Ekadimwelo Lo Ambola Anyu

◼ Ngande wakoka onto tshɛ mbisha lonya dia anto ndjelaka nsanganya ya l’etshumanelo dimɛna? (Euh. 31:12)

L’ɔtɛ wa dilɛmiɛlɔ di’efula diele laso otsha le Jehowa ndo lo nsanganya ya l’etshumanelo yatɔlɔngɔswɛnde, sho tshɛ keketshamaka dia ndjaka la wonya ndo monga nsuke dia mbetshama oma le nde. Ekɔ dimɛna mbidjasɛ l’ekala wa la ntondo ndo ntshika ekala wa l’ɔkɔngɔ dikambo di’anto wele l’ana wa totshitshɛ ndo dia wanɛ wakoka tena dimɔtshi nkoma l’ɔkɔngɔ. La ntondo ka nsanganya ntatɛ, pombaka nima kana nkitshakitsha telefɔnɛ diaha mfutanya anto akina. Efukutanu hawotoyala efula naka anto tshɛ ntetemala mbɔsa losanganya tshɛ la dilɛmiɛlɔ di’efula.—Und. 5:1; Fil. 2:4.

Etena katatɛ eyoyo mbɔtɔ lo nsanganya, onto ɔmɔtshi la l’etshumanelo lawaeya kokaka mbidjasɛ kâmɛ lawɔ. Dikambo sɔ diayoleka monga ohomba naka vɔ wekɔ l’ana wa totshitshɛ. Ondo wɔtwɛlɔ wa nsanganya mbeyaka monga dui di’oyoyo le nkumbo kɛsɔ. Naka ngasɔ, kete ondo vɔ wayɔngɛnangɛna efula mbidjasɛ l’ekala wa l’ɔkɔngɔ lɛnɛ ahawatoleka mfukutanya anto akina etena kayowohombaka ntomba yema l’ɔna lafutanya l’andja. (Tuk. 22:6, 15) Nkumbo yele l’ana wa totshitshɛ pombaka mbidjasɛ dihole diâmɛ diaha ana mfutanya. Ekɔ dimɛna efula di’ambutshi mbisha ɔnawɔ ohokwelo l’andja wa Mbalasa ka Diolelo, oma lâsɔ ko vɔ ndjokalola l’etei l’ɔna naka nde ambɔlama.

Wanɛ washana ahole wekɔ lo nkimanyiya dia awui mbeta dimɛna lo luudu l’ɔtɛmwɛlɔ. Vɔ kimanyiyaka nkumbo ndo anto wakoma tena dimɔtshi l’ɔkɔngɔ dia vɔ nkondja ahole wa mbidjasɛ. Wanɛ washana ahole pombaka monga l’ekanelo k’ɔlɔlɔ ndo la yewo dia nkimanyiya anto akina dia vɔ nkondja ahole wa mbidjasɛ aha la vɔ mfutanya anto akina tshanana. Vɔ pombaka monga l’ekanelo k’ɔlɔlɔ etena kayala ofukutanu ɔmɔtshi wa shashimoya. Etena kafutanya ɔna anto akina, wanɛ washana ahole mbeyaka nkandola dikambo sɔ la ngandji tshɛ.

Wanɛ tshɛ waya lo nsanganya dia ndjɔtɛmɔla kokaka mbisha lonya di’anto tshɛ mbetshama dimɛna awui wendana la Jehowa ndo wendana la sangwelo diande di’andja w’oyoyo wa wɔladi ndo wa losembwe.—Heb. 10:24, 25.