Tohɔke Nyɔi Ka Yeso Lo Woho Wasungana
LA DIKƆLƆ dia ngɔndɔ ka Nisana 14, l’ɔnɔnyi 33 T.D., mbakatatɛ Yeso ntsha Eohwelo ka nyɔi kande.a Lâsɔ ko nde oma la shidiya la ntsha difɛstɔ di’Elekanelo nde l’apɔstɔlɔ ande 12, diɔ diakɔ diakokaso mbeya lushi shikaa lakasalema Eohwelo kɛsɔ. L’ɔkɔngɔ wa nde tondja Judasɛ, ofungi, Yeso “akose ukama omotshi, akôtshokola, akawatula, akawasha ata ati: Nyose; dimba diami ne. L’okongo diku, ndi akose dikoho. Lam’akanduki lusaka, ndi akawashadio, ku vo tshe wakano. Ndi akawatela ati: Dikila diami dia sheki y’uyuyu diku. Dio diambutshulwama dikambu di’antu efula.”—Mako 14:22-24.
Yeso akadjangɛ ambeki ande dia vɔ mbohɔka nyɔi kande nɛ dia tɔ kekɔ ohomba efula. (Luka 22:19; 1 Koreto 11:23-26) Paka olambo wa Yeso oto mbakakoke tshungola anto oma lo mananu ka pɛkato la nyɔi kakawahowɔ. (Romo 5:12; 6:23) Mapa la vinyɔ yakandɔshi aki tolembetelo takɛnyaka didjidji dia demba la dikila diande. Oko weyaso lushi lakatatɛ Yeso ntsha Eohwelo ka Nyɔi kande, sho kokaka mbohɔka dikambo sɔ ɔnɔnyi l’ɔnɔnyi lo lushi lɔtɔnganɛ la lɔ, oko akasalemaka Elekanelo k’Ase Juda. Koko, sho pombaka sala dikambo sɔ lo woho wasungana. Lande na?
Ɔpɔstɔlɔ Paulo akate ɔnɛ: wanɛ walɛ tolembetelo tɔsɔ, mapa la vinyɔ, pombaka ‘tetemala mbewoya nyɔi ka Nkumadiɔndjɔ, edja ndo lam’ayondoya.’ (1 Koreto 11:26) Ɔnkɔnɛ, wonya wasalema eohwelo kɛsɔ, vɔ pombaka mbika epole ɔsɛkɛ lo nyɔi ka Yeso ndo lo kitshimudi yele latɔ le anto. Etena kɛsɔ hahombe mbɔsama oko etena ka tɔkɛnyɔ, tɔ pombaka monga etena ka sho kanaka yimba lo ɔlɔlɔ wa Nzambi ndo lo lowando lahombaso monga lalɔ otsha le Jehowa la Ɔnande. (Romo 5:8; Tito 2:14; 1 Joani 4:9, 10) Diɔ diakɔ diakatewola Paulo ate: “Okone untu tshe layole [mapa ɔnɛ, NW], kana no dikoho dia Khumadiondjo wuhu wahasungana, ndi ayuyala la unungu wa dimba la dikila dia Khumadiondjo.”—1 Koreto 11:27.
Woho Akɔna Wasungana?
Mɛtɛ, Nzambi hatɔngɛnangɛna naka sho mɔnyɔla etena kɛsɔ lo ntsha akambo wa kɔlɔ ndo lo ndjela mbekelo y’apanganu. (Jakoba 1:27; 4:3, 4) Kɛdikɛdi, hatohombe ntsha akambo wasala anto efula lo nshi ya Pasaka. Lo ndjela ɔlɛmbɛ wa Yeso wa ‘tetemala ntsha dikambo nɛ dia [mbôhɔka],’ sho pombaka ntsha Eohwelo ka Nyɔi ka Yeso oko wakatwatatɛ ntshama. (Luka 22:19; 1 Koreto 11:24, 25) Sho pombaka mbewɔ awui wamboyahatanya ɛtɛmwɛlɔ wa Lokristokristo lo Eohwelo ka Nyɔi ka Yeso. Ansiklopedi ɔmɔtshi (New Catholic Encyclopedia) mbetawɔka ɔnɛ: “Misa yafukama ɛlɔ kɛnɛ tshikitana woho w’anyanya la nsɛlɛmɔnyi kaha l’ohokosanu kakasale Kristo nde l’Apɔstɔlɔ Ande.” Ndo, lo mfukaka Misa mbala la mbala, kânga lushi la lushi, Lokristokristo lambotakɔ sangwelo dia Yeso ndo lambetɛ dikambo sɔ ɔlɛlɔ.
