Totohomba Monga Embetsha, Aha Paka Esambisha Eto
1 Onto ɔmɔtshi akate ate: “Ɛmɛnyi wa Jehowa wambolodia nkɛtɛ k’otondo l’esambishelo kawɔ.” Ngande wakakoke dikambo sɔ salema na? Aha la wolo w’onto, koko oma lo wolo wa nyuma ka Nzambi kakondja ekambi ande oko wakambawɔ la tɛdikɔ ta weho weho tɔsama dia kotsha lotumu lakawakondja la sambisha la ndakanya.—Zek. 4:6; Etsha 1:8.
2 Ekanda wekɔ yoho mɔtshi ya dimɛna efula ya sho kamba olimu aso w’esambishelo. L’edja k’ɛnɔnyi, Ɛmɛnyi wa Jehowa wambofunda ndo wambokahanya miliyara y’abuku, tobukubuku, periodikɛ, ndo tokatshikatshi dia mbewoya anto lokumu l’ɔlɔlɔ la Diolelo. Alapɔlɔ wa l’Annuaire 1997 mɛnyaka ɔnɛ otondjelo w’ekanda akadɛ. Ɛlɔ kɛnɛ, Bible ya Traduction du monde nouveau ndekana miliyɔ 91 yambofundama. L’edja k’ɔnɔnyi ɔtɔi, lofulo la Tshoto y’Etangelo la Réveillez-vous ! wafundama l’États-Unis lakadɛ % 7,1. L’Allemagne, lofulo lakɔ lakadɛ % 35. Ndekana etenyi ɔtɔi k’asato ka periodikɛ yakafundama lo filialɛ kakɔ yakatomama la Russie.
3 Lande na kele ohomba efula w’ekanda ngasɔ na? L’andja w’otondo, tambokondja etombelo wa diambo oma lo woho watokeketshawɔ dia sambishaka lo dihole tshɛ diele anto. Efula l’atei aso wambofudia olimu awɔ lo sambishaka l’ahole w’anto tshɛ, l’ɔsɛsɛ, ndo l’ahata wandawɔ ekanda, diɔ diakɔ diambodɛ lofulo l’ekanda wambotosha anto wɛnya saki. Efula l’atei awɔ wakakondja diaaso paka lo pai kana watakondjaka diaaso dia mboka losango la Diolelo. Dia shidiya ohomba ɔsɔ, tshumanelo diekɔ la ekanda efula wa kamba la wɔ lo toho totshikitanyi t’esambishelo.
4 L’Oyango Akɔna Washaso Anto Ekanda? Oyango aso kema paka wa mbisha anto ekanda ko pe. Lotumu la mbetɛ anto ambeki nemanɛka l’awui ahende: sambisha la mbetsha. Ntondotondo, tekɔ la diɛsɛ dia sambisha lokumu l’ɔlɔlɔ la Diolelo, kɛdikɛdi mbokiya anto ɔnɛ Diolelo mbele tshɔi y’elongamelo kele l’anto. (Mat. 10:7; 24:14) Ekanda aso woki etshina lo Bible ekɔ yoho mɔtshi y’oshika ndo ya dimɛna efula ya nomialomia saki ndo mbewoya akina ewo kendana la Diolelo.
5 Ka hende, naka sho nangaka mbetɛ anto ambeki, kete sho la dia mbaetsha akambo tshɛ wakatodjangɛ Yeso. (Mat. 11:1; 28:19, 20) Lɔsɔ nto, ekanda kambaka olimu w’ohomba efula lo weolo wadjaso dia tɔtɔmiya akambo wa mɛtɛ l’etema a wanɛ weka Bible, lo mbâkimanyiya dia vɔ koma ambeki wa Yeso.
