Tɔlɛmiake Anto Akina—Etenyi ka Ntondo
1 Tekɔ l’ɔngɛnɔngɛnɔ dia mɛna anto wa Jehowa wekɔ lo tafulanɛ, diɔ diakɔ diatadɛ lofulo la tshumanelo. Lo tenyi dimɔtshi dia nkɛtɛ, djekoleko l’esomba wa weke, Mbalasa ya Diolelo kambemaka olimu nshi tshɛ, nɛ dia mbala mɔtshi tshɔi ya mbalasa kimanyiyaka dia tshumanelo efula mbɔtɔka lɔkɔ. Lo dikambo dia ngasɔ pombaka anto tshɛ wendana ladiɔ mbidja yimba efula.
2 Sunganaka dia etshumanelo tshɛ kayosanganaka lo Mbalasa ka Diolelo kitshika pudipudi ndo diangɔ tshɛ l’ɔnɔngɔ lo dikambo di’anangɛso l’akadiyɛso wayoyoya l’ɔkɔngɔ. Kɔsa pombaka nɔngɔswama dimɛna, minya ekanda tshɛ oma lâdiko dia mɛsa, ndo oseka ɛngɔ tshɛ kokalemi lo mbalasa pombaka tɔngɔnama. Pombaka sola komba, kitsha sabunyi kina, esiyamɛ la wɔmbɔ w’akonge, mbikasha mindo tshɛ la dâla.
3 Naka wakalɔngɔsɔla dia nsanganya hiende ndjelana l’ɔkɔngɔ a taahe tongana toto, wanɛ wayotomba oma lo lɔnɛ la ntondo hawohombe tshimbatshimba tshanana, nɛ dia vɔ wayodjaka disanya lam’alɔngɔsɔlawɔ losanganya layela. Naka anto amɔtshi wekɔ lo sawola asawo awɔ w’etale, vɔ wayoyala la soko ko ndjotshindjatshindjaka anangɛso wanɛ walɔngɔsɔla losanganya layela. Ondo mbeyaka ndjâla ko ahole wa mbɛkɛ akalo bu efula; lâsɔ ekɔ dimɛna dia tatshwe esadi woho wa wanɛ tana dihole dia mbɛkɛ akalo awɔ. Lo wedi okina, wanɛ waya lo losanganya layela hawohombe koma esadi efula, nɛ dia vɔ wayolola la soko ololalola, ndo lo dihole diengolawɔ ahɔndɔ la diɛkɛwɔ akalo.
4 Naka tshumanelo efula diambotanema la ntondo ka dikambo dia ngasɔ, kete ayonga ohomba efula dia vɔ kamba kâmɛ lo diokanelo dia nɔngɔsɔla Mbalasa ka Diolelo lomingu la lomingu. Mbala efula tshumanelo toyelanaka l’ɔnɔngɔ. Naka aya mbala k’etshumanelo kanyu, nyɔlɔngɔsɔlɛ dimɛna efula ndo l’ohetoheto tshɛ. Ɔsɔku, mbahatoyakiyanya tshumanelo dikina.
5 Mbala la mbala, ekɔ ohomba dia etshumanelo tshɛ tshikitanya nshi yawɔ ya nsanganya, djekoleko lo nshi ya diendelo di’omendji w’otshimbedi. Lâsɔ dikumanyi pombaka tewoyisha ase etshumanelo kana tshumanelo dikina woho wa vɔ mbewoya apandjudi kɔlɔmɔ. Ndo nto, naka wakalɔngɔsɔla dia mbɔsa mbalasa l’etena ka dikambo dimɔtshi diakawasha lotshungɔ, oko Kalasa k’ambatshi mboka, losanganya lɔmɔtshi la dikumanyi dia l’otshimbedi, kana diwala, tshumanelo kâmɛ ndo emendji tshɛ w’otshimbedi wendana la dikambo diakɔ, pombaka mbewoyama edja la ntondo woho wa vɔ mbidja ekongelo ka mbɔsa mbalasa l’etena kakɔ kâmɛ.
6 Mbalasa efula yekɔ lo kambema oma le tshumanelo diele l’etshimbedi wotshikitanyi. Ekɔ ohomba efula dia emendji weteta wakamba lo tshumanelo sɔ mbewoyama nshi yasangoyawɔ dia todienda. Etshikitanelo w’esadi esadi mbeyaka ndjâla ohomba kana ekakatanu ekina mbeyaka ndjotomba naka emendji ehende wambokongɛ dia mbeta lomingu lakɔ lâmɛ.
7 Lam’ayatshutshuyaso dia ndjâlaka la dilɛmiɛlɔ le anto akina, lo kongɛka akambo awɔ kɔlɔmɔ ndo lo kambaka kâmɛ, tshumanelo diayoyala la diokanelo di’ɔlɔlɔ lam’asawɔ ndo wayokoka dia ‘tshaka akambo tshɛ la dimɛna ndo l’ɔnɔngɔ.’—1 Kor. 14:40.