‘Nyosungukalake’
1 L’ɔkɔngɔ wa nde kɔndɔla awui wa weke wakahombe ndjɛnama lo nshi y’ekomelo ka dikongɛ nɛ di’akambo, Yeso akakeketsha ambeki ande ate: ‘nyosungukalake.’ (Mako 13:33) Lande na kahomba Akristo nsungukalaka na? Nɛ dia tekɔ lo nsɛna l’etena kamboleka wâle ka l’ɔkɔndɔ w’anto. Sho la dia menda ɔlɔlɔ di’aha ndjolala djɔ lo nyuma. Sho kokaka ndjolala djɔ lo nyuma naka hatoyɔngɛnangɛna olimu wakatosha Jehowa dia kamba lo etena kɛnɛ k’ekomelo. Olimu akɔna ɔsɔ na?
2 Jehowa nangaka di’ekambi wakinde sambisha lokumu l’ɔlɔlɔ la Diolelo diande lo nkɛtɛ k’otondo—Diolelo diele tshɔi y’elongamelo le anto. Woho wakambaso kâmɛ l’ɔlɔngɔswamelo waki Nzambi mɛnyaka dia tekɔ Akristo wa mɛtɛ, wanɛ weya tena nɛ diasɛnaso ndo wele l’ohomba wa kimanyiya anto akina dia mboka “aui wa lumu la pondjo.” (Joa. 6:68) Lo kamba olimu w’ohomba efula ɔnɛ l’ohetoheto, sho mɛnyaka dia tekɔ lo nsungukala lo nyuma.
3 Tombotshutshuyama dia Sambisha: Oko weso Ɛmɛnyi wa Jehowa, sho la dia nanga olimu aso. Ngandji kokaso Nzambi ndo wanyaso anto totshutshuyaka onto l’onto dia sambisha. (1 Kor. 9:16, 17) Lo ntsha ngasɔ, tayoyashimbɛ shamɛ ndo nshimbɛ wanɛ watohokamɛ. (1 Tim. 4:16) Toyashikikɛ dia nsambishaka mbala la mbala, awui wendana l’ɛlɔmbwɛlɔ koleki dimɛna kahatongaka l’anto—Diolelo diaki Nzambi, edja tshɛ kêke dikambo sɔ ohomba!
4 Ekɔ dikambo di’ohomba diatotshutshuya dia kamba olimu aso la shamanya, dikambo diakɔ ko: efungefunge ka woke kayokoma l’etena kakatatetemala l’olimu ɔnɛ. Lam’ele hateye lushi kânga wonya, ekɔ ohomba sho nsungukalaka ndo monga suke wonya tshɛ, lo ndjaɛkɛka le Jehowa lo dɔmbɛlɔ. (Ef. 6:18) Woke woke w’olimu w’esambishelo wekɔ lo tatetemala la pama Koko aya ndoko edja, lushi lɔmɔtshi, olimu w’esambishelo woleki woke l’ɔkɔndɔ w’anto wayokoma lo kondoko.
5 La kɔlamelo tshɛ, toyele didjango diaki Yeso dia ‘nsungukalaka.’ Dikambo sɔ diamboleka monga ohomba efula nshi nyɛ oleki nshi ya ntondo. Nyɛsɔ tokitanyiya dikambo sɔ aha la tshimbatshimba. Nshi tshɛ, nyɛsɔ tɔsɛnake ndo tosungukalake lo nyuma ndo tosalasalake l’olimu waki Jehowa. Eelo, nyɛsɔ ‘tosungukalake ndo tɔsɛnake.’—1 Tes. 5:6.