Eohwelo—Dikambo Di’ohomba Efula
1 Lushi la Lomingu, Asase a Ndjoko 23, l’ɔkɔngɔ wa ɛɔtwɛlɔ ka onya, tayosala Eohwelo ka nyɔi ka Kristo. (Luka 22:19) Mɛtɛ, dikambo sɔ diekɔ ohomba efula! Lo nama kɔlamelo yande otsha le Jehowa polo lo nyɔi, Yeso akɛnya ɔnɛ onto kokaka tshikala la kɔlamelo le Nzambi kânga la ntondo ka dikambo dimɔtshi dia pâ efula, ɔsɔku mbakandɛnya ɔnɛ Jehowa sunganaka monga omboledi. (Heb. 5:8) Ndo nto, oma lo nyɔi kande, Kristo akakimɔ olambo w’onto wa kokele wahombama dia tshungola anto, ko mbisha wanɛ wele la mbetawɔ diaaso dia monga la lɔsɛnɔ la pondjo. (Joa. 3:16) Lo mbɔtɔka lo losanganya l’Eohwelo, sho mɛnyaka lowando laso l’oma ka tshina di’otema lo ngandji ka Jehowa ndo l’olambo waki Yeso lo dikambo diaso.
2 Wambotokeketsha sho tshɛ dia ndjela ekongelo ka walelo wa Bible kakalɔngɔsɔma oma lo Asase a Ndjoko 18 polo 23 ndo katanema lo Calendrier des Témoins de Jéhovah 1997. Lo wedi okina, ɔkɛtshanyelo wa tshapita 112-16 ya dibuku Onto Loleki Woke lo Tena Tshɛ l’atei a nkumbo ayotokimanyiya dia sho ndjasha tshɛ lo lomingu loleki ohomba l’Ɔkɔndɔ w’otondo w’onto.
3 Onde sho kokaka nyomosambisha efula l’etena ka Eohwelo? Lo Asase a Ndjoko, apandjudi efula wayokamba la diaaso nɛ dia wikɛndɛ etanu w’etondo dia vɔ monga ambatshi mboka wa tshanda. Lande na kahayonge ndo wɛ na? Sho tshɛ kokaka sala efula dia mɛnya anto ohomba wa mbɔtɔ lo losanganya la Eohwelo. Lam’ele lɔ layonga Lushi la Lomingu, hatonga pâ le anto efula dia vɔ mbɔtɔ lɔkɔ. Katele wanɛ tshɛ weka Bible kâmɛ ndo anto akina walanga. Tɔkɛtshanya la wɔ lo kɛnɛ kotami lo lɛkɛ 127 la dibuku Ewo, odingɔ 18, lo kɛnɛ kendana la difɛstɔ diahomba salemaka ɔnɔnyi tshɛ.
4 Tɔngɛnɛngɛnɛ dikambo sɔ, dioleki ohomba lo 1997, lo mbeyaka dimɛna kitshimudi ya nyɔi ka Yeso le so. Katonge lâwɔ la dikɔlɔ sɔ dia Asase a Ndjoko 23 diayosala Akristo wa mɛtɛ wa l’andja w’otondo Eohwelo ka Nyɔi ka Yeso la kɔlamelo tshɛ.