Tokimanyiya Anyaso Dia Vɔ Mbeya Ohomba Wa Bible
1 Yeso akasha ambeki ande kɛnɛ kaki la wɔ ohomba. Sho mbalaka lo Luka 24:45 (NW) ɔnɛ: “Nde akâdihola timba hwe dia vɔ mpotɔ Afundelo.” Nde akeyaka ɔnɛ dia vɔ mbetawɔma le She, vɔ wakahombe mbeka ndo shihodia Dui dia Nzambi, Bible. (Osam. 1:1, 2) Esambishelo kaso kekɔ l’oweso wâmɛ. Sho nangaka tatɛ wekelo wa Bible dia ‘ndakanya anto lo vɔ ndjela kɛnɛ tshɛ kakate Yeso.’ (Mat. 28:20) Tele la dikambo sɔ lo yimba, tende alako amɔtshi wokoki monga ohomba lo waendelo w’eyoyo.
2 Naka takake etshina ka sawo diaso dia ntondo lo dibuku “La Bible: Parole de Dieu ou des hommes?”, kete sho kokaka nyomota ɔnkɔnɛ:
◼ “Lekɔ lo nanga kotɛ dikambo dikina diɛnya ohomba a mɛtɛ w’alako wa lo Bible. Anto efula mɛnaka ɔnɛ ekɔ wolo mbokana l’anto akina dimɛna. Akokaso sala dia nɔngɔsɔla diokanelo diasaso l’anto wotodingi? [Tolonge okadimwelo, tofole dibuku lo lɛkɛ 168, Od. 15, ko sho mbala Mateu 7:12. Tokotsha tokanyi tele lo od. 16.] Ekɔ ɛnyɛlɔ kekina ka lomba katanaso l’alako wa lo Bible. Lam’ayomoya nto, layoyokɛnya alako washa Bible dia lɔsɛnɔ l’atshukanyi l’ɔngɛnɔngɛnɔ efula.” Tôkane la nde dia kalola a ndjosawola lo lɛkɛ 170-172, lɛnɛ atanaso alako wa lo Bible lo dikambo dia lɔsɛnɔ la nkumbo l’ɔngɛnɔngɛnɔ.
3 Naka onto akɛnya saki ka Bible, kete ondo sho kokaka tatɛ wekelo wa Bible ɔnkɔnɛ:
◼ “Suke l’onto tshɛ nangaka mbidjasɛ l’andja wa wɔladi ndo wa shikaa. Lam’ele ɔsɔ ekɔ saki k’onto tshɛ, bonde kele ofukutanu l’akambo a ngala efula l’andja nganɛ? [Tolonge okadimwelo.] Traduction du monde nouveau kɛnyaka dihole dia tana okadimwelo a dimbola sɔ lo Bible.” Tofole lo lɛkɛ 1655 ko sho mbɛ̂nya ɔtɛ a dui “Sujets de conversation bibliques,” No. 23a: “Auteur de la détresse mondiale.” Tâle 2 Koreto 4:4. Tôlembetshiya ɔnɛ Nzambi ayodiaka Diabolo ndo ayoshikikɛ andja wa wɔladi ndo w’ɔngɛnɔngɛnɔ wa pondjo. Tâle Enyelo 21:3, 4. Sho kokaka ndjota l’ɔkɔngɔ diko ɔnɛ: “Lam’ayomoya nto, layoyokɛnya avɛsa amɔtshi walembetshiya bonde kakokayɛ nongamɛ andja waha la mpokoso.”
