Naka Sawo Diekɔ Dimɛna, Kamba La Diɔ!

¹ Olimu Aso wa Diolelo toshaka tena tshɛ weoho wa mbɔtwɛlɔ ya lo sawo lo dikambo di’esambishelo, ko sho kondjaka tokanyi t’eyoyo dia kunula saki k’onto lo losango la Diolelo. Ondo ngɔndɔ tshɛ sho salaka wolo dia mbeka mbɔtwɛlɔ shɔ ya lo sawo ɔtɔi kana efula. Koko, apandjudi mbeyaka mɛna ɔnɛ weke ka kondja etena ka kamba la tɔ mbala efula ko nkina yamboya lo sawo di’oyoyo dia l’Olimu Aso wa Diolelo. Mɛtɛ, aha anto tshɛ mbakoka mbeka mbɔtwɛlɔ ka lo sawo k’oyoyo la ntondo ka manyamanya kɛnɛ ka ntondo.

² Lo wedi okina, nunu di’ambatshi mboka ndo di’apandjudi akina mbetshaka wenya efula l’esambishelo. Ndo nto, tshumanelo efula kindjakindjaka mbilo yawɔ lo mingu ngana tsho. L’ahole wa ngasɔ, apandjudi ngɛnangɛnaka monga la toho t’eyoyo ta sawoya anto ndo tokanyi t’eyoyo dia mbeya sambisha. Dui sɔ mbâkimanyiyaka dia vɔ ndjalowanya. Ndo nto, olimu awɔ mongaka dimɛna efula, ntɔka elowa efula, ndo ngasɔ mbongawɔ l’akoka wa tondoya ekakatanu wahomana la wɔ.

³ Oyadi kakɔna tshɛ, naka takalɔngɔsɔla mbɔtwɛlɔ kɛmɔ ka lo sawo kakimanyiya dia memula saki k’onto dimɛna, kete totetemale kamba la tɔ! Kema ohomba tshika kamba la sawo dia dimɛna lam’ediɔ l’etombelo w’ɔlɔlɔ. Ohomba ele diɔtɔnganyiya l’okanda washaso anto ngɔndɔ kakɔ. Aha la mbohɛ tokanyi tele l’Olimu Aso wa Diolelo, tɔsɔtɔlɛ akambo wele ohomba efula walangaso mbidja lo mbɔtwɛlɔ kaso ka sawo.

⁴ Ɔnkɔnɛ, lam’alongolaso numɛlɔ k’oyoyo k’Olimu Aso wa Diolelo, tôhɔ di’asawo wa lɔkɔ wekɔ paka alako mbatoshawɔ. Naka sho kokaka kamba la wɔ, kete ekɔ dimɛna efula. Ko naka tekɔ la mbɔtwɛlɔ kekina kele l’etombelo w’ɔlɔlɔ lo mbilo kaso, kete tokambe la tɔ! Kɛnɛ kele ohomba ele, ‘kamba olimu aso woho wahombama’ lo yoho ya dimɛna efula, lo tana anto wasungana la wɔ ndo mbâkimanyiya dia vɔ koma ambeki.​—⁠2 Tim. 4:⁠5.