Têle Onyaso dia Nde Ndjela Onto Loleki Woke
1 Lo ndjela Mateu 5:14, Yeso akatɛ ambeki ande ate: “[Osase a, NW] wa la kete mbenyu.” Vɔ wakahombe tɛkɛta l’ahole tshɛ dikambo dia Diolelo diaki Jehowa ndo dia tɛdikɔ tolodi la ngandji takandɔshi lo dikambo dia panda, oma lo tshimbo ya Yeso. Tele la lotumu lɔsɔ lo yimba yaso, mbayotosha anto dibuku Le plus grand homme de tous les temps lo Mam’ɛkɔngɔ la Tange. Toho tɔmɔtshi tayotolanga ndjela ondo tɔ tɔnɛ.
2 L’ɔkɔngɔ wa sho ndjalowola, sho mbeyaka mbuta ɔnkɔnɛ l’ɛtɛkɛta aso shɔamɛ:
◼ “Anto efula ndjambolaka woho akɔna w’onto waki Yeso lo nshi yakinde la lɔsɛnɔ la kɛtɛ. Oko akanayɛ, lo akambo akɔna wakandatshikitana l’anto akina? [Tshikɛ onto akɔ etena akadimole.] Dibuku nɛ dia dimɛna, Le plus grand homme de tous les temps, kɔndɔlaka akambo wa weke wa lo lɔsɛnɔ lande ndo w’olimu ande ndo diɔ tokimanyiyaka dia sho mbeya woho akɔna w’onto wakinde. L’ɔkɔngɔ wa vɔ diala, anto amɔtshi wakayaoke dia vɔ waya kâmɛ lande, wambɛna lande pâ, ndo wamboyala amɛnyi w’olimu ande.” Kotola yambalo y’onto akɔ lo sango dia ntondo diele lo dibuku lɛnɛ ele ɔtɛ wa dui wa dibuku. L’ɔkɔngɔ diko ɛnyande mbɔtwɛlɔ, ndo ala odingɔ wa hende wele l’ɔtɛ a dui wahɔnyi wata ɔnɛ: “Apprenons à le connaître bien.” Naka onto akɔ ambɛnya saki, towosha dibuku.
3 Sho mbeyaka mbuta kânga ɔnɛ:
◼ “Lo menda akambo tshɛ wa kɔlɔ watomba l’ahole suke la tshɛ l’andja ɔnɛ, ondo anto amɔtshi ndjambolaka dia kana Yeso ndjakiyanyaka mɛtɛ lo dikambo diaso. Ko wɛ akanayɛ lo dikambo sɔ na?” Tshikɛ onto akɔ dihole akadimole. Fola dibuku Le plus grand homme lo tshapita 24 ndo ɛnyande lo tshena pe lande na kakaye Yeso lanɛ la kɛtɛ. L’ɔkɔngɔ ala Joani 15:13 dia mbika epole ɔsɛkɛ lo ngandji ka l’otema ɔtɔi koka Yeso anto akina. Todje yimba dia ndjalaka la periodikɛ yeke ka tomba, biukubuku kana kiatshikatshi yasungana, dia ndjiɛnya onto akɔ naka nde hɔshi dibuku.
4 Yoho kina yɔ nyɛ:
◼ “Ɛlɔngɔlɔngɔ efula wekɔ lo nyanga ɛnyɛlɔ ka vɔ ndjela, koko diɛnyɛlɔ di’ɛlɔlɔ hadioleke tanema. Yeso Kristo akatotshikɛ sho tshɛ ɛnyɛlɔ ka kokele. [Ala 1 Petero 2:21.] Lɔsɛnɔ lande l’otondo lakalɔmbwamaka l’ɔtɛmwɛlɔ wakandatɛmɔlaka She lele l’olongo. Oko akanayɛ, dikambo diakɔna diayotomba naka anto ndjatshutshuya efula dia mbokoya na?” Totshike onto akɔ etena akadimole. Sɛdingola odingɔ wa sato wele lo lɛkɛ la ntondo la dikatshi dia komelo, lɛnɛ ofundami waonga wa Yeso. Lembetshiyande woho wokoki dibuku Le plus grand homme kimanyiya onto l’onto la l’atei aso dia sho ndjâla Akristo w’eshika.
5 Ondo tayolanga kamba la kanyi mɔtshi yele oko nyɛ:
◼ “Lam’atɛkɛtawɔ dikambo dia Yeso Kristo, anto efula mbɔ̂saka oko ɔna ashashi, kana onto lakawakawa la nyɔi. Kanyi yele lawɔ lo dikambo dia Yeso pembetɛka lo eotwelo kande la lo nyɔi kande. Mbala efula, hawotodimulaka akambo w’ɔlɔlɔ efula wakandate la wakandasale lo nshi ya lɔsɛnɔ lande. Kɛnɛ kakandasale mendanaka l’anto tshɛ waki la lɔsɛnɔ. Diɔ diakɔ diele ekɔ ohomba efula dia sho nyanga dia mbeya kɛnɛ tshɛ k’endana la dikambo diakandatosalɛ dia diambo efula.” Ala Joani 17:3. Ɛnyande lɛkɛ la ntondo la mbɔtwɛlɔ ka dibuku Le plus grand homme ko wɛ mbala odingɔ wa nɛi. Shikikɛnde dia nde kokaka ndjâla la dibuku diakɔ ndo ɛnyande woho wakamba ladiɔ lo wekelo w’onto ndamɛ.
6 Todje yimba dia nembetɛ saki kɛnyami ndo ekanda wotshikiso, dia sho ndjosala waendelo w’eyoyo. Kam’eke etena, toyangeyange anto wele l’etema w’ɔlɔlɔ l’ohetoheto tshɛ ndo takimanyiya dia vɔ ndjâla ambeki wa Oshimbedi aso, Yeso Kristo.—Mat. 16:24.