Ayolekaka mbika epole ɔsɛkɛ lo Bible!
1. Lo etatelo, Tshoto y’Etangelo yakatondjamaka ntondo dikambo dia waa na, ndo L’Âge d’Or dikambo dia waa na?
1 Numɛlɔ ka ntondo ka periodikɛ L’Âge d’Or kakatombe lo Ngɔndɔ ka dikumi 1, 1919. Tɔ kaki ehomɔ k’ohomba efula lo olimu w’esambishelo. Lande na? Nɛ dia tɔ kakalɔngɔsɔma lo yoho ya lânde dikambo dia anto tshɛ. Koko Tshoto y’Etangelo kondekaka mendana la anto tshɛ, nɛ dia lo edja ka ɛnɔnyi efula yɔ yakɔsama oko periodikɛ kakalekaka mendana la “limba la tshitshe l’ekoko.” (Luka 12:32) Apandjudi wa Diolelo wakangɛnangɛna otombelo w’okanda ɔsɔ w’oyoyo wele lo edja ka ɛnɔnyi efula lofulo la kɔpi ya L’Âge d’Or yakatombaka yakaleke lofulo la kɔpi ya Tshoto y’Etangelo la fwa.
2. Lokombo lakɔna leyama L’Âge d’Or ɛlɔ kɛnɛ, ndo oyango akɔna waki la periodikɛ kɛsɔ lo etatelo?
2 Periodikɛ L’Âge d’Or aki la oyango wa mɛnya anto ɔnɛ Diolelo diaki Kristo dia Ɛnɔnyi Kinunu mbayoshidiya ekakatanu w’anto ndo diɔ mbayela anto eleko k’ɔngɛnɔngɛnɔ. Lo edja k’ɛnɔnyi akumi wakayele, etshikitanu efula wakasalema lo kɛnɛ kendana la L’Âge d’Or dia kotsha ehomba wotshikitanyi waki l’anto lo etena kɛsɔ. Lo 1937 wakayomɛ mbelɛ periodikɛ kɛsɔ ɔnɛ Consolation. Lo 1946 wakayomɛ kielɛ Réveillez-vous !, lokombo leyamatɔ ɛlɔ kɛnɛ.
3. Réveillez-vous ! ekɔ ehomɔ ka wolo efula lo okotshamelo wa prɔfɛsiya kakɔna?
3 Oma ko etatelo katɔ, periodikɛ kɛnɛ kakakimanyiya heyama dia olimu w’esambishelo kambema efula oma ko 1919. (Mat. 24:14) Koko, lo nshi yaso nyɛ yahomba akambo salema la shamanya, ambɛnama dia ekɔ ohomba nyomosala etshikitanu ekina lo kɛnɛ kendana la Réveillez-vous !
4. a) Kakɔna kahomba onto sala naka nde nangaka ndjohandɔ lo “lushi la kele ka [Jehowa]”? b) Lo ndjela Enyelo 14:6, 7, kakɔna katɛ ‘ondjelo watafumbɔ l’atei w’olongo’ anto tshɛ dia vɔ sala?
4 Miliyɔ y’anto ngɛnangɛnaka mbadia Réveillez-vous ! nɛ dia vɔ wekɔ la asawo watɛkɛta dia awui efula wahendana la ɔtɛmwɛlɔ lo yoho ya dimɛna efula. Aha la tâmu, efula k’anto wɔtɔ lo Eohwelo ɔnɔnyi tshɛ mbadiaka Réveillez-vous! mbala la mbala. Koko, naka onto kombolaka ndjohandɔ lo “lushi la kele ka [Jehowa],” kete nde pombaka sala awui efula aha tsho mbadiaka ekanda aso mbala la mbala.—Zef. 2:3; Eny. 14:6, 7.
5. a) Tatɛ oma lo Réveillez-vous ! wa Ngɔndɔ ka ntondo 2006, dikambo diakɔna diayoleka mbikama epole ɔsɛkɛ? b) Anto efula mbeyaka tshutshuyama dia sala dui diakɔna, ndo lo okotshamelo wa prɔfɛsiya kakɔna?