6 Wanɛ walongola ekanda mbeyaka monga ‘ambuki wa dui,’ koko ekɔ yema wolo dia vɔ monga atshi adiɔ naka onto hâkoke. (Jak. 1:22-25) Tɔtɔi toto mbakoma ambeki aha l’onto mbâlɔmbɔla. (Etsha 8:30, 31) Vɔ wekɔ l’ohomba w’ombetsha mbâkimanyiya dia vɔ mbetawɔ akambo a mɛtɛ wele l’Afundelo. (Etsha 17:2, 3) Oyango aso ele mbâkimanyiya dia vɔ pama polo ndo lo ndjakimɔ le Nzambi ndo batizama, ndo dia mbâlowanya dia vɔ koma tomanamana dia mbetsha anto akina.—2 Tim. 2:2.
7 Ohomba wa Mamba Wekɔ w’Embetsha Monga Efula: Lam’asambishaso, sho mbutaka lokumu l’ɔlɔlɔ lo sɛkɛ. Koko, mbetsha onto kɛdikɛdi mbôlakanyaka yema yema. Lam’ele oma l’esambishelo mbeya onyaso onto losango la Diolelo, wetshelo mbôkimanyiyaka dia nde mbetawɔ lokumu l’ɔlɔlɔ ndo mbôsokoyaka l’etsha. (Luka 8:15) Ombetsha salaka awui efula lâdiko dia mbewoya; nde nembetshiyaka; kanaka l’onto yimba dia shidiya tamu tshɛ, mbishaka tolembetelo, ndo mbetawoyaka onto.
8 Efula kaso totohomba monga embetsha, koko aha paka esambisha eto. (Heb. 5:12a) Okahanyelo w’ekanda ekɔ etenyi kɛmɔtshi k’ohomba efula k’olimu aso, koko okotshelo w’oyango wa hende w’olimu aso nemanɛka la kɛnɛ kasalaso dia mbetsha. Kânga mbele sho kokaka ngɛnangɛna l’etena kashaso anto ekanda, naka sho nangaka kotsha olimu aso dimɛna, kete hatohombe mɛna okahanyelo w’ekanda oko oyango aso wa komelo. (2 Tim. 4:5) Ekanda washaso anto ndiholaka mboka dimɛna dia sho kondja waaso wa mbetsha anyaso anto akambo wa mɛtɛ.
9 Tokalole dia Tembola Anto dia Tatɛ Mbeka la Wɔ Bible: Ekɔ mɛtɛ dia onto tshɛ l’atei aso amboshaka anto abuku amɔtshi, tobukubuku ndo waa periodikɛ, diɔ diakɔ diakatakondja anto wa membolaka. Sho la dia nɔngɔsɔla wonya dia ntshɔka tena la tena tɔhɛtshahɛtsha saki kawɔ. Oyango aso wa ntondo wakalolaso dia towaenda kema dia towasha ekanda ekina, koko dia tâkeketsha dia vɔ mbadia wɛnɛ wakawɔshi ndo kondja wahɔ oma lɔkɔ. Lo yɛdikɔ yakɔna yototohama shamɛ otondonga onto ɔmɔtshi kondjaka tena la tena dia ndjotokimanyiya dia sho kondja ewo k’oshika na?—Joa. 17:3.
10 Tofudia saki tshɛ kakɛnya onto la kanyi ya tatɛ mbeka la nde Bible, oyadi lo biukubuku Kakɔna Katɔlɔmba Nzambi? kana lo dibuku Ewo Katɔla Otsha lo Lɔsɛnɔ la Pondjo. Ekanda ehende ɛsɔ mbewoyaka losango la Diolelo lo yoho yokoki onto shihodia esadi. Lo biukubuku Katɔlɔmba, onto kokaka mbeka atshina a wetshelo tshɛ wele lo Bible. Dibuku Ewo kimanyiyaka dia mbetsha onto akambo a mɛtɛ l’ɔm’ɔmɔ, koko aha l’okakatanu, lo yoho yokɛma hwe, ndo lo tshena pe.
