Nyolowanya ananyu dia vɔ monga esambisha wa lokumu l’ɔlɔlɔ

1. Osambo 148:12, 13 nɔmbaka ambutshi w’Akristo dia nsala dui diakɔna?

¹ Jehowa nɔmbaka ɛlɔngɔlɔngɔ dia vɔ mbôtombola. (Osam. 148:12, 13) Ɔnkɔnɛ, ambutshi w’Akristo hawokomɛ tsho dia mbetsha anawɔ akambo wa mɛtɛ wa lo Bible ndo ɛlɛmbɛ waki Nzambi wendana la lɔkɛwɔ. Vɔ mbaetshaka nto dia monga esambisha wa lokumu l’ɔlɔlɔ. Ngande wakokanyu tasalaka dikambo sɔ yema yema?

2. Ngande wakoka ɛnyɛlɔ ka dimɛna kasha ambutshi monga la shɛngiya y’ɔlɔlɔ le anande?

² Nyowasha ɛnyɛlɔ k’ɔlɔlɔ: Shushi Ngidiyɔna akatɛ apami ande 300 ate: “Kanyumendi.” (Emb. 7:17) Oma ko mbotwelo kawɔ, ana mendaka ndo mbokoyaka ambutshi awɔ. Ombutshi ɔmɔtshi wa pami kambaka olimu l’otsho, koko lo dihole dia nde ntshɔ tolala etena kakalolande oma l’olimu Lushi la samalo la pindju, nde mbɔsaka anande dia ntomba la wɔ l’esambishelo kânga mbambondɔlɛmba efula. Aha la nde mbuta kânga dui ɔtɔi, nde ekɔ lo mbaetsha dia olimu w’esambishelo ekɔ dui dioleki ohomba. (Mat. 6:33) Onde anayɛ kɛnaka wɛ ayasha l’ɔngɛnɔngɛnɔ tshɛ lo toho totshikitanyi t’ɔtɛmwɛlɔ tele oko, nɔmbaka, mbadiaka Bible, mbishaka kɔmatɛrɛ ndo sambishaka? Lo mɛtɛ, wɛ hatonga ɛnyɛlɔ ka kokele. Koko anayɛ wayonga suke dia nkamba la kɛnɛ kawatɛyɛ dia vɔ kambɛ Jehowa naka vɔ wayɛna woho wokambɛyɛ la etete.—Euh. 6:6, 7; Romo 2:21, 22.

3. Naa eyango wa lo nyuma wahomba ambutshi nkimanyiya anawɔ dia ndjadjɛ ndo mbakotshaka yema yema?

³ Eyango wa takotshaka yema yema: Aha la mpekɔ, ambutshi mbetshaka anawɔ dia kɛndakɛnda, ntɛkɛta, ndɔta ahɔndɔ vɔamɛ ndo akambo akina. Etena kolawɔ, vɔ ndjongaka la eyango w’eyoyo wa ndjadjɛ. Naka ambutshi wekɔ Akristo, kete vɔ lawɔ kimanyiyaka anawɔ dia ndjadjɛ ndo nkotsha eyango wa lo nyuma lo ndjela ɛnɔnyi ndo akoka awɔ. (1 Kor. 9:26) Onde wɛ mbetshaka anayɛ dia vɔ mbisha kɔmatɛrɛ l’ɛtɛkɛta awɔ hita ndo dia vɔ nɔngɔsɔlaka asawɔ awɔ wa lo Kalasa k’olimu wa teokrasi vɔamɛ? (Osam. 35:18) Onde wɛ mbalowanyaka dia vɔ ndjasha lo toho t’esambishelo totshikitanyi? Onde wɛ mbaɛnyaka ohomba wa ndjadjɛ oyango wa batizama ndo wa nkamba olimu wa lo tena tshɛ? Onde wɛ mbaokanyaka la esambisha wa lokumu l’ɔlɔlɔ wele l’ɔngɛnɔngɛnɔ ndo la waasaso wayowakeketsha?—Tuk. 13:20.

4. Ngande wakondja ana wahɔ lo monga l’ambutshi watatɛ mbaetsha woho wa monga esambisha wa lokumu l’ɔlɔlɔ oma ko tɔkɛndakɛnda tawɔ?

⁴ Omembi w’esambo akate ate: ‘Nzambi le, wɛ kakambetsha oma ko dikɛnda diami ndo polo kakianɛ dimi lekɔ lo ntetemala sanyɛ anto dia elimu ayɛ wa diambo.’ (Osam. 71:17) Tatɛ mbetsha anayɛ oma ko tɔkɛndakɛnda tawɔ dia vɔ monga esambisha wa lokumu l’ɔlɔlɔ. Awui wa lo nyuma wawaetshanyu ɛlɔ kɛnɛ, wayoyakondjiyɛ wahɔ etena kayowokoma epalanga.—Tuk. 22:6.