Woho wa ndowanya apandjudi w’eyoyo dia vɔ nsambisha
1. Ngande wakayaoke mbala ka ntondo kakayatatɛ nsambisha?
1 Onde wɛ mbohɔka mbala ka ntondo kakayatatɛ nsambisha lo luudu la luudu? Ondo wɛ aki la wɔma. Naka wɛ akatasambishaka kâmɛ l’ombetsha ayɛ wa Bible kana l’opandjudi okina, kete wɛ mɛtɛ aki l’ɔngɛnɔngɛnɔ lo woho wakandakokimanyiya. Lam’ele wɛ aya okambi wa manamana, wɛ aya l’akoka wa ndowanya apandjudi w’eyoyo dia vɔ nsambisha.
2. Akambo akɔna wahomba apandjudi w’eyoyo mbeka?
2 Apandjudi w’eyoyo wekɔ l’ohomba wa mbeka woho wa vɔ ntatɛ nsawola l’anto, wa nkamba la Bible l’esambishelo, wa nsala waendelo w’eyoyo ndo wa ntatɛ ndo nɔmbɔla wekelo wa Bible. Vɔ pombaka mbeka nto woho wa nsambisha lo toho t’esambishelo totshikitanyi. Ɛnyɛlɔ esambishelo ka lo toshinga ndo esambishelo ka l’ahole wandawɔ ekanda. Sho koka mbakimanyiya dia vɔ ndjalowanya lo toho t’esambishelo tɔsɔ oma l’ɛnyɛlɔ kaso ndo lo mbasha alako.
3. Ngande wakokaso nkimanyiya apandjudi w’eyoyo oma l’ɛnyɛlɔ kaso?
3 Tetsha oma l’ɛnyɛlɔ kaso: Yeso akɛnyaka ambeki ande woho wa nsambisha. (Luka 8:1; 1 Pet. 2:21) Etena kayalɔngɔsɔlaso dia nsambisha kâmɛ l’apandjudi w’eyoyo, totalɔngɔsɔdi mbɔtwɛlɔ kɛmɔtshi ka wɔdu kakokawɔ mbokoya, ondo lo nkamba la mbɔtwɛlɔ y’ɛnyɛlɔ yele l’ekanda aso. Oma lâsɔ, ko sho nsambisha lo soko dia ntondo kana dia hende di’apandjudi w’eyoyo mboka woho wayotɔtɛkɛta. Etena katombaso oma lo lokombo lɔmɔtshi otsha lo lokina, sho kokaka mumbola apandjudi w’eyoyo dia vɔ totɛ kɛnɛ kakawɛnyi lo mbɔtwɛlɔ kaso. Kɛsɔ ayowakimanyiya dia vɔ mɛna ohomba wa nkamba kâmɛ l’apandjudi akina l’esambishelo ndo honga dui dia wolo dia vɔ mbetawɔ dako tshɛ diayowowasha l’ɔkɔngɔ wa vɔ nkamba la mbɔtwɛlɔ kawɔ.
4. Ngande wakokaso nkimanyiya apandjudi w’eyoyo l’ɔkɔngɔ wa sho mpokamɛ mbɔtwɛlɔ yawɔ?
4 Towasha alako: Yeso akasha ambeki ande alako ndo lo woho wakawahombe nsambisha. (Mat. 10:5-14) Sho kokaka nkimanyiya apandjudi w’eyoyo lo yoho shɔ. Etena katɛkɛtawɔ, tohokame la yambalo tshɛ. Oma lâsɔ, l’ɔkɔngɔ wa sho ntomba oma lo lokombo, towasha alako wa shikaa wa l’otema ɔtɔi ndo towandole oyadi takɛnyi dikambo dimɔtshi lo mbɔtwɛlɔ kawɔ diahombawɔ ndjalowanya. La ntondo ka sho mbalaka, sho koka menda dia kana vɔ wayoyalowanya lo dikambo sɔ lo lokombo layela. Ondo vɔ waki la wɔma. Tatohɛke nto dia apandjudi tshɛ kema l’akoka wa woho ɔtɔi ndo tena dimɔtshi ekɔ toho efula takokaso nsala dikambo diâmɛ.—1 Kor. 12:4-7.
5. Kakɔna kakokaso mbuta etena kɔsaso yɛdikɔ ya ndaka apandjudi w’eyoyo?
5 Tena dimɔtshi, apandjudi w’eyoyo mbeyaka tɔlɔmba alako. Koko naka hawotɔlɔmbi, kete tɔshi yɛdikɔ ya mbakimanyiya. Ngande wakokaso nsala dui sɔ l’ɔkɔmi tshɛ? Apandjudi amɔtshi wambohokɔ akambo mbutaka tsho ɔnɛ: “Lam’alangayɛ, dimi nte kosha dako dimɔtshi!” kana “Oko le yɛ, onde mbɔtwɛlɔ kakakambi la yɛ kaketshi dimɛna?” Yoho kina ele mbuta ɔnɛ: “Etena kakimi opandjudi w’oyoyo, laki l’okakatanu dia . . . , koko lakayɛnaka dia dikambo nɛ diekɔ ohomba efula. . . .” Mbala mɔtshi ekɔ ohomba sho nsɛdingola dibuku Comment raisonner kâmɛ la wɔ. Diaha sho mbâlɛndja l’awui wamboleka, tâlake paka lo dui ɔtɔi diendana la mbɔtwɛlɔ kawɔ.
6. Lo kɛnɛ kendana l’olimu w’esambishelo, ngande wakoka ‘lowolo mbidja lowolo lokina diɛsa’?
6 Lowolo latodjaka lowolo lokina diɛsa: Timɔtɛ laki osambisha wa manamana akakeketshama oma le Paulo dia ntetemala ndjasha lo wetshelo ndo dia nde mpama. (1 Tim. 4:13, 15) Kânga mbele mbeyaka monga ko ambeta ɛnɔnyi efula ntatɛ etena kakatatatɛ nsambisha, tatotshikake pondjo dia pamia diewo diaso. Tokondja wetshelo oma le apandjudi wasambisha kâmɛ la so, oyadi wanɛ wele kema la diewo di’efula l’olimu w’esambishelo ndo toyale suke dia nkimanyiya apandjudi akina la ngandji tshɛ, djekoleko apandjudi w’eyoyo dia vɔ nkoma esambisha wa tomanamana wa lokumu l’ɔlɔlɔ.—Tuk. 27:17.