Nsanganya ‘yatshutshuya lo ngandji ndo lo etsha w’ɛlɔlɔ’

L’EDJA ka ntambe efula, ekambi wa Jehowa wokosanganaka lo yoho yokongɛmi. Lo Isariyɛlɛ w’edjedja, apami tshɛ wakatshɔka la Jɛrusalɛma lo fɛtɛ shato ya weke. (Eoh. 16:16) Lo ntambe ka ntondo, Akristo wakasanganaka mbala la mbala, tena efula lo mvudu y’anto amɔtshi. (Filɛ. 1, 2) Ɛlɔ kɛnɛ, sho salaka nsanganya ya l’etshumanelo ndo nsanganya ya weke. Lande na kasangana ekambi waki Nzambi? Ntondotondo, nɛ dia ɔsɔ ekɔ dui di’ohomba efula dia l’ɔtɛmwɛlɔ aso.​—Os. 95:6; Kɔl. 3:16.

² Ndo nto, wanɛ wɔtɔ lo nsanganya kondjaka wahɔ oma lɔkɔ. Lo kɛnɛ kendana la Fɛtɛ k’esambele tshɛ ka Totombotombo, wakadjangɛ ase Isariyɛlɛ ɔnɛ: “Kanyosanganyake anto kaamɛ, apami, wamato, ana ndo ɔngɛndangɛnda wodjashi lo esomba anyu dia vɔ mpokamɛ ndo mbeka ndo mboka Jehowa Nzambi kanyu wɔma ndo dia ndjalama dia nkitanyiya awui tshɛ w’Ɛlɛmbɛ ɛnɛ.” (Eoh. 31:12) Lo mɛtɛ, ɔkɔkɔ w’ohomba wasanganaso ele dia ‘mbetshama oma le Jehowa.’ (Isa. 54:13) Nsanganya mbishaka nto diaaso dia mbeya onto l’onto lam’asaso, dia nongola ekeketshelo ndo dia nkondja wolo waya oma lo monga kaamɛ l’anto akina.

NSANGANYA YA LO ETSHUMANELO

³ Ambeki wa Yeso wakasangana l’ɔkɔngɔ wa Pɛntɛkɔsta ka 33 T.D. wakayasha tshɛ lo wetshelo w’apɔstɔlɔ “ndo lushi la lushi, vɔ wakasanganaka lo tɛmpɛlɔ l’oyango waamɛ.” (Ets. 2:42, 46) L’ɔkɔngɔ diko, etena kakasanganaka Akristo dia ntɛmɔla, vɔ wakadiaka efundelo wakasambiyama mbidja ndo mikanda wakafunde apɔstɔlɔ ndo ambeki akina w’Akristo. (1 Kɔr. 1:1, 2; Kɔl. 4:16; 1 Tɛs. 1:1; Jak. 1:1) Vɔ wakasanganaka nto dia nɔmba kaamɛ. (Ets. 4:24-29; 20:36) Tena dimɔtshi, wakakɔndɔlaka awui wakahomanaka la waa misiɔnɛrɛ l’esambishelo. (Ets. 11:5-18; 14:27, 28) Wakasɛdingolaka wetshelo wa lo Bible ndo ekotshamelo ka prɔfɛsiya yakasambiyama. Wetshelo wakashamaka lo awui wendana la lɔkɛwɔ l’Okristo letawɔma ndo lo kɛnɛ kendana la omamemelo le Nzambi. Anto tshɛ wakakeketshamaka dia monga apandjudi wa lokumu l’ɔlɔlɔ wele l’ohetoheto.​—Rɔmɔ 10:9, 10; 1 Kɔr. 11:23-26; 15:58; Ɛf. 5:1-33.

