Totombolake Jehowa “Lushi La Lushi”
1 L’Osambu 145:2, sho tanaka daka dimɔtshi diakalake nkumekanga Davidi Jehowa ate: “Layukutumbulaka la lushi la lushi, ndu layotemolaka lukumbu laye pundju, pundju.” Sho lawɔ tekɔ l’ɛkɔkɔ wa tombola ndo tɛmɔla Shɛso lele l’olongo. Ko ngande wokokiso mbokoya Davidi ndo tombolaka lowandji laki Jehowa la lâdiko “lushi la lushi” na?
2 Tolodiake Otema Aso la Lowando le Jehowa: Wekelo wa Dui dia Nzambi tena tshɛ keketshaka lowando laso lo kɛnɛ kakasale Jehowa, kasalande nshi nyɛ ndo kayondotosalɛ nto. Lam’ayototeyaka etsha wa diambo waki Jehowa, mbayotɔtɛkɔya monga la lowando ndo mbayotɔtɛkɛta di’ɔlɔlɔ ande. (Osam. 145:7) Tayotshutshuyama dia tɛmɔlaka Jehowa esangɔ tshɛ.
3 Totombolake Jehowa l’Asawo Aso wa Lushi la Lushi: Etena kasawolaso l’asukanyi aso, angɛnyi aso, asekaso wa l’olimu ndo anto akina wahomana laso lushi la lushi, sho kokaka mbɔsa waaso wa mbaewoya elongamelo kaso. Ondo osukanyi ɔmɔtshi ayototɛ okiyanu ande l’ɔkɔkɔ w’akambo w’odiakanelo wasalema lo tshenyi ya ngelo; mbeyaka ndjâla ko ɔngɛnyi ɔmɔtshi ekɔ lo ndjakiyanya lo dikambo dia didjoyadjoya kana dia monanyi; ondo osekaso ɔmɔtshi la l’olimu mbeyaka mbisha kanyi mɔtshi yele lande lo dikambo dimɔtshi dia pɔlitikɛ. Sho kokaka kotola yambalo yawɔ l’alako ndo l’alaka watanema lo Dui dia Nzambi ndo mbaɛnya lɔkɛwɔ l’ɔlɔlɔ lahombawɔ monga lalɔ oma kakianɛ, kâmɛ ndo lokando lakokawɔ kondja l’ekakatanu awɔ. Ɛtɛkɛta wa ngasɔ wotami l’‘etena kawɔ’ mbeyaka ndjâla ɔtshɔkɔ ɔmɔtshi.—Tuk. 15:23.
4 Tɔtɛkɛtake Dikambo dia Jehowa lo Tena ndo lo Tena: Ɔnɛ loludi la lowando le Jehowa kombolaka mbewoya anto efula lokumu l’ɔlɔlɔ. (Osam. 40:8-10) Lâsɔ, toyambole shate: ‘Onde dimi salaka la wolo ami tshɛ lo menda akoka ami?’ Efula wamboyɛna dia naka vɔ nɔngɔsɔla ekongelo kawɔ ka wonya yema, kete vɔ kokaka monga ambatshi mboka wa pondjo. Naka sho bu l’akoka nshi nyɛ, onde hatokoke ndjâla ambatshi mboka wa tshanda? Etena k’Eohwelo ka Nyɔi ka Yeso kekɔ lo tosha diaaso dia pamia olimu aso. Ngɔndɔ ka Asase a Ndjoko la ka Mɔmbi sunganaka mɛtɛ dia sho ndjasha tshɛ l’olimu lo ndjâla ambatshi mboka wa tshanda.
5 Tokimanyiya Eyoyo dia Vɔ Sangana Laso dia Tombola Jehowa: Osalelo w’Eohwelo ka Nyɔi ka Yeso toholaka ɔnɔnyi l’ɔnɔnyi ɛkɔkɔ wele laso wa kaloya Jehowa losaka ndo tɛmɔla lokombo Lande. Ɔsɔ ekɔ etena koleki sungana dia keketsha anto weka laso Bible dia vɔ sangana laso woho wa tɛkɛta akambo w’endana la lowandji la Jehowa lo sɛkɛ. Tâkeketsha dia vɔ kana yimba lo dɔmbɛlɔ lo kɛnɛ katama lo dibuku Ewo Katɔla Otsha lo Lɔsɛnɔ la Pondjo, lɛkɛ 173-5, odingɔ 7-9. Naka anto akɔ wekɔ lo kotsha kɛnɛ kalɔmbama, kete vɔ hawokoke konga, la yɛkɛ nɛndɛ y’ɔnɛ watahotɔ akambo efula. Apandjudi wa tomanamana wekɔ l’akoka wa mbaɛnya woho wasambishawɔ Diolelo. Naka eyoyo wambokondja dihonga diahombama dia tɛkɛta dikambo dia lokumu l’ɔlɔlɔ, kete vɔ kokaka ndjâla l’eshikikelo k’ɔnɛ Jehowa ayowakimanyiya.—Etsha 4:31; 1 Tes. 2:2.
6 Naka sho ndjatshutshuya dia tombolaka Jehowa lushi la lushi, kete tayokondja ɛlɔlɔ wa pondjo oma lɔkɔ, ndo sho ndo anto akina.