Paulo akafundɛ Akristo w’Ase Kɔrɛtɔ lo kɛnɛ k’endana la ndɛ mapa la vinyɔ woho wahasungana l’ɔtɛ w’okakatanu wakatombe l’atei w’etshumanelo kɛsɔ lo dikambo dia Dambo dia Dikɔlɔ dia Nkumadiɔndjɔ. Amɔtshi kodiɔsaka oko dikambo di’ekila. Vɔ wakelaka diangɔ diawɔ dia ndɛ dia dikɔlɔ ko wakadilɛka la ntondo kana wonya wa losanganya. Mbala efula, vɔ wakalɛkaka ndo wakanɔkaka lo tshambandeko. Oma lo dikambo sɔ, vɔ wakanyingɔnyingɔka djɔ ndo timba tawɔ takekɔka l’akambo akina. Nɛ dia vɔ kosungukalaka lo yimba ndo lo nyuma, vɔ kokokaka ‘nembetɛ demba,’ ko wakayala la “unungu wa dimba la dikila dia Khumadiondjo.” L’etena kakɔ kâmɛ, wanɛ waki kondjalaka la mma dia dikɔlɔ wakokaka ndjala ndo timba tawɔ nto takekɔka l’akambo akina. Mɛtɛ, ndoko ɔtɔi a l’atei awɔ lakakokaka ndɛ mapa la nɔ vinyɔ la lowando ndo shihodia ɔnɛ: ɔnɛ kema etena ka tɔkɛnyɔ—ndo ɔnɛ: dambo nɛ diekɔ lo salema dia mbohɔ nyɔi ka Nkumadiɔndjɔ. Omalɔkɔ, vɔ wakakondja onongo, nɛ dia vɔ kɔnɛmiyaka ndo wakatonaka dui sɔ.—1 Koreto 11:27-34.
Shɛnɔdi Yekɔ Ohomba
Amɔtshi wambɔlɛka mapa la vinyɔ lo Eohwelo ka Nyɔi ka Yeso, koko l’ɔkɔngɔ diko, vɔ wakayɛnaka ɔnɛ takawahombe ntsha ɔsɔku. Wanɛ walɛ mapa la vinyɔ lo yoho yasungana wakasɔnama oma le Nzambi ndo wekɔ la djembetelo ya nyuma k’ekila kaki Nzambi lo dikambo sɔ. (Romo 8:15-17; 2 Koreto 1:21, 22) Aha vamɛ mbɔsa tɛdikɔ dia ndjaetɛ anto wasungana ndɛ mapa la vinyɔ. Nzambi akahembetshiya lofulo la wanɛ wayolɛ kâmɛ la Kristo l’olongo lo anto 144 000, lofulo la tshitshɛ efula lo mbɛdikola la wanɛ tshɛ wakondja ɛlɔlɔ oma l’olambo wa Yeso w’etshungwelo. (Enyelo 14:1, 3) Anto asɔ wakatatɛ nsɔnama lo nshi ya Yeso, lâsɔ ɛlɔ kɛnɛ paka yema tshitshɛ tsho mbalɛ mapa la vinyɔ. Ndo, lam’ele amɔtshi wa l’atei awɔ wekɔ lo mvɔ, lofulo lɔsɔ pombaka takitakitaka.