⁴ Lo nshi yaso nyɛ, nsanganya y’Akristo ndjelaka ɛnyɛlɔ ka nyɛ yakasalaka apɔstɔlɔ. Sho kitanyiyaka dako diakasambiyama diele lo Hɛbɛru 10:24, 25 diata ɔnɛ: “Nyɛsɔ todjanake yimba . . . , tatotshikake sanganaka kaamɛ oko wele mbekelo k’anto amɔtshi, koko tokeketshanake lam’asaso ndo toleke nsala dikambo sɔ oko wɛnanyu dia lushi lakɔ laya suke.” Lo nshi ya paa y’ekomelo nyɛ, tekɔ l’ohomba w’ekeketshelo kaya oma lo sanganaka mbala la mbala dia sho nama wolo aso wa lo nyuma ndo olowanyi aso w’Okristo. (Rɔmɔ 1:11, 12) Oko weso Akristo, tekɔ lo nsɛna l’atei wa lɔlɔnga la wɛngɛngɛ ndo la kɔlɔ. Sho tambotona awui wa kɔlɔ ndo nsaki y’andja ɔnɛ. (Flpɛ. 2:15, 16; Tito 2:12-14) Lo mɛtɛ, lende ahombaso monga naka aha l’atei w’ekambi wa Jehowa? (Os. 84:10) Ndo kakɔna kakoka monga dimɛna le so ko ndeka mbeka ndo nkɛtshanya Ɔtɛkɛta wa Nzambi? Nyɛsɔ tɔsɛdingole nsanganya mɔtshi yakalɔngɔsɔma lo wahɔ aso.

LOSANGANYA LA LO WIKƐNDƐ

⁵ Etenyi ka ntondo ka losanganya la lo wikɛndɛ ekɔ sawo dia lo sɛkɛ di’oma lo Bible diakalɔngɔswama djekoleko lo wahɔ w’anto tshɛ, wele amɔtshi mbeyaka monga mbala kawɔ ka ntondo ka mbɔtɔ lo losanganya. Sawo dia lo sɛkɛ diekɔ ohomba efula nɛ dia diɔ kotshaka ehomba wa lo nyuma oyadi w’eyoyo kana wa apandjudi wa l’etshumanelo.​—Ets. 18:4; 19:9, 10.

⁶ Kristo Yeso, apɔstɔlɔ ande ndo wanɛ waki kaamɛ la wɔ wakashaka asawo wa lo sɛkɛ wele oko wanɛ washama ɛlɔ kɛnɛ lo tshumanelo di’ekambi wa Jehowa. Aha la taamu, Yeso aki ɔtɛkɛtshi wa lo sɛkɛ wakaleke tshɛ lo nkɛtɛ k’otondo. Akatama lo dikambo diande ɔnɛ: “Ndooko onto lakatɔtɛkɛta ngasɔ.” (Jni. 7:46) Yeso akatɛkɛtaka la lowandji tshɛ ndo dui sɔ diakambiyaka ampokami ande. (Mat. 7:28, 29) Anto efula waketawɔka wetshelo ande wakakondjaka ɛlɔlɔ efula. (Mat. 13:16, 17) Apɔstɔlɔ wakayelaka ɛnyɛlɔ kande. Lo Etsha 2:14-36, sho mbadiaka sawo dia lɔɔka diakasha Petero lushi la Pɛntɛkɔsta ka 33 T.D. L’ɔkɔngɔ wa vɔ mpokamɛ sawo sɔ, nunu di’anto diakatshutshuyama dia mbɔsa yɛdikɔ. L’ɔkɔngɔ diko, anto akina wakayokomaka ambetawudi l’ɔkɔngɔ wa vɔ mpokamɛ sawo diakasha Pɔɔlɔ la Atɛna.​—Ets. 17:22-34.

⁷ Woho akɔ waamɛ mbele ɛlɔ kɛnɛ, miliyɔ y’anto kondjaka wahɔ oma l’asawo wa lo sɛkɛ washama lomingu la lomingu lo tshumanelo ndo asawo wa lo sɛkɛ washama lo nsanganya ya weke. Asawo asɔ tokimanyiyaka dia ntetemala mbidja yambalo lo wetshelo w’Akristo ndo dia sho ntetemala lo olimu wa Diolelo. Lo mbelɛka anto wayasha kana anto lo tshɛ kawɔ, tayokimanyiya efula di’anto mbeya wetshelo w’etatelo wa lo Bible.

