Tokondja ɛngɛnɔngɛnɔ tshɛ watomba oma lo dako dia lo sɛkɛ diashama l’etshumanelo kakiso
1 Ambeta ɛnɔnyi ɛmɔtshi, ɔlɔngɔlɔngɔ ɔmɔtshi akakondja dikatshi dia lêta lo sanganya ya l’etshumanelo ka lo dihole diakɔ. Lam’ele nde akatayangaka mɛtɛ, nde ak’ɔsɛ yɛdikɔ dia tolonga dako dia lo sɛkɛ ko lushi lakɔ la lomingu. Nde akakome lo Mbalasa wenya efula la ntondo ka losanganya tatɛ. Opandjudi ɔmɔtshi ak’olongola la wangasanu ndo, lam’akawasawolaka, opandjudi akɔ akɔlɔmbɛ dia mbekaka lande Bible koko nde akatone. Koko, ɔlɔngɔlɔngɔ ɔnɛ akâmbe efula dia kɛnɛ kakatama lo dako dia lo sɛkɛ, diakalɔngɔswama dimɛna efula, ko nde akatshikitanya tokanyi tande: l’ɔkɔngɔ wa losanganya, nde ak’etawɔ dia mbeka. Nde akahame esadi esadi ndo akalongola batismu l’ɔkɔngɔ a ngɔndɔ mɔtshi. Sho kokaka kondja oko wetshelo esato lo dikambo sɔ.
2 Ntondotondo, lêta lakasalema dikambo dia dako dia lo sɛkɛ. Onde sho mbetaka anto wahomana laso ndo mbatɛka dikambo dia sanganya ya l’etshumanelo kaso oka? Etena katoshaka ɔlɔmbɔdi ɔtɛ wa dako dia lo sɛkɛ dia lomingu layaye, tokanyiya anto wele lo mbilo kaso weyaso ɔnɛ dui diakɔ ayokotola yambalo yawɔ lo woho wa laande, oyadi vɔ mbadiaka ekanda aso kana kema. Anto amɔtshi hawolange mbadia, kana wekɔ l’okakatanu efula lo wadielo, koko ondo vɔ wayɔngɛnangɛna nonga dako di’oma lo Bible.
3 Kahende, ɔlɔngɔlɔngɔ akalongɔma la wangasanu. Naka tayodja yimba dia koma lo Mbalasa ntondo ka losanganya tatɛ, kete tayokoka memula anangɛso l’akadiyɛso ndo anto wakangɛnyingɛnyi dia ndja. (Heb. 10:24) Naka onto ɔmɔtshi amboya mbala ka ntondo, ondo nde heye kɛnɛ kay’eta. Tôlembetshiya ɔnɛ sanganya yaso tatɛka l’osambu ndo la dɔmbɛlɔ, ndo towote woho way’eta losanganya lakɔ. Naka sunganaka, tow’ete dia ndjodjasɛ suke laso dia nde ndjelaka lo Bible kaso la lo dibuku diaso di’esambu. Tɔ̂lɔmbɛ dia nde tombola wembola wayowoyɛ lo yimba.
4 Kasato, dako diakalɔngɔswama dimɛna efula. Wanɛ wele la diɛsɛ dia ndjâla l’ɔtɛ w’etshumanelo oko ambahemi a loseke mbetshaka wenya efula lo ndjalɔngɔsɔla ndo lo vusola dia tshutshuya ampokami dia vɔ nyomoleka mɛnya ngandji ndo sala etsha w’ɛlɔlɔ. Sho tshɛ tekɔ lo mɛna paa ya nshi nyɛ, ndo akambo wa mɛtɛ washa ekeketshelo wotumbi oma lo Dui dia Nzambi wekɔ kɛnɛ kahombaso mɛtɛ dia sho kimanyiyama woho wa mbikikɛ. Mɛtɛ, dako mbeyaka monga l’elakanyelo efula, ko naka hatohoke lutui ɔlɔlɔ kete diɔ hadiotonga la wahɔ le so. Onde tekɔ l’okakatanu lo pokɛ lutui etena kashama dako oka? Ondo ayonga ohomba funda towui wui tɔmɔtshi oko atotosalaka tena efula lo sanganya ya weke. Todje yimba dia ndjela lo Bible kaso divɛsa tshɛ diadiemi ndo diɔmbwami.
5 La Société akalɔngɔsɔla alako wa lo sɛkɛ lo weoho w’asawo efula wotumbi oma lo Bible. L’ekimanyielo k’omendji walɔmbɔla kana k’ɔnangɛso ɔmɔtshi lakatomama oma le nde, olui wa dikumanyi kongɛka pɔlɔngalamɛ ka dako dia lo sɛkɛ. Alako wele la Société mbatoma ekongelo kawɔ, wakasɔnama lo menda ehomba w’etshumanelo. Aha sho pandja ndoko ɔtɔi a l’atei w’alako w’ohomba asɔ, ndo tokondja ɛngɛnɔngɛnɔ tshɛ w’oma lo dako dia lo sɛkɛ diashama lomingu la lomingu.