5 Ɔnkɔnɛ, tatɛ oma lo Ngɔndɔ ka ntondo 2006, Réveillez-vous ! ayoleka mbika epole ɔsɛkɛ lo Diolelo diaki Nzambi. Periodikɛ kɛnɛ kayokeketsha ambadi dia vɔ nyomoleka nyanga ekandwelo ka ekakatanu awɔ lo Bible ndo tɔ kayonyomoleka mbika epole ɔsɛkɛ lo olembetshiyelo washa Bible lo kɛnɛ kendana la akambo weta nshi nyɛ. Lo yoho shɔ mbayoleka ambadi shihodia awui weta nshi nyɛ ndo ondo kɛnɛ kadiawɔ ayowatshutshuya dia nyomoleka mbeya awui wendana la Jehowa.—Zek. 8:23.
6, 7. a) Ngande wayɔlɔngɔsɔma Réveillez-vous! dia kimanyiya anto efula dia kamba la 1 Tesalonika 2:13? b) Ngande wayanga tondjamaka Réveillez-vous! ndo otshikitanu ɔsɔ wayonga la shɛngiya lo ɛtɛkɛta engana?
6 Réveillez-vous ! ayotetemala tɛkɛta dikambo dia awui wayasha anto tshɛ. Koko, Réveillez-vous ! ayolekaka mbika epole ɔsɛkɛ lo Bible. (1 Tes. 2:13) Lama wele Tshoto y’Etangelo tɛkɛtaka dia awui a wake wa lo Bible ndo Réveillez-vous ! ayolekaka tɛkɛta di’awui efula wotumbi oma lo Afundelo, mɛnamaka dia ndoko ohomba tetemala tondja Réveillez-vous ! mbala hiende lo ngɔndɔ. Ɔnkɔnɛ tatɛ oma lo numɛlɔ ka Ngɔndɔ ka ntondo 2006, Réveillez-vous ! ayotondjamaka mbala ɔtɔi lo ngɔndɔ. Dikambo sɔ diayokitshakitsha olimu wa ɔlɔngɔswɛlɔ, okadimwelo ndo wa otomelo wa ekanda aso.
7 Otshikitanu ɔsɔ wayonga la shɛngiya lo pursa oko 40 ya ɛtɛkɛta watondjama Réveillez-vous ! Lo ɛtɛkɛta efula, Réveillez-vous ! ekɔ lo tondjama mbala ɔtɔi lo ngɔndɔ kana mbala nyɛi lo ɔnɔnyi. Ndoko otshikitanu wayonga lo kɛnɛ kendana la otondjelo wa Tshoto y’Etangelo.
8. Ngande wayokoka apandjudi kamba la Réveillez-vous! kâmɛ la Tshoto y’Etangelo?
8 Apandjudi mbeyaka mbishaka anto numɛlɔ ɔtɔi ka Réveillez-vous ! ndo numɛlɔ hiende kana ɔtɔi ka Tshoto y’Etangelo ya ngɔndɔ kɛsɔ. Wanɛ washa anto Réveillez-vous ! wayokoka kamba la numɛlɔ ɔtɔi lo edja ka ngɔndɔ k’otondo aha la vɔ tshikitanya mbɔtwɛlɔ yawɔ l’atei a ngɔndɔ, oko wasalemadiɔ nshi nyɛ.
9. Olimu akɔna wayotetemala Réveillez-vous! sala?
9 Tatɛ oma lo numɛlɔ katɔ ka ntondo ka lo 1919, periodikɛ kɛnɛ kakelamɛka ntondo L’Âge d’Or, ko oma lâsɔ Consolation, ndo kakianɛ Réveillez-vous ! kambokimanyiya efula lo olimu w’esambishelo. Sho nɔmbaka dia Jehowa tetemala tshɔkɔla okahanyelo wa periodikɛ kɛnɛ lo yoho y’oyoyo yayangatɔ tondjamaka ndo dia tɔ kimanyiya anto efula w’oma lo ‘wedja tshɛ, waoho tshɛ ndo ɛtɛkɛta tshɛ’ dia vɔ mbɔsa Diolelo dia Nzambi oko tshɔi ya elongamelo kawɔ.—Eny. 7:9.