⁸ Asawo wa lo sɛkɛ wekɔ la ɛtɛ w’awui wotshikitanyi. Asawo amɔtshi mendanaka la wetshelo ndo prɔfɛsiya ya lo Bible, atɔndɔ ndo alako wa l’Afundelo wendana la lɔsɛnɔ la nkumbo, atshukanyi, ekakatanu wahomana l’ɛlɔngɔlɔngɔ l’esekaseka kana awui wendana la lɔkɛwɔ l’Okristo. Asawo akina ndekaka ntɛkɛta dikambo di’elimu wa diambo w’etongelo ka Jehowa. Asawo akina nto tɛkɛtaka dikambo dia mbetawɔ, dihonga ndo ɛnyɛlɔ k’olowanyi k’anto watɛkɛtama lo Bible ndo ndeka ndjasha lo wetshelo wakokaso nkondja nshi nyɛ.

⁹ Dia nkondja wahɔ tshɛ lo tshɛ oma l’asawo wa lo sɛkɛ, ekɔ ohomba dia mpokamɛ la yambalo tshɛ, nyanga avɛsa washila ɔtɛkɛtshi, ndjela wadielo awɔ ndo elembetshielo washama. (Luka 8:18) Lo nsala ngasɔ, tayosala tshɛ dia nkukutɛ kɛnɛ kekaso ndo nkamba la tɔ.​—1 Tɛs. 5:21.

¹⁰ Naka atɛkɛtshi wekɔ efula, kete aha la taamu sawo dia lo sɛkɛ diayoshamaka l’etshumanelo lomingu tshɛ. Dui sɔ koka salema lo mbelɛka atɛkɛtshi w’angɛndangɛnda w’oma lo tshumanelo diele suke. Naka atɛkɛtshi bu efula, kete asawo wa lo sɛkɛ asɔ wayoshamaka lo yɛdikɔ yakoka.

¹¹ Etenyi ka hende ka losanganya la lo wikɛndɛ ekɔ Wekelo wa Tshoto y’Etangelo, ɔkɛtshanyelo wa ambola la ekadimwelo wa asawo watomba lo Tshoto y’Etangelo ya wekelo. Lo tshimbo ya Tshoto y’Etangelo, Jehowa toshaka mbo ya ndɛ ya lo nyuma l’etena kahombama.

¹² Asawo wa wekelo mendanaka mbala la mbala la woho wa nkamba la atɔndɔ wa lo Bible lo lɔsɛnɔ la lushi la lushi. Vɔ keketshaka Akristo dia ndɔshana la “yimba y’andja ɔnɛ” ndo la lɔkɛwɔ la mindo. (1 Kɔr. 2:12) Tshoto y’Etangelo kimanyiyaka dia mpamia osase wendana la wetshelo wa lo Bible ndo la prɔfɛsiya, dui sɔ kimanyiyaka anto tshɛ diaha vɔ ntshikala l’ɔkɔngɔ lo kɛnɛ kendana l’akambo wa mɛtɛ ndo dia vɔ ntshikala lo mboka k’anto w’ɛlɔlɔ. (Os. 97:11; Tok. 4:18) Naka sho mbɔtɔka ndo mbishaka kɔmatɛrɛ lo Wekelo wa Tshoto y’Etangelo, kete kɛsɔ koka tokimanyiya dia ngɛnangɛnaka elongamelo k’andja w’oyoyo wa losembwe wa Jehowa. (Rɔmɔ 12:12; 2 Pe. 3:13) Nsanganya y’Akristo tokimanyiyaka dia nkɛnɛmɔla olowa wa nyuma ndo dia nkeketsha nsaki kaso ka kambɛ Jehowa l’ohetoheto. (Ngal. 5:22, 23) Sho keketshamaka dia mbikikɛ ehemba ndo mpika “etshina k’ɔlɔlɔ ka lo nshi yayaye” dia sho “nkukutɛ lɔsɛnɔ l’oshika.”​—1 Tim. 6:19; 1 Pe. 1:6, 7.

