Tokondja Ɛlɔlɔ Watomba Oma Lo Kalasa K’olimu Wa Teokrasi Ka 1996—etenyi Ka Sato
1 Ɔpɔstɔlɔ Paulo akalangaka anango mbɔlɔmbɛ dia nde kondja wolo wa tɛkɛta dikambo dia lokumu l’ɔlɔlɔ la dihonga. (Ef. 6:18-20) Saki kaso ele ka kondja wolo akɔ wâmɛ. Diɔ diakɔ diangɛnangɛnaso ekimanyielo kakondjaso oma lo Kalasa k’Olimu wa Teokrasi. Wanɛ wɔtɔ lo nsanganya ndo wakotsha kɛnɛ kalɔmbama wambokeketshama dia vɔ fundja nkombo lɔkɔ.
2 Ambeki kondjaka alako wawakimanyiya onto l’onto dia vɔ nyomoleka monga la yewo ya tɛkɛta ndo ndakanya. (Tuk. 9:9) Sho kokaka kondja nto ɛlɔlɔ watomba oma lo kalasa naka sho nongaka alako washawɔ ambeki akina ndo naka sho kambaka la kɛnɛ kekaso le so shamɛ. Lam’alɔngɔsɔlaso sawɔ dimɔtshi, sho pombaka mbeka akambo wakawatɔlɔmbɛ dimɛna dimɛna dia sho ndjashikikɛ ɔnɛ tekɔ lo mbatɛkɛta dimɛna aha mbahɛ aha mbahole. Atshina w’akambo la avɛsa wakambaso lawɔ pombaka mbɔtɔnganɛ l’ɔtɛ wa sawo. Naka sho pombaka sala sawo diakɔ l’onto okina, kete sho pombaka tadisadi kâmɛ l’onto akɔ mbala la mbala la ntondo ka todisala lo kalasa. Lo yɛdikɔ yatatahame, sho pombaka ndjatshutshuya dia tɛkɛta lo yoho ya tshakitudi, lo kambaka la towui wui takatafunde kana nɔtɛ lo dihole dia mbala lo dikatshi.
3 Wanɛ tshɛ wele l’asawo wa sala lo kalasa pombaka ndja esadi, kimɔ fishi yawɔ ya Conseils oratoires le omendji wa kalasa ndo mbidjasɛ la ntondo. Akadiyɛso pombaka tewoyisha omendji wa kalasa ntondo yoho yayowosala sawo diawɔ ndo kana vɔ wayodisala lemala kana lodjasɛ. Naka sho kamba kâmɛ l’akambo asɔ wotshikitanyi, kete tayosha lonya dia ekongelo mbeta dimɛna ndo tayokimanyiya wanɛ wenda awui wa lo lɔyɛnga dia vɔ talɔngɔsɔdi akambo tshɛ ntondo.
4 Woho wa Nɔngɔsɔla Sawo No. 2: Oyango ɔmɔtshi wa walelo wa Bible ele dia kimanyiya ombeki dia nde nyomoleka mbeya mbala. Ngande wakokande manyamanya walelo na? Yoho yoleki ɔlɔlɔ ele mbala etenyi kakɔ mbala efula la dui dia wolo. Dia nde mbeya olembetshiyelo ndo woho w’ɔlɔlɔ watɛkɛtawɔ ɛtɛkɛta ɛmɔtshi wahandaleke mbeya, ombeki ayowayanga lo dikisiɔnɛrɛ diɛnya woho wâtɛkɛtawɔ, ɛnyɛlɔ oko lo dikisiɔnɛrɛ di’Ɔtɛtɛla diaki Mgr. J. Hagendorens. Nde pombaka mbekesanɛ la tolembetelo ta talola alɛta (phonétique) tele lo dikisiɔnɛrɛ sɔ.
5 Lo Traduction du monde nouveau, nkombo efula yakɔsama mbala kakɔ ɔtɔi oma lo Hɛbɛru ko fundama lo yoho yakokayɔ tɛkɛtama oko l’ɔtɛkɛta akɔ w’edjedja. Ɔnkɔnɛ, fiulɛ yele lo tɔtɛkɛta takomɛ la ân, în kana ôn mɛnyaka ɔnɛ pombaka tɛkɛta n lokakitola (ɛnyɛlɔ oko, “Salmôn” mbelamɛka Salmone). Naka e (kele kema la ondjo) kekɔ lo syllabe kɛmɔtshi l’etatelo kana l’atei a lokombo, tɔ telamɛka e oko lo “petit” kana “parvenir.” Ekɔ oko woho wele lo nkombo Nehémia, Tsephania la Seroug. Lo nkombo yosangudiwɔ mbala kakɔ ɔtɔi oma lo Hɛbɛru, s tɛkɛtamaka nshi tshɛ la wolo oko lo “soleil” (oko ɛnyɛlɔ, “Yosek, Qosam”). Mɛtɛ, otshikitanu kema lo woho watɛkɛtawɔ nkombo yeyama efula yakawalame yoho yakawadje lo Falase (ɛnyɛlɔ oko, “Isaac, Jérusalem”).
6 Ambutshi mbeyaka kimanyiya anawɔ weke akɛnda dia vɔ nɔngɔsɔla walelo wa ngasɔ. Vɔ mbeyaka mbâlonga etena kêkawɔ ko mbasha alako wayowakimanyiya dia vɔ ndjalowanya. Yɛdikɔ ya wonya yoshami mbishaka onto diaaso dia sala mbɔtwɛlɔ ka sawo lo tshena pe ndo mbuta ɛtɛkɛta wa ndjihelo wasungana lɛnɛ ayosha ombeki wetshelo w’ɔtɔnganɛ l’atshina w’akambo. Ɔsɔku mbakokande pamia dikoka diande lo tɛkɛta lo yoho ya tshakitudi.
7 Omembi w’esambu akasɛngasɛnga Jehowa ate: “[Jehowa, NW] li, udihuli elomo ami, ku unyo ami ayudianganyaka lutumbu laye.” (Osam. 51:15) Tshika wɔtwɛlɔ aso lo Kalasa k’Olimu wa Teokrasi atokimanyiya dia sho mɛnya saki kakɔ kâmɛ!