Dikambo Dioleki Woke L’ɔkɔndɔ W’anto
1 Yeso akaye la nkɛtɛ, l’ɛlɔmbwɛlɔ ka She, dia ndjewoya mɛtɛ kakoka tɔtɔla otsha lo lɔsɛnɔ la pondjo. (Joa. 18:37) Lam’akandatshikala la kɔlamelo polo ndo lo nyɔi, nde akatombola Jehowa, akalɛmiya lokombo Lande ndo akakimɔ tshungo. (Joa. 17:4, 6) Kɛsɔ tshɛ mbetɛka nyɔi ka Yeso dikambo dioleki ohomba l’ɔkɔndɔ w’anto.
2 L’atei w’anto wakasɛnɛ la nkɛtɛ oma kam’akatongama Adama, ahende ato mbaki kokele. Adama akakoke mbisha tokanula tande totoyotɔ l’ɔkɔngɔ diaaso dia kondja ɛlɔlɔ wa mamba. Lo dihole dia nde sala ɔsɔku, nde akatɔmbɔkɔ la lokaki tshɛ, awadja lo lowete la lɔsɛnɔ la shɔkɔ lakayokomɛ lo nyɔi. Lam’akaye Yeso lanɛ la nkɛtɛ, nde akayala la kɔlamelo ndo l’okitshakitsha lo yoho ya kokele, asha wanɛ tshɛ wayonga la mbetawɔ diaaso dia monga la lɔsɛnɔ la pondjo.—Joa. 3:16; Romo 5:12.
3 Ndoko dikambo dikina diokoki mbɛdikama la nyɔi k’olambo ka Yeso. Tɔ kakatshikitanya Ɔkɔndɔ w’anto. Oma l’ekimanyielo katɔ mbayokoka miliyara y’anto mbolɔ oma l’edo. Tɔ mbikaka etshina ka Diolelo dia pondjo diayoshidiya akambo wa kɔlɔ tshɛ ko kadimula nkɛtɛ paradiso. L’ɔkɔngɔ diko, tɔ kayoyotshungola anto oma lo woho tshɛ w’ɔhɛnyɔhɛnyɔ ndo wa lɔhɔmbɔ.—Osam. 37:11; Etsha 24:15; Romo 8:21, 22.
4 Kɛsɔ tshɛ tokimanyiyaka dia sho shihodia bonde kakandjangɛ Yeso ambeki ande dia vɔ mbohɔka nyɔi kande lo salaka Eohwelo ɔnɔnyi l’ɔnɔnyi. (Luka 22:19) Oko ambotoshihodia ohomba atɔ, tekɔ lo kongɛ l’asolo lokoloko dia sho sangana oko ayodisala tshumanelo di’Ɛmɛnyi wa Jehowa dia l’andja w’otondo, lushi la Hende, Mɔmbi 2, l’ɔkɔngɔ wa ɛɔtwɛlɔ ka wonya. Ntondo ka tokoma lɛsɔ, ayonga dimɛna mbala lo nkumbo ɔkɔndɔ wa lo Bible wɛnya nshi y’ekomelo ya lɔsɛnɔ la Yeso lanɛ la nkɛtɛ ndo woho wakandɔshi yɛdikɔ la dihonga tshɛ dia sukɛ mɛtɛ. (Avɛsa wa mbala wekɔ lo Calendrier 1996, oma lo Asase a Ndjoko 28 polo lo Mɔmbi 2.) Yeso akatotshikɛ ɛnyɛlɔ lo kɛnɛ k’endana la tombola Otungi. (1 Pet. 2:21) Tosale la wolo aso tshɛ dia mbelɛ anto weyaso oya lo losanganya lɔsɔ l’ohomba efula, kâmɛ ndo nkumbo kaso la wanɛ weka laso Bible ndo anto akina walanga. Katotawalembetshiyisha ntondo woho wayeta akambo ndo kitshimudi ya mapa la vinyɔ.—1 Kor. 11:23-26.
5 Dikumanyi pombaka tayalɔngɔsɔdi dimɛna la ntondo dia ndjashikikɛ ɔnɛ Mbalasa ka Diolelo kayonga pudipudi ndo kɔmba. Pombaka tayangi onto layokimɔ mapa la vinyɔ. Pombaka nɔngɔsɔla wetshetshelo wa mapa la vinyɔ dimɛna. Alako w’eshika w’endana la woho wa mɛnya dilɛmiɛlɔ lo Dambo dia Nkumadiɔndjɔ tanemaka lo Tshoto y’Etangelo ya Yâta Afusa 15, 1985 (lo Falase), lɛkɛ 17. Ayonga dimɛna dia etshumanelo tɔ̂shi tɛdikɔ dia sambisha efula l’edja ka nshi ngana ya la ntondo ndo ya l’ɔkɔngɔ wa Eohwelo ka Nyɔi ka Yeso.
6 Ɔnɔnyi wetshi, anto tshɛtshɛ 13147201 wakɔtɔ lo losanganya l’eohwelo ka dikambo sɔ di’ohomba efula. Nɛ dia lɔ lekɔ lushi la l’ɔnɔnyi loleki ohomba, sho tshɛ pombaka monga lâwɔ.