¹³ Ngande wakokaso nkondja wahɔ tshɛ lo tshɛ lo yɛdikɔ shɔ yakɔsama dia sho ndeshamaka lo nyuma? Sho pombaka nɔngɔsɔlaka wekelo la ntondo, oyadi l’onto ndamɛ kana oko nkumbo ndo nyangaka avɛsa woshilami ndo lo mbishaka kɔmatɛrɛ l’ɛtɛkɛta aso hita wonya wa wekelo. Kɛsɔ kayoshikikadia akambo wa mɛtɛ l’etema aso ndo anto akina wayokondja wahɔ etena kokawɔ ɛtɛkɛta wendana la mbetawɔ watondjaso. Lo pokamɛka la yambalo tshɛ kɔmatɛrɛ yasha anto akina, tayokondjaka wahɔ lomingu tshɛ oma lo sawo diekama.

LOSANGANYA LA L’ATEI WA LOMINGU

¹⁴ Etshumanelo sanganaka lomingu tshɛ lo Mbalasa ka Diolelo lo losanganya lele l’ɔtɛ a dui ɔnɛ: Lɔsɛnɔ ndo olimu aso w’Okristo. Losanganya lɔsɔ lekɔ la tenyi sato diakalɔngɔsɔma dia tokimanyiya dia sho monga ekambi waki Nzambi wele la “akoka wahombama.” (2 Kɔr. 3:5, 6) Ekongelo ndo awui wayekamaka wayotombaka ngɔndɔ tshɛ lo Lɔsɛnɔ ndo olimu aso w’Okristo​—Dikatshi dia losanganya. Dikatshi dia losanganya la Lɔsɛnɔ ndo olimu diekɔ nto la bɛnyɛlɔ di’asawo diakamba la diɔ l’olimu w’esambishelo.

¹⁵ Etenyi ka ntondo ka losanganya lɔsɔ kele l’ɔtɛ a dui ɔnɛ: Akambo w’ohomba w’oma l’Ɔtɛkɛta wa Nzambi, ayotokimanyiya dia sho mbekesanɛ la ɛkɔndɔ wa lo Bible ndo tɛnya woho wakokaso nkamba la wɔ. Losanganya lɔsɔ lekɔ ndo la sawo, wadielo wa Bible ndo ɔkɛtshanyelo w’oma lo wadielo wa Bible wa lomingu la lomingu. Dikatshi dia losanganya la Lɔsɛnɔ ndo olimu diekɔ la esato ndo ambola wakimanyiya dia ntshimola ɛkɔndɔ akɔ dimɛna dimɛna. Ɔsɛdingwelo wa lotshimola wa Bible ɔsɔ ekɔ ohomba lo lɔsɛnɔ laso l’onto ndamɛ, lo wetshelo aso dia sho monga “l’akoka tshɛ ndo la kɛnɛ tshɛ kahombama dia nsala olimu w’ɔlɔlɔ tshɛ.”​—2 Tim. 3:16, 17.

¹⁶ Etenyi ka hende ka losanganya lɔsɔ kele l’ɔtɛ a dui ɔnɛ: Yasha l’olimu w’esambishelo, kakalɔngɔsɔma dia mbisha anto tshɛ diaaso dia vɔ ndjalowanya dikambo di’esambishelo ndo dia pamia akoka awɔ wa nsambisha ndo wa mbetsha. Laadiko di’asawo w’ambeki, tovidɛo ta bɛnyɛlɔ di’asawo sɛdingɔmaka. Etenyi ka losanganya kɛnɛ tokimanyiyaka dia monga la “lolemi la anto wetshama” woho wa sho “mbeya woho wa nkadimola ɔnɛ lambɔlɛmba la tshɛkɛta ya dimɛna.”​—Isa. 50:4.

¹⁷ Etenyi ka sato ka losanganya lɔsɔ kele l’ɔtɛ a dui ɔnɛ: Lɔsɛnɔ l’Okristo, mɛnyaka woho wahombaso nkamba l’atɔndɔ wa lo Bible lo lɔsɛnɔ la lushi la lushi. (Os. 119:105) Etenyi kɛmɔtshi k’ohomba ka l’etenyi ka losanganya kɛnɛ ele Wekelo wa Bible wa l’etshumanelo. Vɔ salemaka la ambola la ekadimwelo woho wasalema Wekelo wa Tshoto y’Etangelo.

