Ana, Nyu Nyekɔ Ɔngɛnɔngɛnɔ Aso!
1 Ɛlɔngɔlɔngɔ l’esekaseka, onde nyu mbeyaka didjango dia Jehowa di’ɔnɛ sho la dia nyodja l’elimu wa l’etshumanelo? (Euh. 31:12; Osam. 127:3) Ekɔ ɔngɛnɔngɛnɔ efula dia nyu monga l’atei aso l’ɔtɛmwɛlɔ wa Jehowa. Etema aso salanganaka lam’anyɛnaso nyodjashi ki lo nsanganya, nyahokamɛ la yambalo tshɛ. Sho ngɛnangɛnaka djekoleko lam’atshanyu tshɛ dia mbisha kɔmatɛrɛ l’ɛtɛkɛta anyu nyamɛ. Etshumanelo k’otondo ngɛnangɛnaka lam’atshanyu asawo wanyoshawɔ lo Kalasa k’Olimu wa Teokrasi, lam’asambishanyu l’ohetoheto l’ɔnɔngɔ aso, ndo lam’okaso ɔnɛ nyu sambishaka asekanyu wa la kalasa l’embetsha anyu la dihonga tshɛ.—Osam. 148:12, 13.
2 Sho nangaka nyu mbeya dia tekɔ l’ofunu wa mamba lo menda loshilambo lanyu, ɔlɔtɔ anyu wa kɔmba, lɔkɛwɔ lanyu l’ɔlɔlɔ ndo woho walɛmianyu epalanga. Ɔngɛnɔngɛnɔ aso tɛkɔyaka etena kɛnyanyu ɔnɛ ‘nyekɔ lo mbohɔ Otungi anyu wa Woke’ lo ndjadjɛka eyango wa teokrasi.—Und. 12:1; Osam. 110:3.
3 Nyototɛke Eyango Anyu: Dikɛnda dimɔtshi dia pami di’ɛnɔnyi enanɛi akatɛ omendji wa distrikɛ ate: ‘Ntondotondo, lekɔ lo nanga batizama, ko l’ɔkɔngɔ layolanga kamba l’etshumanelo lo sɔnɔrizasiɔ la lo mbishaka anto loseke (micro), lo mbishaka ekimanyielo kami, lo kahanyaka ekanda, lo mbadiaka lo wekelo wa dibuku la wa Tshoto y’Etangelo. L’ɔkɔngɔ, layoyolanga monga okambi w’olimu, ko ndjokoma ekumanyi. Layoyonga ndo ombatshi mboka ko ntshɔ lo kalasa k’ambatshi mboka. L’ɔkɔngɔ layoyolanga ntshɔ lo Bɛtɛlɛ, monga omendji w’otshimbedi kana wa distrikɛ.’ Ande lowando lakandɛnya lo diɛsɛ dia kambɛ Nzambi lee!
4 Lo wedja esato walɔmbwama oma le filialɛ kaso, tekɔ lo nyanga ɛlɔngɔlɔngɔ efula wetawɔ ndjâkimɔ, lo ndjela yimba yele l’Isaya 6:8. Ata wohandjudi mbilo kaso vwa mɛnyaka ɔnɛ oyangelo w’ɔngɔnyi wa lomombo kema dui dia lomba. (Und. 2:17-19) Ande dui dia tshundju nyanga ɛngɔnyi wa lo nyuma lo kambɛ Jehowa l’anima aso tshɛ lo yema ya wonya nyɛ yambotshikalɛ dikongɛ di’omusu nɛ diele l’anya wa Satana le! (Mat. 6:19-21, 33) Kalasa k’Olowanyelo w’Ekambi kekɔ hwe lo dikambo di’ɛlɔngɔlɔngɔ w’enyemba wele ekambi w’olimu kana dikumanyi l’etshumanelo. Wanɛ wakotsha lo kalasa kɛsɔ tomamaka l’ahole tshɛ ndo tokambaka oko ambatshi mboka wa pondjo kana wa lânde, omendji w’otshimbedi kana wa district. Ɔnkɔnɛ, ana wɛnaso ɛlɔ kɛnɛ mbayonga ambatshi mboka l’emendji weteta loyi!
5 Lam’atanyahame lo demba ndo lo nyuma, sho ngɛnangɛnaka nyɛna nyakotsha eyango anyu. (Enda lo Luka 2:52.) Ɔnɔnyi tshɛ, nunu l’atei anyu komaka apandjudi wahatabatizama, ko l’ɔkɔngɔ ndjokotshaka kɛnɛ kalɔmbama dia monga ekambi wa Jehowa wambobatizama. Ɔlɔ aso tɛkɔyaka etena kanyɛnaso nyɔsa olimu w’ombatshi mboka wa tshanda, kana kɔtɔnyu l’olimu wa tena tshɛ. Aha la tamu, ana, nyu nyekɔ ɔngɛnɔngɛnɔ aso ndo kiɔkɔ ya dimɛna efula ya lotombo le Shɛso ka l’olongo. Jehowa anyɔtshɔkɔlɛ heyama!—Tuk. 23:24, 25