Jehowa Mbishaka Wolo Woleki Wɔnɛ Wokôngaka L’onto
1 Ambeki tshɛ wa Yeso wakalongola diɛsɛ dia woke efula diendana l’olimu w’ekila mbut’ate, olimu w’Okristo. (Mat. 24:14; 28:19, 20) Koko, oma l’ekokele aso ndo oma l’ekakatanu wa dikongɛ di’akambo nɛ, sho ndjɛnaka mbala mɔtshi oko sho hatokoke sala olimu ɔsɔ.
2 Naka dikambo sɔ diambotokomɛ, sho koka keketshama oma lo mukanda wakafundɛ ɔpɔstɔlɔ Paulo Akristo w’akitami wa la Kɔrɛtɔ. Nde akafunde ate: “Ne dia shu teko la diango ne dia mumba lu dikitshelu dia kete.” (2 Kor. 4:7) Paulo akashikikɛ ate: ‘Nɛ dia sho takakondja olimu ɔnɛ . . . , sho hatohekɔ.’ (2 Kor. 4:1) Eelo mɛtɛ, sho mbeyaka ɔnɛ tetemala la sambisha lokumu l’ɔlɔlɔ ‘aha la pekɔ’ kema dikambo dia tshitshɛ, oyadi tekɔ akitami kana ‘ɛkɔkɔ ekina.’ Tekɔ l’ohomba wa wolo w’oma le Nzambi, ‘wolo woleki wɔnɛ wokongaka l’onto.’—Joa. 10:16; 2 Kor. 4:7b.
3 Ekɔ dimɛna efula lo mɛna lokema l’Ɛmɛnyi wasambisha l’ohetoheto kânga l’atei wa wekamu wa wolo, hemɔ ya weolo kana wola wa mamba. Sho tshɛ pombaka mbeya ɔnɛ Jehowa tosukɛka l’olimu aso w’esambishelo. Ɔnkɔnɛ, tatotshikɛke ɔkɔmwɛlɔ kana wɔma dihole dia vɔ mbɔdia ohetoheto aso, koko ‘totetemale la kondja wolo le Nkumadiɔndjɔ ndo wolo wa kudu kande.’—Ef. 6:10; Tuk. 24:10.
4 Woho wa Kondja Wolo a Nzambi: Tɔlɔmbɛ Nzambi l’etete dia nde tosukɛ ndo tosha wolo ande. (Romo 12:12; Fil. 4:6, 7) Oma lâsɔ ko sho ndjaɛkɛ le Jehowa l’otema aso tshɛ, tayashikikɛ ɔnɛ nde ayotosha wolo woleki wɔnɛ wokongaka l’onto. (Tuk. 3:5) Tâdia ɛkɔndɔ wa nsɛnɔ y’ekambi wa Jehowa wele lo periodikɛ; ɛkɔndɔ akɔ mɛnyaka dia nde kimanyiyaka ekambi ande dia vɔ mbikikɛ ehemba. Tatokakitɔnake l’anangɛso wa l’etshumanelo, ndo tatetshake nsanganya.—Romo 1:11, 12; Heb. 10:24, 25.
5 Tosale tshɛ kokokiso ntsha woho wa sho monga l’akoka wa kondja wolo wa Jehowa, wolo woleki wɔnɛ wokongaka l’onto ndo wayotokimanyiya di’aha sho pekɔ olimu w’ohomba efula wa sambisha Diolelo.