Todje Yimba l’Awui w’Ekila
1 Aha awui tshɛ wakate onto mbasungana mpokamɛ la yambalo. Koko, etena katɛkɛta Nzambi, ekɔ ohomba efula mpokamɛ. (Euh. 28:1, 2) Diɛsɛ ko anto wakasokoyama oma le nyuma wakafunde ‘awui w’ekila waki Nzambi’ dikambo dia wahɔ wakiso. (Romo 3:2) Losanganya la distrikɛ lakongɛso layotosha waaso w’eshika wa mpokamɛ wonya wayowadiaka ndo wayowolembetshiyaka awui asɔ. Ngande wakokayɛ mbidja yambalo lo yoho ya lânde na?
2 Komaka la Ntondo ka Wonya Pindju Tshɛ: Ohokanyiya ɔngɛnɔngɛnɔ waki l’ase Isariyɛlɛ lam’akawawatɛ dia tɛnama la ntondo ka Jehowa l’Okongo wa Sinai dia mpokamɛ Ɛlɛmbɛ ande! (Etum. 19:10, 11, 16-19) Naka wɛ ekɔ la dionga dia ngasɔ, lo kɛnɛ kendana la nongola wetshelo waki Jehowa lo losanganya la distrikɛ, kete wɛ ayoyalɔngɔsɔla dia komaka lushi tshɛ la ntondo ka wonya. Hatokoke mpokamɛ kɛnɛ katama lo losanganya l’otondo naka tayokomaka l’ɔkɔngɔ ko tafukutanyaka anto akina lo tayange dihole dia mbidjasɛ. Nkuke ya lo dihole dia losanganya la woke yayodihɔmaka l’eshidi 8 kokele, ndo losanganya layotatɛka lushi tshɛ l’eshidi 9:30.
3 Kânga anto amɔtshi wakoma la ntondo ka wonya hawotodjasɛka l’ahole awɔ lam’atatɛ losanganya. Lande na ngasɔ na? Vɔ kongɛka paka ɔnɔmbɔdi wa losanganya ambɔlɔmba anto dia memba osambo wa mbɔtwɛlɔ ko vɔ ndjotshika sawola l’angɛnyi awɔ ndo ndjomɛ tshɔ otsha l’ahole awɔ. Sho pombaka mbeya dia ɔnɔmbɔdi wa losanganya ayodjasɛka lo lɔyɛnga etena kadiholawɔ mishiki wa Diolelo minitɛ efula la ntondo k’osambo wa mbɔtwɛlɔ w’etenyi tshɛ. Ɔsɔ ekɔ djembetelo yatɛnya ɔnɛ etena ka sho mbidjasɛ kambokoka! Ɔnkɔnɛ, lam’ayowɔlɔmba dia sho memba osambo wa mbɔtwɛlɔ, tayonga suke dia memba kâmɛ l’anto akina dia tombola Jehowa.
4 Nkumbo Wônge Kâmɛ dia Mpokamɛka: Lam’akawadiaka awui w’ekila, ase Isariyɛlɛ, nkumbo, mbidja ndo ‘ana watotshitshɛ’ wakahombaka mpokamɛ ndo mbetshama. (Euh. 31:12) Lo nsanganya yaso ya weke, hatohombe ‘minya ana yimba.’ (Tuk. 29:15) Ambutshi, nyotshe tshɛ di’ase nkumbo mbidjasɛ kâmɛ, mbidja ndo ana. Ambutshi amɔtshi kongɛka paka etena kowemba osambo wa mbɔtwɛlɔ ko vɔ ndjotshɔ l’anawɔ lo komba. Koko, naka sho ntsha ngasɔ kete ayonga wolo sho mbetsha ana ohomba w’efula wele l’esambo ndo alɔmbɛlɔ l’ɔtɛmwɛlɔ aso. Ekɔ dimɛna efula tatshwe lo komba la ntondo k’etatelo k’etenyi tshɛ ka losanganya naka kokaka!
5 Naka tayomuyaka efula l’otsho tshɛ ndo tayewɔ dia ndɛ diangɔ dia wotsho, kete tayonga l’akoka wa mpokamɛ dimɛna. Dja yimba yɛ tshɛ lo kɛnɛ kata ɔtɛkɛtshi. Tekolake yimba yɛ l’akambo akina. Tayelaka lo Bible wonya wadiema avɛsa. Fundaka awui w’ohomba. Wonya washama sawo tshɛ, kanyiyaka lo wɔɔngɔ wakiyɛ kɛnɛ kayanga mbuta ɔtɛkɛtshi ndo kanyiya nganɛ wokokiyɛ tokamba l’awui akɔ. L’ekomelo ka lushi, kɛtshanya awui wa lo losanganya wɛ la nkumbo kayɛ. Naa akambo wakangɛnyingɛnyi onto l’onto na? Ngande wakoka nkumbo kayɛ kamba l’akambo asɔ dimɛna na?
6 Tɔshi Ɔtɛkɛta wa Nzambi la Nɛmɔ: Nsanganya ya weke toshaka diaaso di’ɔlɔlɔ dia sawola l’angɛnyi aso ndo monga kâmɛ l’anyaso. Lam’ayotokomaka la ntondo ka wonya, tayokondjaka etena ka sawola l’asekaso la ntondo ka losanganya tatɛ. Koko, amɔtshi sawolaka wonya wa losanganya ko fɔnyaka lo kashi ɔnɛ sawo diawɔ hafukutanya anto nɛ dia sɛkɛ diekɔ woke. Oyadi kânga lo sɛkɛ dia woke efula mbasalema nsanganya, ɔsɔ ekɔ etena ka mpokamɛ oko watotohokamɛka lam’eso lo losanganya lo Mbalasa kaso ka Diolelo. Okambelo wa la waa telefɔnɛ, motorɔla, kamɛra kana foto hahombe futanya anto wayela losanganya.
7 Etena kakalongolaka Mɔsɛ Ɛlɛmbɛ oma le Jehowa, ‘nde kɔndɛ mma ndo kɔ̂nɔ ashi.’ (Etum. 34:28) Yoho yakɔ yâmɛ, kema dimɛna ndɛ kana nɔ wonya wasalema losanganya. Naka aha dikambo dia hemɔ, kete pombaka kongɛ polo ndo etena ‘kakashikikɛma’ dia dikambo sɔ.—Und. 3:1.
8 Lo nsanganya mɔtshi ya weke, anangɛso l’akadiyɛso efula ndo ana temalaka elui elui wonya wa losanganya. Wayɔlɔmba wanɛ walongola anto ndo washana ahole dia mbutɛ anto asɔ dia vɔ kawola l’ahole awɔ. Naka watawasha ndoko olimu ɔmɔtshi w’ohomba wa kamba wonya wa losanganya, kete anto wayakimɔ la lolango pombaka tshikala l’ahole awɔ, ndo ndjela losanganya. Hawohombe tshikala pondjo l’adepartɛma, kana tembɔnaka lam’asawɔ wonya wasalema losanganya.
9 Hatohombe monga pondjo ‘atui wolo’ etena kahokamɛso Ɔtɛkɛta waki Nzambi. (Heb. 5:11) Koko, nyɛsɔ toyashikikɛ dia mɛnya nɛmɔ diashaso Ɔtɛkɛta waki Nzambi lo mpokamɛ la yambalo tshɛ awui w’ekila w’oma le Jehowa lo losanganya laso la distrikɛ layaye.