Tekɔ La Lotumu
1 Yeso akalɔmbɛ wanɛ wôyela dia vɔ mbetɛ “[anto wa lo, NW] wedja tshe ambeki.” (Mat. 28:19) Miliyɔ ndekana tshanu y’atɛmɔdi wa Jehowa Nzambi wekɔ djembetelo ya wolo y’okotshamelo wa didjango sɔ lo wedja 232 ndo asɛnga. Ko sho shâmɛ ngande na? Onde sho mbɔsaka lotumu laso la sambisha la nɛmɔ?
2 Ɔkɛndɛ wa Paka Kotsha: Lotumu ekɔ “ɔkɛndɛ woshawɔ onto dia nde tokotsha dikambo dimɔtshi.” Kristo akatodjangɛ dia sho sambisha. (Etsha 10:42) Ɔpɔstɔlɔ Paulo akeyaka ate, oma lo didjango sɔ, nde akahombe, kana akakondja ɔkɛndɛ wa paka kotsha, wɔnɛ wa pandjola lokumu l’ɔlɔlɔ. (1 Kor. 9:16) Tɔshi ɛnyɛlɔ: Ohɔsa dia wɛ kambaka lo masuwa ɔmɔtshi, ko wotadinde. Kapitɛnyi ambokotoma dia wɛ mbewola wa pasase ndo mbalɔmbɔla otsha lo wa wâto woye dia ndjoshimbɛ anto. Onde wɛ ayɔnyɔla didjango sɔ ko nyanga paka dia wɛ ndjashimbela wɛmɛ oto? Kema. Kɛnɛ tshɛ kayokomɛ anto akina ekɔ l’anya ayɛ. Nsɛnɔ yawɔ yekɔ lo wâle. Wɛ ekɔ l’ɔkɛndɛ wa paka kotsha lotumu lokoshawɔ l’endana la mbâkimanyiya.
3 Nzambi akatosha lotumu la mbewola anto. Jehowa aya kâ komiya dikongɛ di’otondo di’akambo dia nshi nyɛ dia kɔlɔ. Miliyɔ y’anto wekɔ lo wâle. Onde ayosungana naka sho minya yimba lo wâle wele la ntondo k’anyaso ko sho nyangaka paka eko kaso keto? Hakoke mɛtɛ. Tekɔ l’ɔkɛndɛ wa paka kimanyiya anyaso dia vɔ mbika.—1 Tim. 4:16.
4 Diɛnyɛlɔ dia Kɔlamelo dia Ndjela: Omvutshi Ezekiyɛlɛ akɛnaka dia nde aki l’ɔkɛndɛ wa mbewola Ase Isariyɛlɛ waha la kɔlamelo. Jehowa akatawote hwe dia kɛnɛ kayowokomɛ naka nde hakotshisha ɔkɛndɛ ande: “Naka dimi lambutela untu a kolo nti: Mete we ayuvo, ndu naka we hutedi untu a kolo kuyanga mbewula . . . , untu ako a kolo ayuvo lu kolo kandi. Keli dimi layukolomba dikila diandi.” (Ezek. 3:18) Ezekiyɛlɛ akakotsha ɔkɛndɛ ande l’ɔlɔlɔ tshɛ, kânga la ntondo ka wekamu wa wolo. Diɔ diakɔ diakandahombe ngɛnangɛna lam’akakotsha Jehowa dombwelo diande.
5 L’ɔkɔngɔ wa deko efula, ɔpɔstɔlɔ Paulo akatɛkɛta dia ɔkɛndɛ ande wa sambisha. Nde akate ate: “Dimi laha la unungu wa dikila dianyu, nyu tshe, ne dia [dimi kondjakimɛ dia nyewoya alako tshɛ wa Nzambi, NW].” Paulo akasambisha lo sɛkɛ ndo lo luudu la luudu nɛ dia nde akeyaka ɔnɛ naka nde nɛngɔla demba lo dikambo sɔ kete nde mɛmba onongo wa dikila lo asho wa Nzambi.—Etsha 20:20, 26, 27.
6 Onde tekɔ l’ohetoheto oko Ezekiyɛlɛ? Onde sho tshutshuyamaka lo sambisha oko Paulo? Tekɔ la lotumu lakɔ lâmɛ. Sho pombaka tetemala la kotsha ɔkɛndɛ aso wa mbewola anyaso oyadi kânga hawoyasha, kana wekɔ lo mendjola ndo hawolange. Nunu di’anto akina nto wayokoka mbetawɔ losango la Diolelo ndo mbuta ɔnɛ: “Shu tayutsho kame la nyu, ne dia shu takuki lukumu ati: [Nzambi, NW] eko kame la nyu.” (Zek. 8:23) Ngandji kokaso Nzambi la onyaso atotshutshuya dia sho tetemala! Tekɔ la lotumu: lotumu la sambisha!