Tɛnyanya Dibuku Vivre éternellement Dimɛna Efula
1 Yeso aki manamana lo mbɔtwɛlɔ y’asawo. Nde akeyaka kakɔna ka mbuta dia nomialomia saki k’ampokami ande. Lushi lɔmɔtshi, nde akatatɛ sawola la omoto Ose Samariya la mbɔlɔmba paka ashi a nɔ ato. Dikambo sɔ diakawâmbia nɛ dia ‘Ase Juda kombokanaka l’Ase Samariya.’ Sawo diakayoyelaka diakayokimanyiyaka omoto ɔsɔ l’anto akina efula dia vɔ koma ambetawudi. (Joa. 4:7-9, 41) Sho kokaka kondja wahɔ oma l’ɛnyɛlɔ ka Yeso.
2 Etena kayalɔngɔsɔlaso dia tɛnyanya dibuku Vivre éternellement, toyambole shate: ‘L’akambo akɔna waleka ndjasha anto wa lo mbilo kaso nshi nyɛ? Naa sawo diayosha ɔlɔngɔlɔngɔ saki, osombe, pami kana omoto lotshukami?’ Sho kokaka nɔngɔsɔla mbɔtwɛlɔ efula y’asawo ko tasɔni kɛnɛ kɛnaso ɔnɛ ayɔtɔnɛ la dikambo diakɔ.
3 Lam’ele anto efula wekɔ lo ndjakiyanya lo dikambo di’ohandjwelo wa lɔsɛnɔ la nkumbo, sho mbeyaka mbuta ɔnɛ:
◼ “Akambo a weolo weta lo lɔsɛnɔ nshi tshɛ mbidjaka nkumbo l’ohemba a wolo efula. Lende okokiyɔ kondja ekimanyielo na? [Tshikɛ onto akɔ etena akadimole.] Bible kokaka tokimanyiya mɛtɛ. [Ala 2 Timote 3:16, 17.] Afundelo mbishaka alako w’ɛlɔlɔ efula wakimanyiya nkumbo dia yɔ shika tomamba la ntondo k’akambo wa wolo. Ohenda kɛnɛ kata dibuku nɛ: Vous pouvez vivre éternellement sur une terre qui deviendra un paradis, l’odingɔ 3 wa lo lɛkɛ 238.” Tale odingɔ 3 kele towosha dibuku diakɔ.
4 Naka dikambo dimɔtshi diatɛkɛtama nshi nyɛ mbotshiso, kete sho kokaka mbuta ɔnɛ:
◼ “Onde wɛ ambokaka nkumu mɔtshi y’endana la [ta dikambo dimɔtshi dia mɛtɛ diashimboya anto wa lo dihata]? Akanayɛ lo dikambo sɔ? [Tshikɛ onto akɔ etena akadimole.] Tekɔ lo ndjambola lɛnɛ atatshu andja lam’ɛnaso akambo wa nganɛ, shi mɛtɛ? Bible akatatshi ɔnɛ akambo wa ngasɔ mbayonga djembetelo yɛnya ɔnɛ tekɔ lo sɛna lo nshi y’ekomelo.” L’ɔkɔngɔ sho kokaka mbɛ̂nya kɛnɛ kata dibuku Vivre éternellement lo lɛkɛ 150 polo 153.
5 Anto efula wekɔ lo ndjakiyanya lo dikambo di’odiakanelo wambɔtɛkɔya. Sho kokaka mbɔsa mbɔtwɛlɔ ka ntondo kele lo sawo diele l’ɔtɛ a dui “Crime/Sécurité,” lo lɛkɛ 11 la dibuku “Comment raisonner”:
◼ “Tekɔ lo tasawola l’anto watahomana laso lo dikambo dia ofukutanu. Anto wekɔ lo ndjakana efula l’ahole wadjasɛso, ko dui sɔ diekɔ la shɛngiya lo lɔsɛnɔ laso. Onde wɛ mbetawɔka dia tayokoka mbeteta l’otsho l’otadimbo aha la wâle?” Sho kokaka mbala Osambu 37:10, 11 ko mbika epole ɔsɛkɛ l’ɛlɔlɔ wayela Diolelo diaki Nzambi lo kamba la lɛkɛ 156 polo 158 la dibuku Vivre éternellement.
6 Naka mbɔtwɛlɔ kɛmɔtshi ka lo sawo koleki wɔdu mbalekaso nanga, kete sho kokaka mbɔsa kɛnɛ kele oko ka hende ka l’ɔtɛ a dui “Avenir/Sécurité,” lo lɛkɛ 10 la dibuku “Comment raisonner”:
◼ “Tekɔ lo keketsha asukanyi aso dia vɔ menda nshi yayaye y’ɔngɛnɔngɛnɔ efula yatolaka Bible. [Ala Enyelo 21:3, 4.] Onde elongamelo ka ngasɔ kɔngɛnyangɛnyaka? [Tshikɛ onto akɔ etena akadimole.] Tshapita 19 ya dibuku nɛ mɛnyaka ɛlɔlɔ ekina wayokondja anto w’okitanyiya la tshina dia lowandji la Diolelo diaki Nzambi.” Naka onto akɔ ekɔ lo mɛnya saki, towosha dibuku Vivre éternellement.
7 Naka tekɔ lo nɔngɔsɔla mbɔtwɛlɔ ka sawo dimɛna efula, kete tayokondjaka anto wele la ndjala ka akambo w’ɔlɔlɔ.—Mat. 5:6.