¹⁸ Ngɔndɔ tshɛ, etena kakoma Dikatshi dia losanganya la Lɔsɛnɔ ndo olimu, ɔnɔmbɔdi w’olui wa dikumanyi kana ekumanyi kekina kawokimanyiya disɛdingolaka dimɛna dimɛna ndo salaka ekongelo. Lomingu tshɛ, ekumanyi kɛmɔtshi kele ombetsha wele l’akoka ndo kakasɔnama oma le olui wa dikumanyi ayɔlɔmbɔlaka losanganya. L’atei w’ɛkɛndɛ ande mbele ndo ndjashikikɛ dia losanganya ntatɛ ndo nkomɛ la wonya, mandola ndo mbisha wanɛ wasala ɛkɛndɛ w’ambeki alako.

¹⁹ Etena kayotoyalɔngɔsɔlaka mbala la mbala, kayotɔtɔka ndo kayotoshaka kɔmatɛrɛ lo losanganya la Lɔsɛnɔ ndo olimu aso, tayokondja ewo k’Afundelo, tayoshihodia dimɛna atɔndɔ wa lo Bible, tayonga l’eshikikelo ka nsambisha lokumu l’ɔlɔlɔ ndo la diewo dia mbetɛ anto ambeki. Wanɛ wele watakome Ɛmɛnyi wambobatizama wɔtɔ lo losanganya lɔsɔ kondjaka ndo vɔ nto wahɔ oma lo lɔngɛnyi la wangasanu ndo oma lo ɛkɛtshanyelo wa lo nyuma wakeketsha. Dia tokimanyiya dia sho ndjalɔngɔsɔla lo kɛnɛ kendana la losanganya lɔsɔ ndo nsanganya nkina, sho koka nkamba la Watchtower Library, JW Library^®, BIBLIƆTƐKƐ WA L’ƐTƐRNƐTƐ Watchtower^™ (naka ekɔ l’ɔtɛkɛta aso), ndo la bibliɔtɛkɛ wa lo Mbalasa ka Diolelo. Bibliɔtɛkɛ wa lo Mbalasa ka Diolelo wekɔ la ekanda wambotondjaka Ɛmɛnyi wa Jehowa, Index des publications de Témoins de Jéhovah kana Dibuku di’eyangelo di’Ɛmɛnyi wa Jehowa, kaamɛ ndo dikadimwelo diotshikitanyi dia Bible, concordance, diksiɔnɛrɛ ndo abuku akina w’eyangelo wahombama. Onto tshɛ koka nkamba la bibliɔtɛkɛ ɔsɔ la ntondo kana l’ɔkɔngɔ wa nsanganya.

NSANGANYA Y’OTSHA LO ESAMBISHELO

²⁰ Lo wenya wotshikitanyi wa l’atei wa lomingu ndo lushi la samalo kana la lomingu, elui w’apandjudi wayosanganaka lo tshena pe lo nsanganya y’otsha l’olimu w’esambishelo. Nsanganya shɔ salemaka lo mvudu y’anto kana l’ahole akina wakoka. Mbeyaka nto nkamba la Mbalasa ka Diolelo dia nsala nsanganya shɔ. Monga la elui wa totshitshɛ wasangana l’ahole wotshikitanyi wa l’ɛtshi ka nkɛtɛ mbeyaka nkimanyiya dia apandjudi nkoma esadi lo nsanganya y’otsha l’olimu w’esambishelo ndo l’ɛtshi ka nkɛtɛ. Koka nkahanya apandjudi esadi eto ko vɔ ntshɔ l’ɛtshi ka nkɛtɛ aha la ntshimbatshimba. Omendji w’olui mbeyaka nto monga l’akoka wa ndjasha la yambalo tshɛ le ase olui ande. Kaanga mbele ekɔ dimɛna dia elui sanganaka l’ahole wotshikitanyi, awui amɔtshi mbeyaka nkonya elui efula dia nsangana kaamɛ. Ɛnyɛlɔ, naka apandjudi angana ato mbasambisha l’atei wa lomingu, kete ondo ayoleka dimɛna nsanganya elui kana elui tshɛ nsangana lo Mbalasa ka Diolelo kana lo dihole dikina diakoka. Lo yoho shɔ mbayokondjaka apandjudi anto wa ntomba la wɔ. Etshumanelo koka nto mɛna dimɛna dia nsangana lo Mbalasa ka Diolelo lo nshi ya fɛtɛ mɔtshi y’ase andja ɔnɛ. Kana etshumanelo mbeyaka mɛna dimɛna dia anto tshɛ nsangana kaamɛ dia ntomba l’olimu w’esambishelo l’ɔkɔngɔ wa Wekelo wa Tshoto y’Etangelo.