11 Oko wadilembetshiya dikatshi di’okotsha di’Olimu Aso wa Diolelo wa Ngɔndɔ k’Esambele 1996, ekongelo ka wetshelo ka wɔdu kimanyiyaka ombetsha lo ndakanya ndo ombeki lo nde mboka. Ongaka la dikatshi sɔ di’okotsha tena tshɛ dia mboholaka toho ta ndakanya takɛnama ɔnɛ tekɔ dimɛna efula. Alako amɔtshi wele lɔkɔ mɛnyaka woho wa ndjasha l’otema ɔtɔi le ombeki, tokanyi tongana tahombanyu sawola mbala tshɛ kekanyu, woho wa kadimula wembola wahaleke mendana la kɛnɛ kekanyu, woho wakoka ombetsha la ombeki tayâlɔngɔsɔlaki la ntondo, ndo woho wa nɔmbɔla ombeki otsha l’ɔlɔngɔswamelo waki Jehowa. Lo ndjelaka alako asɔ, efula l’atei aso, kâmɛ ndo wanɛ wêke eyoyo, wayonga l’akoka wa mbetsha anto lo yoho ya vɔ pama.
12 Alapɔlɔ Ɛmɔtshi Wɛnya Etombelo w’Ɛlɔlɔ Wakakondjama: Biukubuku Katɔlɔmba la dibuku Ewo kimanyiyaka efula dia mbetɛ anto ambeki esadi esadi. Kam’akandalongola biukubuku Katɔlɔmba, ɔnangɛso ɔmɔtshi ladjasɛ lo wodja wa Bolivie akakambe la yɔ dia tatɛ mbeka la pami kɛmɔtshi. L’ɔkɔngɔ wa ngɔndɔ nyɛi, lo losanganya la distrikɛ, pami kɛsɔ akonge l’ɔnɔngɔ a wanɛ wakalange batizama l’ɔngɛnɔngɛnɔ efula!
13 Anto efula sokoyamaka dia kimɔ nsɛnɔ yawɔ le Jehowa lam’akomawɔ l’ekomelo ka dibuku Ewo. L’etshumanelo kɛmɔtshi ka l’Angola, lofulo l’anto wakekaka Bible l’apandjudi lakadɛ oma lo 190 polo lo 260, koko lofulo l’anto wakɔtɔka lo nsanganya lakadɛ l’ahende, oma lo 180 polo lo 360, l’ɔkɔngɔ wa ngɔndɔ nyɛi tsho ya dibuku Ewo tatɛ la kambema lo mbilo kɛsɔ. Yema oma lâsɔ, akayongaka ohomba efula dia mbata etshumanelo k’oyoyo.
14 L’ɔkɔngɔ wa nde tatɛ wekelo ande wa ntondo lo dibuku Ewo, ɔnangɛso ɔmɔtshi akate ate mongaka “wɔdu efula naka ombetsha mbokaka paka wembola eto, mbadiaka avɛsa amɔtshi wasungana, ndo ndjashikikɛ ɔnɛ ombeki amboka.” Nde akafɔnyaka nshi tshɛ ɔnɛ paka apandjudi wa tomanamana mɛtɛ mbele l’akoka wa mbeka l’anto lo yoho ya vɔ pama ndo ɔnɛ nde ndamɛ hakokaki pondjo, koko nde akayokaka dia nde aki l’akoka ndo akate ate: “Naka dimi kokaka disala, kete onto tshɛ kokaka.”
15 Oma lo mbekaka l’anto Bible, dui diele etenyi kɛmɔtshi k’olimu aso, mbakotshaso oyango wa mbetɛ anto ambeki. Wanɛ wele l’akoka wa kamba lo yoho shɔ y’olimu kondjaka ɔngɛnɔngɛnɔ w’oshika oma lɔkɔ ndo ɛlɔlɔ efula. Anto wate ndo lo dikambo diaso ɔnɛ sho ‘sambishaka diolelo dia Nzambi aha la mbishɛ ndoko dui.’—Etsha 28:31.
