Ngande Wayotosala La Nkumbo Kaso Na?
1 Efula l’atei aso tekɔ la nkumbo kele kema lo mɛtɛ. Sho kombolaka mɛtɛ mɛna anto asɔ walangaso efula mbɔtɔ l’ɔnɔngɔ aso lo mboka ka lɔsɛnɔ! Sho ndjakiyanyaka ɔtɛkɔya lo dikambo dia nshi yawɔ yayaye ya pondjo djekoleko naka wekɔ laso luudu ɔtɔi. Ondo aya ɛnɔnyi efula mbeso lo pemba mbaotsha saki k’akambo a mɛtɛ, koko hatokoke mbuta ɔnɛ ndoko di’ɔlɔ diayotomba.
2 Kânga lam’akasambishaka Yeso, “ndu anangu kûmbetawo.” (Joa. 7:5) Osangɔ ɔmɔtshi, ase nkumbo kande wakafɔnya ɔnɛ nde ambodjɔ dadi. (Mako 3:21) Koko, Yeso kombaɔsa oko anto wahalowanaki. Anango wakayetawɔka akambo a mɛtɛ l’ɔkɔngɔ diko. (Etsha 1:14) Jakɔba, laki la nde nyangɛwɔ ɔtɔi, akayokomaka ekundji k’etshumanelo k’Akristo. (Ngal. 1:18, 19; 2:9) Naka sho nangaka monga l’ɔngɛnɔngɛnɔ wa mɛna ase nkumbo kaso wambetawɔ akambo a mɛtɛ, kete totetemale la pemba mbâsambisha lokumu l’ɔlɔlɔ la Diolelo.
3 Tâkeketshake, Aha Mbâlɛmbia: Anto wakasambishaka Yeso wakakeketshamaka, vɔ kɔsɔkishamaka. (Mat. 11:28, 29) Nde kombalɛmbiaka la wetshelo wakiwɔ kokokaka shihodia. Naka sho nangaka keketsha ase nkumbo kaso l’ashi wa mɛtɛ, kete tânɔshake dikɔhɔ ɔtɔi lo mbala ɔtɔi, aha tshondo ya kati tɔɔ! Omendji ɔmɔtshi weteta akate ate: “Wanɛ wakondja etombelo w’ɛlɔlɔ le ase nkumbo yawɔ ele wanɛ wemula yambalo yawɔ lo mbâsambishaka yema tshitshɛ ko tshika.” Lo yoho shɔ, kânga anto watona mbeyaka ndjombola wembola ko ndjokitɛ lo monga la mposa k’akambo wa mɛtɛ.—1 Pet. 2:2; enda ndo lo 1 Koreto 3:1, 2.
4 Akristo efula wotshukanyi wakasambisha elonganyi awɔ dimɛna efula lo tshikaka okanda ɔmɔtshi hwe lo lɛkɛ la dikatshi lokoki kotola yambalo yawɔ. Kadiyɛsɔ kɛmɔtshi kakasalaka ɔsɔku akekaka ndo l’anande lo yoho y’omɛnde mbaoka, asha elembetshiyelo wokoki monga ohomba le nde. Esangɔ ɛmɔtshi nde akawombolaka ate: “Ɛlɔ lakeki dui sɔ kapanda lo wekelo ami. Wɛ akanayɛ lo dui sɔ?” L’ɔkɔngɔ diko, omɛnde akayetawɔ mɛtɛ.
5 Tonge la Dilɛmiɛlɔ ndo la Lotutsha: Opandjudi ɔmɔtshi wa omoto akate ate “kânga ase nkumbo wekɔ la lotshungɔ la tshikala lo kanyi yawɔ.” Ɔnkɔnɛ sho la dia monga la dilɛmiɛlɔ lam’ashawɔ tokanyi tawɔ kana lam’atohonolɛwɔ di’aha sho mbâsambisha. (Und. 3:7; 1 Pet. 3:15) Naka tayonga l’otema a lotutsha otsha le wɔ, la ngandji, lo mbâlongaka dimɛna, kete tayokokaka kondja waaso wa mbâsambisha dimɛna. Ekɔ ɔlɔlɔ monga la solo dia lotutsha, oko adiɛnya kɛnɛ kakakomɛ Okristo ɔmɔtshi wakakikɛ, ɛnɔnyi 20 w’etondo, pâ yakawɛnyaka wadiɛnde laki komonga ombetawudi oko nde. Lam’akamɛ tshikitana wadiɛnde, nde akate ate: “Lamboka Jehowa losaka lo woho wakandakimanyiya dia dimi monga la solo dia lotutsha, nɛ dia lɛna etombelo akɔ ɛlɔ kɛnɛ: wadiɛmi ambotatɛ ndjela mboka ka lɔsɛnɔ!”
6 Ngande wahombayɛ sala la nkumbo kayɛ na? Ondo, oma lo lɔkɛwɔ layɛ l’ɔlɔlɔ l’Okristo ndo oma l’alɔmbɛlɔ wâlɔmbɛyɛ, ‘wɛ mbeyaka ndjâkotola otsha le Jehowa.’—1 Pet. 3:1, 2.