²¹ Etena kasangana elui l’ahole wotshikitanyi, emendji w’elui mbalɔmbɔla nsanganya y’otsha l’olimu w’esambishelo. Tena la tena, omendji w’olui mbeyaka nɔmba ɔhɛna ande kana ɔnangɛso ɔmɔtshi lele l’akoka dia nɔmbɔla nsanganya shɔ. Ɔnɔmbɔdi pombaka ndjalɔngɔsɔla dia nkɛtshanya dui dimɔtshi diayonga ohomba ndo diayokimanyiya l’olimu w’esambishelo. Nde kahanyaka anto dia vɔ ntomba l’olimu w’esambishelo ndo ɔnangɛso ɔmɔtshi salaka dɔmbɛlɔ. Oma laasɔ, ase olui wayotshɔ l’ɛtshi ka nkɛtɛ aha la ntshimbatshimba. Nsanganya shɔ mbiviyaka minitɛ tshanu kana esambele ndo yɔ koka ndeka monga mondo naka yɔ salema kam’ashila losanganya lɔmɔtshi la l’etshumanelo. Yɔ pombaka mbisha ekeketshelo, wetshelo wahombama ndo ɛlɔmbwɛlɔ le wanɛ watatombe l’olimu w’esambishelo. Eyoyo kana anto akina wele l’ohomba w’ekimanyielo mbeyaka nsambisha kaamɛ l’apandjudi wambohokɔ akambo dia vɔ ndowanyema.

NSANGANYA LO TSHUMANELO DI’EYOYO KANA DIA TOTSHITSHƐ

²² Lam’ataleke ambeki mfula mbatafule ndo lofulo la tshumanelo. Mbala efula, omendji w’otshimbedi mbalɔmba dia etshumanelo k’oyoyo mbatema. Koko tena dimɔtshi, elui wa totshitshɛ koka mɛna ɔlɔlɔ dia kakatanyema la etshumanelo koleki suke.

²³ Mbala mɔtshi, tshumanelo dia totshitshɛ mbeyaka monga paka la akadiyɛso ato. Etena kɛsɔ, kadiyɛso kasala dɔmbɛlɔ lo etshumanelo kana kalɔmbɔla nsanganya pombaka nkomba ɔtɛ ande dimɛna dia nɛmiya kɛnɛ kata Afundelo. (1 Kɔr. 11:3-16) Mbala efula, nde mbidjasɛka mbɛlɛnganɛ l’olui. Akadiyɛso hawosha asawo lo nsanganya. Koko vɔ mbadiaka ndo mbishaka kɔmatɛrɛ lo kɛnɛ kele lo ekanda watondja okongamelo, kana dia tshikitanya yema, vɔ koka nsɛdingola awui akɔ lo tshimbo y’ɔkɛtshanyelo kana wɛnyɛlɔ ɔmɔtshi. Filialɛ ayɔlɔmba kadiyɛso kɛmɔtshi dia mbifolaka ekanda ndo nɔmbɔlaka nsanganya. L’edjedja ka wonya, naka anangɛso wamboyokotsha kɛnɛ kalɔmbama dia mɛmba ɛkɛndɛ ɛsɔ, kete vɔ wayɛmba ɛkɛndɛ akɔ.

