Tɔlɛmiake Anto Akina—Etenyi ka Hende
1 Sho nangaka ndjâla la diokanelo di’ɔlɔlɔ l’asaso l’anto wele lo dihata diaso, lo yɛdikɔ tshɛ yakoka. Dia dikambo sɔ salema, sho pombaka nɛmiya lowandji lawɔ la saki yawɔ.
2 Ɛmɛnyi wa Jehowa wambeyamaka lo loshilambo lawɔ. Yoho yaso yatatokana l’asukanyi aso, la kalasa, lɛnɛ akambaso olimu, ndo lo sanganya ya weke, toshaka lokumu efula.—Enda lo Tshoto y’Etangelo ya Yitshu 15, 1989 (lo Falase), lɛkɛ 20.
3 Nshi tshɛ, lɔkɛwɔ l’ɔlɔlɔ mendamaka l’akambo efula oko losembwe, etete l’olimu ndo dionga di’ɔlɔlɔ. Lɔ mendanaka nto la dilɛmiɛlɔ di’anto wadjasɛ suke suke la Mbalasa ka Diolelo. Lɔkɛwɔ laso l’anto walɛmiya Nzambi kokaka mbɔla yɔɔ l’akambo akina naka sho hatodje yimba dia nɛmiyaka asukanyi aso. Paulo akatolake dia sho ‘kɛndakɛndaka lo woho wasungana la lokumu l’ɔlɔlɔ.’—Fil. 1:27.
4 Tena la tena, anto wadjasɛ suke suke la Mbalasa ya Diolelo mɔtshi ndjakiyanyaka l’ɔkɔkɔ wa kɛnɛ kɛnawɔ ɔnɛ hawâlɛmia oma le wanɛ wɔtɔ lo sanganya. Anangɛso l’akadiyɛso hawohombe memalaka elui elui l’otadimbo la ntondo ka Mbalasa ka Diolelo ko sawolaka asawo w’etale wokɛma polo ndo lo mvudu kina yele suke suke. Hawohombe tshika ana dia vɔ mbɔtɔtɔka ndo tombatombaka oma lo Mbalasa ka Diolelo watalawɔlawɔ. Lɔkɛwɔ la ngasɔ hasha etshumanelo lokumu l’ɔlɔlɔ. Ekɔ ohomba nto dia nɛmiyaka alako tshɛ w’endana l’okokelo lo wale ndo ndjalaka l’abuku wa lɛɛta lam’etetaso lo dihata.—Romo 13:1, 2, 5.
5 Bible tokeketshaka dia sho ‘ntshaka dikambo tshɛ dia lotombo la Nzambi,’ lâsɔ mɛnyaka ɔnɛ tɔlɛmiake wanɛ watenda. (1 Kor. 10:31-33) Naka sho ‘mendaka wahɔ w’anto akina,’ kete sho hatotɔtɔka lo kombo yakiwɔ l’emendemende. (Fil. 2:4) Lâdiko dia lâsɔ, tayoyatshutshuyaka di’aha sho kiyanya anto wodjashi lo dihata.
6 Dilɛmiɛlɔ diaso le anto akina, oyadi l’etei kana l’andja w’etshumanelo, mɛnyaka kɛnɛ kele laso l’atei w’otema. Kɛnɛ kasalaso ndo katɛkɛtaso pombaka mɛnya ɔnɛ tekɔ lo ‘nanga onyaso oko ayalangaso.’—Mat. 7:12; 22:39.