Emendji Watɔlɔmbɔla: Omendji W’olimu
1 Omendji w’olimu ndjashaka efula lo dikambo tshɛ diendana l’ehamelo k’olimu w’esambishelo lo mbilo k’etshumanelo kawɔ. Ɔnkɔnɛ, nde ekɔ l’ɔkɛndɛ w’ohomba efula wa tokimanyiya dia sho kotsha ɔkɛndɛ aso wa sambisha lokumu l’ɔlɔlɔ. Oko wende osambisha w’ohetoheto, nde nɔngɔsɔlaka akambo tshɛ wendana l’esambishelo. Oko wende ombetsha wakoka mɛtɛ, nde kimanyiyaka apandjudi dia vɔ koma tomanamana l’olimu.—Ef. 4:11, 12.
2 Ekumanyi kɛsɔ kênda ekambi w’olimu woshawɔ ɔkɛndɛ w’ekanda, wa periodikɛ ndo wa kahanyaka mbilo. Nde la dia mendaka dia ngɔndɔ tshɛ sho monga l’ekanda efula, periodikɛ ndo dihomɔ dikina dia kamba la diɔ l’esambishelo. Mbala ɔtɔi l’ɔnɔnyi, nde mendaka dɔsie dia mbilo dia mbeya nkombo yakɔna yahatakoke mbɔtɔ, ko nde nɔmba anangɛso wakoka mɛtɛ dia vɔ ntshɔ lɛkɔ.
3 Omendji w’olimu la dia nɔngɔsɔla weho w’esambishelo wotshikitanyi oko: esambishelo ka lo kartie yandawɔ ekanda, l’ɛsɛsɛ ndo l’asanga. Nde nɔngɔsɔlaka waa randevu w’esambishelo wasungana lomingu tshɛ, oyadi kânga lo nshi ya vakashi. Nde ndjashaka la wangasanu le ambeki wa Bible. Nde ndjatshutshuyaka dia kimanyiya wanɛ wahayosambisha ngɔndɔ tshɛ kana wanɛ wahayosambisha. Nde ndjashaka l’osalosalo l’olimu w’ambatshi mboka ndo nɔmbɔlaka ekongelo k’ɔnɛ: Ambatshi Mboka Kimanyiyaka Akina.
4 Oko wende ose Kɔmite k’Olimu ka l’etshumanelo, omendji w’olimu mbishaka tokanyi tendana l’etshikitanu wahomba salema l’elui wa Wekelo wa Dibuku. Lam’ayande dia ndjembola olui anyu wa Wekelo wa Dibuku, tetshake ndo tohandjake sambisha la nde.
5 Ase etshumanelo tshɛ la dia kamba kâmɛ l’ɔngɛnɔngɛnɔ lo ndjela tɛdikɔ tɔsa omendji w’olimu. Dui sɔ diayotokimanyiya dia sho monga tomanamana l’olimu wa mbetɛ anto ambeki ndo dia monga l’ɔngɛnɔngɛnɔ efula l’olimu aso.