakimwela lumu landi uku etshungwelu ka antu efula.” (Mateu 20:28) Yeso akakotsha mɛtɛ ɛtɛkɛta ɛsɔ.
18 La ndjakitshakitsha tshɛ, Yeso akakotsha ehomba w’anto wakandetshaka lo ndjasha tshɛ lo wahɔ awɔ. Nde akakindjakindja Nkɛtɛ ya Daka l’ekolo, akasale nkama ya kilɔmɛtɛlɛ lo nkɛndɔ y’esambishelo l’oyango wa sambisha anto efula. Otshikitanyi l’Afarisɛ ndo afundji akanga wa lotamanya, nde aki la ndjakitshakitsha ndo akadjaka anto lo demba. Weho w’anto tshɛ, ewandji, asɔlayi, toshushi, wamato, ana, ase wola, ase hemɔ oyadi kânga anto waki kɔmbɔsamaka la nɛmɔ lo tshunda di’anto wakayaka le nde aha la mboka wɔma. Kânga mbakinde kokele, Yeso aki onto oko sho, ɔnkɔnɛ nde akakokaka nɛmba ndo mboka ndjala. Koko, kânga lam’akandalɛmbaka kana wakandahombaka mumuya ndo w’anto mbotshika ki woho wa nde nɔmba, nde aketshaka ehomba w’anto akina la ntondo ka wakinde hita.—Mako 1:35-39.
19. Ngande wakasha Yeso ɛnyɛlɔ lo salɛ ambeki ande akambo la ndjakitshakitsha, la solo dia lotutsha, ndo la ngandji?
19 Woho akɔ wamɛ mbele Yeso akalangaka kambɛ ambeki ande hita olimu. Nde akasale ngasɔ lo mbowaetsha la ngandji ndo la solo dia lotutsha. Etena kakiwɔ koshihodiaka wetshelo ɛmɔtshi w’ohomba efula esadi, nde kompekɔka, komomalaka kana mbahangwɛ. Nde akatanaka toho tokina ta mbakimanyiya dia vɔ mboka. Ɛnyɛlɔ, ohokanyiya yema woho wakawanaka ambeki ande mbala ko mbala dia mbeya akɔna oleki woke lam’asawɔ. Mbala la mbala, polo ndo l’otsho wakandahombe ndjakema, Yeso akatane toho tokina t’eyoyo ta mbowaetsha woho wa vɔ mbeya salanɛ akambo la dionga dia ndjakitshakitsha. Lo kɛnɛ kendana l’okitshakitsha, ndo l’akambo akina, Yeso akakoke mɛtɛ mbuta ɔnɛ: ‘Lambonyosha ɛnyɛlɔ ka nyu ndjela.’—Joani 13:5-15; Mateu 20:25; Mako 9:34-37.
20. Yoho yakɔna ya wetshelo yakakambe la Yeso yakotshikitanya l’Afarisɛ, ndo lande na kele yoho ya wetshelo shɔ yaki l’etombelo w’ɔlɔlɔ?
20 Tolembete dia Yeso kombutɛ tsho ambeki ande ele ɛnyɛlɔ, koko nde ‘akawasha ɛnyɛlɔ.’ Nde akawaetsha lo mbasha ɛnyɛlɔ. Nde kɔtɛkɛta la wɔ la diɔnyɔ, watekana oko nde akaleke akambo wakandawatɛka dia sala ohomba. Ngasɔ mbakasalaka Afarisɛ. “Vo watusambishaka, keli hawutshi.” (Mateu 23:3) La ndjakitshakitsha tshɛ, Yeso akɛnya ambeki ande kɛnɛ kalembetshiya ndjaɔtɔnganyiya la wetshelo ande lo ndjaɔtɔnganyiya ndamɛ la wetshelo akɔ. Diakɔ diele, lam’akandalɔmbɛ ambeki ande dia monga la lɔsɛnɔ l’ɔsɛlɛngɛ, mbut’ate aha ndjamɔtshɛ lomombo la l’emunyi, vɔ wakashihodia esadi eto kɛnɛ kalembetshiya dikambo sɔ. Vɔ wakakoke mɛna mɛtɛ k’ɛtɛkɛta ande w’ɔnɛ: “Mbulu yeko la afuku, fudu ya l’ulungu yeko la kefu, keli On’a untu kema la lama mbetamia ote andi.” (Mateu 8:20) La ndjakitshakitsha tshɛ Yeso akakambɛ ambeki ande olimu lo mbasha ɛnyɛlɔ ka vɔ ndjela.
21. Kakɔna kayotɔsɛdingola lo sawo diayela?
21 Aha la tâmu, Yeso aki Ombetsha woleki woke wele ndoko onto lakɛdima la nde lanɛ la nkɛtɛ! Akanga w’etema w’ɛlɔlɔ, wanɛ wakɛnaka kɛnɛ kakandasalaka ndo wakokaka awui wakandataka wakɛnyi woho wakandalangaka akambo wakandetshaka ndo anto wakandetshaka. Dikambo sɔ mɛnamaka ɛlɔ kɛnɛ le so sho wanɛ weka ɛnyɛlɔ kakandatshike. Ngande wakokaso ndjela ɛnyɛlɔ ka kokele kakatotshikɛ Kristo? Dui sɔ mbayotɔsɛdingola lo sawo diayela.
Ngande wayoyokadimola?
• Naa etshina ka wetshelo wa dimɛna, ndo onto akɔna lakasha ɛnyɛlɔ lo dikambo sɔ na?
• Lo toho takɔna takɛnya Yeso ngandji k’akambo wa mɛtɛ wakandetshaka?
• Ngande wakɛnya Yeso ngandji kakandokaka anto wakandetshaka?
• Naa bɛnyɛlɔ diɛnya woho waketawɔka Yeso kambɛ anto wakandetshaka la ndjakitshakitsha tshɛ?
[Osato wa lo lɛkɛ 8]
Ngande wakɛnya Yeso dia nde akalangaka atɔndɔ wele l’Ɔtɛkɛta wa Nzambi?