Onde Sho Mbewoyaka Anto Dui Dia Nzambi Dimɛna?
1 Yeso Kristo ekɔ ombetsha woleki embetsha tshɛ wa la nkɛtɛ. Nde akatɛkɛtaka yoho ya minanda etema w’anto, mbaotsha nsaki ndo akâkeketshaka lo vɔ sala akambo w’ɛlɔlɔ. (Mat. 7:28, 29) Wetshelo ande waki l’etshina paka lo Dui dia Nzambi. (Luka 24:44, 45) Nde akasha Jehowa Nzambi lokumu la kɛnɛ tshɛ kakandeyaka ndo kakandetshaka. (Joa. 7:16) Yeso akatshikɛ ambeki ande ɛnyɛlɔ k’ɔlɔlɔ efula oma lo yoho yakandewoyaka anto Dui dia Nzambi dimɛna.—2 Tim. 2:15.
2 Ɔpɔstɔlɔ Paulo lawɔ ekɔ ɛnyɛlɔ ka dimɛna lo kɛnɛ k’endana la yewo ya mbewoya anto Dui dia Nzambi. Nde kombalɛka anto paka Afundelo ato; koko akalembetshiyaka kɛnɛ kakandalaka ndo akakanaka la tɔ yimba, ɛ̂nya hwe l’ekimanyielo ka Dui dia Nzambi ɔnɛ Yeso aki Kristo. (Etsha 17:2-4) Ndo Apolo lawɔ, ombeki wakeyaka ntɛkɛta efula, “akeyaka afundelu ololo”; nde akawaewoyaka dimɛna, ɛ̂nya mɛtɛ la wolo lo sɛkɛ.—Etsha 18:24, 28.
3 Tônge Embetsha wa Dui dia Nzambi: Nshi yaso nyɛ, esambisha wa Diolelo kondjaka etombelo w’ɛlɔlɔ lam’alakanyawɔ anto w’etema ɛlɔlɔ lo kanaka la wɔ yimba oma lo Bible ndo lo shilaka kɛnɛ kofundami lɔkɔ. Ɔnangɛso ɔmɔtshi akakambe la Ezekiyele 18:4 ndo l’avɛsa akina wafɔna ladiɔ dia tshutshuya osambisha ɔmɔtshi nde l’ase paroisɛ kande asato dia vɔ kana yimba lo kɛnɛ k’endana l’ekomelo k’anto wa kɔlɔ la k’anto w’ɛlɔlɔ. Oma lo sawo diakɔ, ase Ɛkɛlɛzia wakamɛ mbeka mɛtɛ, ko ɔmɔtshi a l’atei awɔ akayokitɛ lo mbetawɔ mɛtɛ. Mbala kekina, onto ɔmɔtshi laki la nsaki akalɔmbɛ kadiyɛso kɛmɔtshi ɔnɛ alembetshiya omɛnde lakatonaka mɛtɛ bonde kahasale Ɛmɛnyi wa Jehowa afɛstɔ wa nshi y’eotwelo la nɔɛlɛ. Kadiyɛso akâle avɛsa walembetshiya dikambo sɔ lo dibuku Comment raisonner, ko pami kakɔ aketawɔ. Wadiɛnde akangɛnangɛna efula dia kɛnɛ kakandasale ko nde akate ate: “Tayoya lo nsanganya yanyu.” Ko omɛnde aketawɔ!
4 Tokambe l’Ekimanyielo Katoshawɔ: Olimu Aso wa Diolelo la ekongelo ka losanganya l’olimu toshaka alako w’amɛna efula dia tokimanyiya lo sho mbewoya anto Dui dia Nzambi. Apandjudi efula wakɛnya lowando lawɔ lo dikambo di’ɔsɔnwɛlɔ wa toho tokoyawɔ takafundama ndo takasalema di’ɔlɔlɔ aso, tasungana ndo t’eshika. Dibuku Comment raisonner à partir des Écritures ndola la tokanyi tɛnya woho wa mbeya sala asawo ndekana 70 w’ohomba w’endana la Dui dia Nzambi. Wetshelo tshɛ w’atshina wa lo Bible wahomba oyoyo mana fundo mɔtshama lo dibuku Ewo Katɔla Otsha lo Lɔsɛnɔ la Pondjo. Wekelo 24 la 25 wa lo Manuel pour l’École du ministère théocratique tɛnyaka woho wasala embetsha wa tomanamana dia mbɔtshiya, mbala ndo mbɔtɔnganyiya avɛsa wa Bible dimɛna. Sho pombaka kamba la dihomɔ sɔ tshɛ diakawatotondjɛ.
5 Naka tayewoyaka Dui dia Nzambi dimɛna, kete tayɛna dia diɔ “dieko la lumu, . . . Dio mbeyaka nimbitela tukanyi la saki ya utema” ya wanɛ wasambishaso. (Heb. 4:12) Etombelo wayotokondja lo kambaka la diɔ ayototshutshuya dia sho nyomoleka mbuta mɛtɛ la dihonga di’efula!—Etsha 4:31.