4 Naka yoho ya tatɛ wekelo mbala kakɔ ɔtɔi akasha etombelo w’ɛlɔlɔ, kete sho kokaka tota lam’ayotokalola le onto akɔ ɔnɛ:
◼ “Mbala ketshi takasha ɛkɔkɔ ɛmɔtshi wɛnya ohomba wa mbeka Bible. Onto lalanga ndjaɛnya pâ lo dikambo sɔ kokaka monga l’ɔngɛnɔngɛnɔ dia mbishola kɛnɛ katolaka Nzambi. [Tâle Joani 17:3.] Ekongelo kaso k’olakanyelo wa Bible ambokimanyiya nunu di’anto dia vɔ mbeya awui efula lo kɛnɛ kakatolake Nzambi ndo lo woho wokokiso mbɔngɛnyangɛnya.” Tɔshi dibuku Ewo, tênde ɛtɛ w’awui wa totshapita ndo towɛnya woho wasalema wekelo wa Bible.
5 Lam’akimanyiyaso anto w’etema ɛlɔlɔ dia vɔ mbeya ohomba wa lânde wa Dui dia Nzambi, sho mbaelaka ekimanyielo koleki ɔlɔlɔ tshɛ. Lomba lokokiwɔ kondja lam’ayowokieka mbeyaka monga “utamba a lumu” ndo mbasha ɔngɛnɔngɛnɔ wa woke.—Tuk. 3:18.
[Caption on page 8]
Sanganya Y’olimu Ya Diɛla Woke
Lomingu la Diɛla Woke 2
Taahe 10: Waewoyelo ndo Waewoyelo wendana l’Olimu Aso wa Diolelo. Sha kɔmatɛrɛ l’alapɔlɔ w’olimu wa lo wodja (naka wekɔ suke) kâmɛ ndo wɔnɛ w’etshumanelo wa ngɔndɔ ketshi.
Taahe 15: “Onde Sho Mbewoyaka Anto Dui dia Nzambi Dimɛna?” La wembola ndo ekadimwelo. Sha ndo kɔmatɛrɛ mɔtshi lo dibuku Comment raisonner, l’ɔtɛ a dui wahɔnyi wata ɔnɛ “Ɛkɔkɔ wa Sɛdingola Bible,” lɛkɛ 51-2.
Taahe 20: “Lɔsɛnɔ la Pondjo Lɔnɛ.” (od. 1-5) L’ɔkɔngɔ wa tɛkɛta yema lo tshena pe lo mbɔtwɛlɔ k’awui wele lo od. 1, sɛngɔla apandjudi ahende wakoka dia vɔ sala ɛnyɛlɔ kɛnya toho tele lo od. 2-5. Tɛtɛ dia oyango ele tatɛ mbetsha anto Bible.
Osambu 128 ndo dɔmbɛlɔ dia ndjihelo.
Lomingu la Diɛla Woke 9
Taahe 10: Waewoyelo. Alapɔlɔ wa falanga.
Taahe 20: Bonde ka Mbisha Jehowa? Ɔkɛtshanyelo l’asa dikumanyi pende oma lo atshina w’akambo wele lo sawo dia lo lɛkɛ 28-31 la Tshoto y’Etangelo ya Tshaka Fudu 1, 1996 (lo Falase). Awui asɔ kokaka salema nto oko sawo oma le ekumanyi kɛmɔtshi.
Taahe 15: “Lɔsɛnɔ la Pondjo Lɔnɛ.” (od. 6-8) Tɛkɛta dia ɛlɔlɔ wa kamba la yoho ya tatɛka mbeka l’anto mbala kakɔ ɔtɔi. Diɛnyɛlɔ dia toho tele lo od. 6-7 oma le apandjudi wa tomanamana. Sɛngɔla ampokami dia vɔ kɔndɔla nganɛ wakawamɛ mbeka l’anto amɔtshi ko mbala ka ntondo kakawɛnana la wɔ. Lam’akawɔsɛngɔla mbala kakɔ ɔtɔi dia mbeka la nde Bible, pami kɛmɔtshi akate ate: “Kawɔ. Nyɔtɔ. Dimi nangaka mbeka.” Wakamɛ mbeka la nde; lomingu lakayele, nkumbo kande k’otondo waki lawɔ, ko esadi eto vɔ tshɛ wakamɛ mbɔtɔ lo nsanganya ndo la ntshɔ l’olimu w’esambishelo. Keketsha ampokami dia vɔ ndja la dikatshi diawɔ di’okotsha dia Olimu Aso wa Diolelo wa Lotena Eduwa 1996 lo losanganya l’olimu layaye.