NSANGANYA Y’ETSHIMBEDI

²⁴ Ɔnɔnyi tshɛ, ekongelo salemaka dia tshumanelo dia l’otshimbedi ɔmɔtshi nsangana lo nsanganya hiende y’etshimbedi ya lushi ɔtɔi. Tena di’ɔngɛnɔngɛnɔ sɔ mbishaka anto tshɛ waya waaso wa ‘dihola etema awɔ hwe’ lo monga kaamɛ l’Akristo akina. (2 Kɔr. 6:11-13) Lo mbidja yimba l’ehomba ɛmɔtshi wa laande, okongamelo wa Jehowa nɔngɔsɔlaka ɛtɛ w’awui wotumbi l’Afundelo ndo tenyi diotshikitanyi dia dikongelo sɔ. Wetshelo mbishamaka lo tshimbo ya asawo, wɛnyɛlɔ, tɔkɛnyɔ ta lo tɔjɛstɛ, wɛnyɛlɔ w’onto ayatɛkɛtɛ ndamɛ ndo ɛkɔnya. Wetshelo waya la wonya ɔsɔ keketshaka wanɛ tshɛ waya lo nsanganya. Lo nsanganya shɔ, ambeki w’eyoyo kondjaka diaaso dia batizama oko djembetelo ya ndjakimɔ kawɔ le Jehowa.

NSANGANYA YA RƐJƆ

²⁵ Mbala ɔtɔi l’ɔnɔnyi, nsanganya yoleki weke salemaka. Nsanganya shɔ salemaka mbala efula nshi shato, tshumanyaka tshumanelo di’oma lo lofulo lɔmɔtshi l’etshimbedi. Filialɛ ya totshitshɛ mbeyaka mɛna dia ndeka dimɛna dia tshumanelo tshɛ dia l’ɛtshi ka nkɛtɛ ka filialɛ nsangana dihole ɔtɔi. Lo wedja ɛmɔtshi, ɛlɔngɔswɛlɔ wa nsanganya shɔ mbeyaka ntshikitana lo ndjela awui amɔtshi kana ɛlɔmbwɛlɔ k’oma le okongamelo. Tena la tena, nsanganya ya wedja efula kana nsanganya ya weke ya laande, salemaka lo wedja ɛmɔtshi ndo nunu di’Ɛmɛnyi wa Jehowa di’oma lo wedja wotshikitanyi mbɔtɔka lo nsanganya shɔ. Aya ɛnɔnyi efula wele anto efula wakoke lokumu l’ɔlɔlɔ la Diolelo oma lo woho wanyanyema nsanganya shɔ ya weke y’Ɛmɛnyi wa Jehowa.

²⁶ Le ekambi wa Jehowa wakayakimɔ, nsanganya ya weke yekɔ waaso w’ɔngɛnɔngɛnɔ wa mbɔtɛmɔlaka kaamɛ. Lo nsanganya shɔ elembetshielo wendana la akambo wa mɛtɛ mbishamaka. Lo nsanganya mɔtshi ya weke ya rɛjɔ, ekanda w’eyoyo tondjamaka dia wekelo w’onto ndamɛ kana dia mbeka l’etshumanelo kana dia nkamba la wɔ l’olimu w’esambishelo. Anto batizamaka lo nsanganya ya weke. Nsanganya ya weke ya rɛjɔ kimanyiyaka efula di’ohamelo aso wa lo nyuma. Yɔ yekɔ djembetelo yɛnya dia ekambi waki Jehowa nkenga nkumbo ka lo wedja efula k’Akristo wakayakimɔ wele la djembetelo yɛnya dia vɔ mbele ambeki wa mɛtɛ waki Yeso Kristo.​—Jni. 13:35.

²⁷ Etena kɔtɔso lo nsanganya ya lo etshumanelo kaso ndo lo nsanganya ya weke y’ekambi wa Jehowa, sho keketshamaka dia nsala lolango la Jehowa. Ndo nto sho kokamɛka oma lo tɔsɛngiya t’andja ɔnɛ takoka nanya mbetawɔ kaso k’Okristo. Nsanganya shɔ tshɛ tombolaka Jehowa. (Os. 35:18; Tok. 14:28) Sho koka monga la lowando otsha le Jehowa lasha ekambi ande wakayakimɔ tena sɔ dia ekeketshelo ka lo nyuma lo etena kɛnɛ k’ekomelo.

