‘Akokami ntsha na?’
1 ‘Akokami ntsha na?’ Aha la taamu, dimbola sɔ diaki lo wɛɔngɔ waki djui ya tshitshɛ y’ambeki wa Bible yakalɔmbɔmaka oma le Charles Taze Russell l’ɛnɔnyi wa 1870. Oko wakawayahamaka lo eokelo kawɔ ka lolango laki Nzambi, ambeki wa Bible asɔ wa ntondo wakayambolaka dia mbeya kɛnɛ kakawakoke sala dia kimanyiya anto akina dia vɔ mbeya asangwelo waki Nzambi. Mbisha anto wa l’andja w’otondo ewo ka Bible kakawatakondjaka, aki mɛtɛ shakasaka y’olimu.
2 Tekɔ la diɛsɛ nɛ dia vɔ wakatondoya olimu ɔsɔ wa wolo. Woho akɔna na? Ɔm’ɔmɔ l’atei awɔ akasale yema yande y’olimu yakɛnamaka oko anyanya ko tete yaki ohomba, ko ɛlɔ kɛnɛ Ɛmɛnyi wa Jehowa wambeyama l’andja w’otondo, waya ɔlɔngɔswamelo wele l’apandjudi wa Diolelo suke la miliyɔ shamalo, wakamba lo tshumanelo oko 90000 lo wedja 234 ndo l’asɛnga wa ndjale ya weke!—Is. 60:22.
3 Dja lonya la wolo ayɛ tshɛ: Ekɔ ohomba le so sho tshɛ dia mbidja lonya l’olimu wa woke wakatatshi Yeso ɔnɛ wayokambema lo shi nyɛ y’ekomelo. (Mako 13:10) Mɛtɛ olimu ɔnɛ hakoke kambema paka oma le djui ya tshitshɛ ya dikumanyi tsho kana kitshama paka l’ahɛka w’ambatshi mboka. Lo mbuta mɛtɛ, Okristo tshɛ wamboyakimɔka ekɔ l’ɔkɛndɛ w’ohomba wahombande kotsha. Sho tshɛ kokaka mbidja lonya l’olimu w’esambishelo lo yoho mɔtshi. (1 Tim. 1:12) Oyadi lo yɛdikɔ yakɔna tshɛ yakambaso olimu ɔnɛ, sho ndjâkimanyiyaka shamɛ ndo kimanyiyaka anto akina.—1 Tim. 4:16.
4 Onto tshɛ kokaka nto sukɛ la wolo tshɛ nkumbo k’Akristo k’anto l’ɔnango lo weho ekina w’ohomba efula. Sho kokaka sukɛ nsanganya ya l’etshumanelo lo ndjiɔtɔka nshi tshɛ ndo lo mbishaka kɔmatɛrɛ la wangasanu tshɛ. (Osam. 122:1, 8, 9) Sho kokaka ntsha kɛnɛ kakokaso ntsha dia mbetɛ etshumanelo pudipudi oma l’awui a mindo. Sho kokaka nkimɔka falanga lo yɛdikɔ yɛdimi l’ekondjelo kaso dia sukɛ olimu wakambema l’andja w’otondo. Sho kokaka mɔmbaka kana solaka Mbalasa ka Diolelo. Onto tshɛ kokaka pɛtshahɛtsha yimba ya ngandji ndo ya kâmɛ l’atei w’etshumanelo lo kimanyiyaka eyoyo, akɛnda, ndo esombe.—Kol. 3:12, 14.
5 Lâsɔ wɛ kokaka ndjambola wate: ‘Akokami ntsha na?’ Kânga mbokoki kɛnɛ kasalayɛ mɛnama oko anyanya, naka wɛ ntsha kɛnɛ keyɛ l’akoka wa ntsha, kete wɛ ekɔ lo kimanyiya etshumanelo dia tɔ monga nge, dia tɔ mongaka l’ohetoheto ndo la lonyuma la wolo. Ɔnkɔnɛ, sho tshɛ tekɔ l’ɔkɛndɛ wa nɛmiyaka lokombo la Jehowa!