[Caption on page 8]
Emendji Walɔmbɔla: Ɔnɔmbɔdi Wa Wekelo Wa Tshoto Y’etangelo
1 Tshoto y’Etangelo Mbewoyaka Diolelo Diaki Jehowa ekɔ ehomɔ ka ntondo kakamba l’‘ɔhɔmbɔ wa kɔlamelo ndo wa kɛsɔ’ dia toshaka mbo ya ndɛ ya lo nyuma l’‘etena kasungana.’ (Mat. 24:45) Ekumanyi kalɔmbɔla Wekelo wa Tshoto y’Etangelo ekɔ l’ɔkɛndɛ wa mamba oko wende ombetsha wakoka washa ɛnyɛlɔ k’ɔlɔlɔ lo lɔsɛnɔ lande l’Okristo.—Romo 12:7; Jak. 3:1.
2 Dia mbetsha dimɛna efula, ɔnɔmbɔdi wa Wekelo wa Tshoto y’Etangelo la dia mbidja weolo dia ndjalɔngɔsɔlaka lomingu tshɛ. Atshake ngasɔ la yambalo tshɛ ndo nɔmbaka. Woho wayashande le etshumanelo mɛnamaka oma lo weolo w’eshika wadjande dia etema aso munandema l’akambo wekaso. Nde tɛtɛka l’akambo woleki ohomba wele lo wekelo ndo tokimanyiyaka dia mɛna woho wɔtɔnɛwɔ l’ɔtɛ a dui wa sawo.
3 Lam’ayalɔngɔsɔlande, nde la dia tâdisha avɛsa la ntondo woho wa mbeya nganɛ wakambemawɔ. Nde mbetshaka Ɔtɛkɛta wa Nzambi la ntondo lo keketshaka etshumanelo dia vɔ kamba la Bible dimɛna lam’ekawɔ. Naka ampokami hawosha kɔmatɛrɛ lo dui dimɔtshi di’ohomba kana wambohɛ ponola lokanyi lele lo divɛsa dimɔtshi di’ohomba efula, nde mumbolaka dimbola dikina nto dia vɔ tɛkɛta dikambo diakɔ. Ngasɔ mbatokimanyiyande dia sho shihodia dimɛna awui wekaso ndo mbeya woho wa kamba lawɔ lo nsɛnɔ yaso.
4 Ɔnɔmbɔdi wa Wekelo wa Tshoto y’Etangelo ndjatshutshuyaka yema yema dia ndowanya akoka ande wa wetshelo. Nde hatshɔbɔla koko tokeketshaka dia sho mbisha kɔmatɛrɛ l’ɛtɛkɛta aso shamɛ, lo tshena pe, ndo tondolaka okanda lo ndjɛshi. Nde kokaka toholaka tena dimɔtshi ɔnɛ onto la ntondo lasha kɔmatɛrɛ la dia kadimula lo dimbola diofundami mbala kakɔ ɔtɔi ndo lo hiembola. Kɔmatɛrɛ nkina y’oma le ampokami mbeyaka mendana l’avɛsa, keketsha kanyi yoshami, kana woho wa kamba l’awui akɔ. Ɔnɔmbɔdi wa Wekelo wa Tshoto y’Etangelo ntshaka tshɛ dia nomialomia saki k’onto tshɛ lo mbisha kɔmatɛrɛ lo mbâsɛngiyaka dia vɔ nɔngɔsɔlaka Tshoto y’Etangelo l’onto ndamɛ kana lo nkumbo.
5 Oko weso ‘anto wetshama oma le Jehowa,’ sho ngɛnangɛnaka ‘apami asɔ wele oko weshasha,’ ɛnyɛlɔ oko ɔnɔmbɔdi wa Wekelo wa Tshoto y’Etangelo, ɔnɛ ‘latotshaka olimu wa wolo wa . . . mbetsha.’—Is. 54:13; Ef. 4:8, 11; 1 Tim. 5:17.