Lande na kakoka onto ɔmɔtshi ndjɔlɛ mapa la vinyɔ ɔlɛlɛ? Ondo nde kokaka ndjotsha ɔsɔku oma lo tokanyi taki lande l’ɔtɛmwɛlɔ ande w’edjedja—tokanyi t’ɔnɛ anto w’ɛlɔlɔ tshɛ ntshɔ̂ka l’olongo. Kana ondo nde ekɔ la mposa ka lokumu kana lokaki—kanyi y’ɔnɛ nde ndeka anto akina—ndo saki ka monga onto la woke. Ondo onto ndjotshaka ɔsɔku naka nde ambohomana l’ekakatanu wa wolo kana ambohomɔ mpokoso kɛmɔtshi kahayowosha saki ka nde nsɛna nto lanɛ la nkɛtɛ. Kokaka ndjâla nto oma lo lɔngɛnyi la mamba lele lam’asande l’onto ɔmɔtshi lele la leeta l’otsha l’olongo. Sho tshɛ pombaka mbohɔka ɔnɛ ɔsɔ ekɔ yɛdikɔ ya Nzambi ndamɛ, koko aha yaso. (Romo 9:16) Ɔnkɔnɛ, naka ‘onto amboyasɛdingola dimɛna’ ko nde ambɛna ate: dimi mɛtɛ hakoke ndɛ mapa la vinyɔ, kete nde pombaka mbɔsa tɛdikɔ kakianɛ di’aha ntsha dikambo sɔ nto.—1 Koreto 11:28.
Elongamelo kakasha Nzambi efula k’anto ele: lɔsɛnɔ la pondjo lo paradiso ka lanɛ la nkɛtɛ. Ɔsɔ ekɔ ɔtshɔkɔ wa woke wahombaso nongamɛka l’ɔngɛnɔngɛnɔ, ndo kakoka tɔngɛnyangɛnya efula. (Etatelu 1:28; Osambu 37:9, 11) Lanɛ la nkɛtɛ mbayonyomoyohomana akanga wa kɔlamelo la wakiwɔ wa ngandji wayolɔ ndo mbayowoyɛnana l’anto w’ɛlɔlɔ wa lo nshi y’edjedja, ɛnyɛlɔ oko: Abarahama, Sara, Mɔsɛ, Rahaba, Davidi la Joani Obatizanyi—wanɛ tshɛ wakavu la ntondo ka Yeso ndjihola mboka k’otsha lo lɔsɛnɔ la l’olongo.—Mateu 11:11; ɛdika la 1 Koreto 15:20-23.
Wanɛ wele l’elongamelo ka nsɛna lanɛ la nkɛtɛ salaka Dambo dia Dikɔlɔ dia Nkumadiɔndnjɔ lo woho wasungana lam’ɔtɔwɔ lo losanganya lakɔ ndo lam’alidjawɔ yimba la dilɛmiɛlɔ tshɛ, kânga mbahawale mapa la vinyɔ. Ndo vɔ lawɔ kondjaka ɛlɔlɔ oma l’olambo wa Kristo, olambo wâkimanyiya dia vɔ mɛnama anto w’ɛlɔlɔ lo asho wa Nzambi. (Enyelo 7:14, 15) Lam’ahokamɛwɔ dako diashama l’etena kɛsɔ, lowando lele lawɔ lo akambo w’ekila keketshamaka, ndo saki kawɔ ka tshikalaka kâmɛ l’anto wa Nzambi l’oseka dihole tshɛ pamaka.
Ɔnɔnyi ɔnɛ, tshumanelo olekanyi 78 000 di’Ɛmɛnyi wa Jehowa wa l’andja w’otondo wayosala Eohwelo ka Nyɔi ka Yeso lo ɛɔtwɛlɔ ka wonya ka Lushi la Hende, lo Mɔmbi 2. Onde wɛ ayɔtɔ lo losanganya lɔsɔ?
[Footnote]
a Lushi l’Ase Juda tatɛka la dikɔlɔ. Lo ndjela alamanaka aso wa nshi nyɛ, lushi lɔsɔ la Nisana 14 tatɛka oma l’etatelo ka dikɔlɔ dia Lushi la Nɛi, lo Asase a Ndjoko 31, polo ndo lo ɛɔtwɛlɔ ka wonya ka Lushi la Tanu la dikɔlɔ, Mɔmbi 1. Eohwelo ka nyɔi ka Yeso kakatatɛ salema la dikɔlɔ dia lushi la Nɛi, ndo Yeso akavu Lushi la Tanu l’ɔkɔngɔ a midi, lo lushi lakɔ lâmɛ l’Ase Juda. Nde akolɔ lushi la sato, la pindju ka Lushi la Lomingu.
[Caption]
[Notɛ ka l’ɛsɛ ka dikatshi]
[Caption on page 8]
[Diombwɛlo di’osato wa lo lɛkɛ 8]
Ɛmɛnyi wa Jehowa mbohɔka nyɔi ka Yeso mbala ɔtɔi l’ɔnɔnyi