Todianganya Nkumu Y’ɛlɔlɔ ya Ɛngɔ Kɛmɔtshi Ka Dimɛna Efula
1 Aya ɛnɔnyi 117 wele Tshoto y’Etangelo lo mamɛ mɛtɛ kele lo Bible. Kakianɛ numɛlɔ tshɛ ofundama kɔpi 18950000 l’ɛtɛkɛta 125. Réveillez-vous! ekɔ nto omamedi w’edjedja wa Dui dia Nzambi ndo kakianɛ kɔpi 15730000 yekɔ lo tomba lo ɛtɛkɛta 80.—Enda lo Kolosai 1:23.
2 Periodikɛ Kotshaka Ohomba Ɔmɔtshi wa lo Nyuma: Miliyɔ y’anto w’etema ɛlɔlɔ kondjaka ɛlɔlɔ oma lo Tshoto y’Etangelo la Réveillez-vous! yâkimanyiya dia kotsha ehomba wa lo nyuma oma lo asawo wakeketsha mbetawɔ. Ɛnyɛlɔ oko, lo Tshoto y’Etangelo ya Yâta Afusa 1, 1996, takeke sawo dimɔtshi diatɛkɛta di’ohomba wa ndjaɛkɛ le Jehowa ndo lo Dui diande. Tshoto y’Etangelo ya Asase a Ndjoko 1, 1996 yakatokeketsha dia sho kɔkɔmala l’olimu wa Jehowa ndo tetemala la mbôkongela. Ande woho wakatakeketshama lam’akatasɛdingola pɔlɔfɛsi ka Zɛfaniya lee! L’ɔkɔngɔ takonge l’ɔkɛtshanyelo wakɛtsha asolo lo dikambo dia kɔlamelo y’Okristo lo Tshoto y’Etangelo ya Mɔmbi 1, 1996. Numɛlɔ ka Mam’ɛkɔngɔ la Tange 1, 1996 akatɛtɛ dia ohomba wa mbalaka la mbekaka Dui dia Nzambi tena la tena. Asawo asɔ wakatokimanyiya dia sho nyomoleka shihodia Dui dia Nzambi ndo nyomonga la lowando lo dikambo dia Diolelo diande.
3 Lo wedi okina, periodikɛ yekɔ l’asawo wasungana ndo w’eshika lo kɛnɛ k’endana la lɔkɛwɔ langɛnyangɛnya Nzambi, la dionga di’Okristo ndo akambo akina w’ohomba efula. Yɔ tɛkɛtaka akambo w’ohomba w’endana la lɔsɛnɔ laso. Ɔnkɔnɛ, sho kokaka sɛna lɔsɛnɔ la dimɛna efula oma ko kakianɛ la ntondo k’alaka wa Nzambi w’endana la ɛngɔ kɛmɔtshi ka dimɛna efula lo nshi yayaye kotshama.—Is. 48:17; 1 Tim. 6:19.
4 Naka tayalaka lo tshena pe kɛnɛ katama lo lɛkɛ 4 la numɛlɔ tshɛ ka Réveillez-vous! tayɛna dia sunganaka mɛtɛ sho nɔmba jurunalɛ shɔ. Dihole tshɛ diadjasɛ anto, oyadi ɛlɔngɔlɔngɔ kana dikumanyi, ekɔ walelo wa dimɛna efula le wɔ. Lɔkɔ vɔ mbutaka ɔnɛ: “Awui wata Réveillez-vous! mendanaka l’ose nkumbo tshɛ. Vɔ mɛnyaka woho wa ntokomɛ ekakatanu wa lo nshi yaso nyɛ. Vɔ mbewoyaka, tɛkɛtaka dia mbekelo ya wedja wotshikitanyi ndo di’akambo w’ɛtɛmwɛlɔ la wa diewo. Koko, vɔ hawokomɛ lâsɔ. Vɔ ntshɔka ka koma y’akambo ndo tondjaka kitshimudi ya mɛtɛ y’awui watomba, aha la mbɔtɔ l’awui wa pɔlitikɛ ndo monga la shɔnɔdi ya nkoho y’alemba. Kɛnɛ koleki tshɛ ele, periodikɛ kakɔ mbishaka ɛkɔkɔ w’eshika wa mbetawɔ ɔnɛ kem’edja nto, Otungi ayokotsha alaka ande lam’ayondodja andja w’oyoyo wa wɔladi ndo waha la wâle wayɔhɛna dikongɛ nɛ di’akambo dia kɔlɔ ndo diaha l’ɔlɛmbɛ.”
5 Tɔlɛkɛ Anto Periodikɛ: Tônge la lokaho lo kɛnɛ k’endana la ndɛkɛ anto Tshoto y’Etangelo la Réveillez-vous! (Enda lo 1 Timote 6:18.) Toyale la numɛlɔ mɔtshi l’anya dia tayilɛkɛka wanɛ wayokoka pomana la so. (Und. 11:6) Sho tshɛ, kâmɛ ndo ɛlɔngɔlɔngɔ l’apandjudi w’eyoyo, sho kokaka ndjasha tshɛ l’odianganyelo wa periodikɛ ngɔndɔ kɛnɛ lo kambaka la wɛnyanyelo wa lo tshena pe wa asawo wata akambo weta nshi nyɛ wele lo numɛlɔ yeke ka tomba. Tomanyamanya kɛnɛ kele lɔkɔ ndo toyilɛkɛ anto l’otema ɔtɔi ndo l’eshikikelo tshɛ.
6 Lo Tshoto y’Etangelo la Réveillez-vous!, waewoyelo walanga onto tshɛ mbeya wekɔ lɔkɔ. Toyitshike anto; ɔsɔ ekɔ yoho mɔtshi y’ɔlɔlɔ efula ya mbâkimanyiya lo vɔ mboka lokumu l’ɔlɔlɔ l’ɔnɛ ɛngɔ kɛmɔtshi ka dimɛna efula kayasuke la salema.