DAMBO DIA DIKƆLƆ DIA NKUMADIƆNDJƆ

²⁸ Mbala ɔtɔi l’ɔnɔnyi, lo lushi la eohwelo ka nyɔi ka Yeso Kristo, tshumanelo di’Ɛmɛnyi wa Jehowa dia l’andja w’otondo salaka Eohwelo ka nyɔi ka Kristo, kana Dambo dia dikɔlɔ dia Nkumadiɔndjɔ. (1 Kɔr. 11:20, 23, 24) Lɔ mbele losanganya la l’ɔnɔnyi loleki ohomba tshɛ le ekambi wa Jehowa. Bible todjangɛka dia nsala Eohwelo kɛsɔ.​—Luka 22:19.

²⁹ Datɛ dia Eohwelo mbɔtɔnɛka la datɛ dia Dambo di’Elekanelo diatɛkɛtama lo Bible. (Eto. 12:2, 6; Mat. 26:17, 20, 26) Dambo di’Elekanelo aki fɛtɛ kakawasalaka ɔnɔnyi tshɛ dia mbohɔ otombelo w’ase Isariyɛlɛ oma lo Edjibito l’ɔnɔnyi wa 1513 N.T.D. Lo etena kɛsɔ, Jehowa akasɔnɛ lushi la 14 la ngɔndɔ kawɔ ka ntondo kawalɛ oko datɛ dia vɔ ndɛ ɔna ɔkɔkɔ wa Dambo di’Elekanelo ndo dia vɔ ntomba oma lo fumbe l’Edjibito. (Eto. 12:1-51) Datɛ sɔ shikikɛmaka lo mbadia nshi 13 ntatɛ oma lo valelo ya ngɔndɔ yɛnama la Jɛrusalɛma yele suke la eleko kamɔnga akatshi konga otsho la yanyi popo. Mbala efula Eohwelo salemaka ɔnɔnyi tshɛ lo datɛ dia ntondo dionga ngɔndɔ emuma diayela eleko kamɔnga akatshi konga otsho la yanyi popo.

³⁰ Mateo 26:26-28 mɛnyaka kɛnɛ kakate Yeso ndamɛ lo woho wahomba Eohwelo salemaka. Eohwelo keema tshelo mɔtshi y’ehekesa, koko tɔ kekɔ mbo ya ndɛ ya didjidji yalɛ wanɛ waketama dia tonga ekitɔ kaamɛ la Yeso Kristo lo Diolelo dia l’olongo. (Luka 22:28-30) Akristo akina tshɛ wakayakimɔ le Nzambi ndo anto wayasha nɔmbamaka dia mbɔtɔ lo Dambo dia dikɔlɔ dia Nkumadiɔndjɔ oko amɛnyi ato. Wɔtwɛlɔ awɔ lo losanganya lɔnɛ mɛnyaka lowando lawɔ lo woshasha wakakimɔ Jehowa Nzambi dikambo dia wahɔ w’anto tshɛ lo tshimbo y’Ɔnande Yeso Kristo. La ntondo ka Eohwelo, sawo dia lo sɛkɛ dia laande mbishamaka, diɔ diakalɔngɔsɔma dia nomialomia nsaki k’anto lo dui dia woke sɔ ndo dia pamia nsaki kawɔ dia vɔ nyomoleka ndjasha lo wekelo wa Bible.

³¹ Ɛmɛnyi wa Jehowa kongɛɛka l’asolo walomɔlomɔ waaso wasanganawɔ kaamɛ dia ‘mbidjanaka yimba dia tshutshuyana lo ngandji ndo lo etsha w’ɛlɔlɔ.’ (Hɛb. 10:24) Ɔhɔmbɔ wa kɔlamelo ndo kɛsɔ nɔngɔsɔlaka nsanganya shɔ lo yoho yɔtɔnɛ la ehomba aso wa lo nyuma. Ekambi tshɛ wa Jehowa ndo anto wayasha nɔmbamaka dia nkondja wahɔ tshɛ oma lo ekongelo ka nsanganya ya mbala la mbala. Ekambi wa Nzambi mongaka kaamɛ etena kongawɔ la lowando l’oma k’ɛse otema lo tɛdikɔ tɔsa Jehowa lo tshimbo y’okongamelo ande. Kɛnɛ koleki ele, sho tombolaka Jehowa.​—Os. 111:1.