Osambu 129 ndo dɔmbɛlɔ dia ndjihelo.
Lomingu la Diɛla Woke 16
Taahe 5: Waewoyelo.
Taahe 20: “Tekɔ la Lotumu.” La wembola ndo ekadimwelo. Sha kɔmatɛrɛ lo tshena pe l’odingɔ 13-16 wa Tshoto y’Etangelo ya Tshango 1, 1988 (lo Falase), lɛkɛ 28-9.
Taahe 20: Têtsha Anto Bible lo Yoho ya Vɔ Pama. Dako oma le omendji w’olimu. Ambolekana ɔnɔnyi w’otondo mbeso lo kamba la dibuku Ewo dia mbetsha anto Bible. Aha la tamu, ambeki amɔtshi wambodishidiya, ndo akina waya tshale lo wekelo. Wakatokeketsha dia sho mbidja wolo dia mbetsha anto Bible lo yoho ya kimanyiya eyoyo dia vɔ mbeka mɛtɛ esadi esadi, lo vɔ kamba la tɔ lo nsɛnɔ yawɔ ndo koma as’etshumanelo. Dikatshi di’okotsha dia Olimu Aso wa Diolelo wa Lotena Eduwa 1996 akatosha alako w’ɛlɔlɔ efula dia sho koma embetsha wa tomanamana. Ohola awui amɔtshi lo tshena pe wokokiso sala dia nyomoleka mbeya ndakanya, lo ndjela od. 3-13. Ko wɛ tɛtɛ lo kɛnɛ kahombaso sala dia kimanyiya ombeki lo nde mbeta la mɛtɛ wedi, oko adilembetshiya od. 14-22. Ala od. 15, 17, 20-1. Sɛdingola awui amɔtshi w’ohomba wɛnya etombelo w’ɛlɔlɔ wakakondja apandjudi wa l’etshumanelo. Sha ekeketshelo wayoleka tshutshuya anangɛso lo vɔ mbetsha anto Bible.
Osambu 85 ndo dɔmbɛlɔ dia ndjihelo.
Lomingu la Diɛla Woke 23
Taahe 5: Waewoyelo. Nta tɛdikɔ tambɔsama dia esambishelo ka lushi la difɛstɔ la Diɛla Woke 25.
Taahe 15: “Ehamelo Ayɛ Wɛname!” Dako oma le ekumanyi.
Taahe 10: Ekadimwelo lo Wembola Anyu. Ɔkɛtshanyelo l’ampokami.
Taahe 15: Ekanda wayotɔlɛkanɛ lo Tshango. Tayɔlɛkanɛ Traduction du monde nouveau la dibuku La Bible: Parole de Dieu ou des hommes? L’ekimanyielo ka dibuku “Toute Écriture”, lɛkɛ 319-24, ɛnya woho woleki Traduction du monde nouveau Bible kina: tɔ sukɛka ndo tombolaka lokombo la Nzambi (od. 1-2); ekadimwelo katɔ ka pudipudi mbetɛka awui hwe (od. 6); tɔ kekɔ ehomɔ ka wolo l’olimu (od. 22-3). Oma lo tokanyi tele lo lɛkɛ 189 la dibuku La Bible: Parole de Dieu ou des hommes? lɔngɔsɔla yoho mɔtshi ya sawo ndo kotalɔngɔsɔdi ɛnyɛlɔ kɛmɔtshi. Tɛdikɔ t’eshika pombaka mbɔsama dia kalola la tenda anto wakɛnya saki.
Osambu 180 ndo dɔmbɛlɔ dia ndjihelo.
Lomingu la Diɛla Woke 30
Dikumanyi kawɔlɔngɔsɔlɛ ekongelo kawɔ vamɛ lo ndjela ehomba wa l’etshumanelo.