Emendji Watɔlɔmbɔla—Anɔmbɔdi wa Wekelo wa Dibuku
1 Ekɔ diɛsɛ dia mamba dia ekumanyi kana okambi w’olimu wele l’akoka monga ɔnɔmbɔdi wa Wekelo wa Dibuku wa l’Etshumanelo. Nde ekɔ l’ɔkɛndɛ wa woke wa mendaka ehomba wa lo nyuma wa wanɛ wele l’olui ande. Ɛkɛndɛ ande wekɔ weho esato.
2 Ombetsha Wakoka: Ɔnɔmbɔdi wa Wekelo wa Dibuku wa l’Etshumanelo pombaka ndjalɔngɔsɔlaka dimɛna lomingu tshɛ dia manyaka ase olui ande awui wekawɔ fundo. Nde monaka woho wa sho ngɛnangɛna awui wekaso. Lo dihole dia ndamɛ mbishaka kɔmatɛrɛ efula efula, nde mbokaka wembola ekina w’ohomba dia kɛnɛmɔla atshina w’akambo wele lo wekelo naka kokaka. Kɛnɛ kahombande ndjatshutshuya dia ntsha ele pɛtshahɛtsha wekelo, tondja alako oma lɔkɔ ndo sala dia onto tshɛ tɛkɛta. Oyango ande ele tôdia lo nyuma, mbika epole ɔsɛkɛ l’akambo wa lo wekelo wahombaso kamba la wɔ lo lɔsɛnɔ laso, ndo minanda timba ndo etema w’anto.—1 Tes. 2:13.
3 Katshunga Kakimanyiya Ɛkɔkɔ: Ɔnɔmbɔdi wa wekelo wa dibuku ekɔ ‘oko eshamelo oma lo lɔpɛpɛ ndo oko okombɔ oma lo ngembe.’ (Isa. 32:2) Nde mɛtɛ kokɛka anto tshɛ wele l’olui ande ndo mendaka dia kana ɔmɔtshi a l’atei awɔ ambɔkɔmɔ dia mbôkimanyiya lo nyuma.—Ezek. 34:15, 16; 1 Tes. 2:7, 8.
4 Nde Sambishaka l’Ohetoheto: Ɔnɔmbɔdi wa wekelo wa dibuku mbidjaka yimba dia mbɔsa tɛdikɔ woho w’onto tshɛ lele l’olui ande sambishaka efula. Nde mbishaka ɛnyɛlɔ l’olimu w’esambishelo ka lokumu l’ɔlɔlɔ, eya ɔnɛ ase olui ande wayowokoya l’etete, ohetoheto, ndo wangasanu wele lande l’olimu w’esambishelo. (Kol. 4:17; 2 Tes. 3:9) Tena la tena, nde ntshaka tshɛ dia sambisha l’onto tshɛ la l’olui ande. Naka sho nangaka fudia ewo kaso ka sambisha ndo ka ndakanya, kete ɔnɔmbɔdi wa wekelo wa dibuku koka tokimanyiya dia kotsha oyango ɔsɔ.—1 Tim. 4:16; 2 Tim. 4:5.
5 Tekɔ mɛtɛ la diɛsɛ dia kondja anto asɔ wele oko weshasha wonga wonya tshɛ suke dia tokimanyiya lo nyuma ndo tosukɛ la ngandji tshɛ. (1 Tes. 5:14) Nyɛsɔ toshake kɔmatɛrɛ tena tshɛ lo wekelo wa dibuku ndo tosha lonya la kɔlamelo l’olimu w’esambishelo ka lokumu l’ɔlɔlɔ dia mɛnya ɔnɛ sho ngɛnangɛnaka yɛdikɔ shɔ ya dimɛna efula y’oma le Jehowa.—Heb. 10:25.