Tokondja Ɛlɔlɔ Watomba Oma lo Alako wa lo Sɛkɛ Wambovusɔma
1 Ɔkɔndɔ wa nshi nyɛ w’Ɛmɛnyi wa Jehowa wekɔ lo mbutama lo tshena pe lo yoho yasungana lo Tukedi 4:18 ɔnɛ: “Kele mbuka k’untu ololo keli uku usasi w’ehutwelu k’unya, watufulanelaka edja ndu w’unya l’atei ote.”
2 Lo ndjela ɔtɛkɛta ɔsɔ, etshumanelo k’Akristo kekɔ lo tetemala la kondja esase weke ka tomba ndo elembetshiyelo w’eyoyo w’endana la wetshelo w’oma lo Bible. (Mat. 24:45-47) Aha la tamu, wɛ kokaka shila diɛnyɛlɔ di’eshika diakayalembetɛ tatɛ lakayɔtɔ l’ɔnɔngɔ w’Ɛmɛnyi wa Jehowa. Osase wa mɛtɛ wekɔ lo tafulanela, ndo sanganya ya l’etshumanelo, oko alako wa lo sɛkɛ, tokimanyiyaka dia sho tayelaka ofulanelo w’osase akɔ.
3 Ekongelo k’Alako Wambovusɔma: La Société eke ka nɔngɔsɔla ekongelo k’alako efula wa lo sɛkɛ nto. Vɔ wekɔ l’elembetshiyelo efula w’eyoyo, ndo tokanyi t’ehomba efula takɔmbwama hwe. Dia etshumanelo kondja ɛlɔlɔ tshɛ w’elembetshiyelo ɛsɔ w’eyoyo, anangɛso wanɛ washa alako wa lo sɛkɛ kawodjake yimba dia kambaka l’ekongelo ka nshi nyɛ.
4 Naka nyu nangaka kondja ɛlɔlɔ tshɛ watomba oma lo alako wa lo sɛkɛ asɔ, nyodje yimba l’ɛtɛ w’awui w’alako wahomba mbishama. La ntondo ka wɛ mbɔtɔ lo losanganya l’anto tshɛ, hemba dia ndjaohola tokanyi ta ndjihelo takewoyama lo dikambo sɔ l’ekanda waki la Société. L’ɔkɔngɔ, lam’ayolongaka, wɛ ayoteyaka kɛnɛ kayanga ombahemi a loseke mbuta. Funda awui amɔtshi naka mɛtɛ yakɔ shɔ yambolakanyema lo yoho y’oyoyo dia wɛ ndjokamba layɔ nshi yayaye. Ɔsɔku mbayoyashikikɛ dia kondja ɛlɔlɔ tshɛ w’oma l’ekongelo k’alako wambovusɔma.
5 Alako wa lo Sɛkɛ Pombaka Mbisha Anto Wetshelo ndo Mbatshutshuya: Lam’akatɛkɛtaka Yeso, nde akanandaka etema w’ampokami ande. Ɔnkɔnɛ mbalaso lo Mateu 7:28 ɔnɛ lam’akandashidiya Dako diande dia lo dikona, dako diakaleke mbeyama oleki alako akina tshɛ wamboshama, “elui a waki w’antu wakambi dia wetshelu andi.”
6 Oko wewɔ l’ɛnyɛlɔ ka Yeso kɛsɔ lo yimba, olui wa dikumanyi wayongaka la shɛnɔdi etena kasɔnawɔ ambahemi a loseke w’eyoyo dia mbisha alako wa lo sɛkɛ, lo mbɔsaka paka wanɛ wele embetsha w’eshika, wayela ekongelo kaki la Société lo nna ndo lo nna, ndo wele l’akoka wa kotolaka yambalo y’ampokami. Anangɛso wanɛ wele la diɛsɛ dia mbishaka alako wa lo sɛkɛ pombaka ndjatshutshuyaka tena tshɛ dia ndowanya yewo yawɔ ya ndakanya, lo mbetawɔka alako tshɛ l’elakanyelo tshɛ walongolawɔ oma le dikumanyi.
7 Oko akataditshi Isaya 65:13, 14, ɔngɔnyi wa lo nyuma w’ekambi wa Nzambi mɛnamaka nshi tshɛ. Alako wa lo sɛkɛ ekɔ ekimanyielo kɛmɔtshi l’atei wa nɛ diatetɛ anto ‘waketshama le Jehowa.’—Is. 54:13.