Periodikɛ yaso yakasalema woho wa kotolaka yambalo y’anto tshɛ
1. Ngande wokoya olui w’ɔhɔmbɔ wa kɔlamelo ndo wa kɛsɔ ɛnyɛlɔ kaki ɔpɔstɔlɔ Paulo?
1 Oko wakɔtɔnganyiyaka ɔpɔstɔlɔ Paulo mbɔtwɛlɔ yakakambaka la nde l’esambishelo ka lokumu l’ɔlɔlɔ l’ehomba wa “wehu w’antu tshe” dia mbaetawoya, olui w’ɔhɔmbɔ wa kɔlamelo ndo wa kɛsɔ tondjaka periodikɛ yaso l’oyango wa munanda etema w’anto woye oma lo waoho wotshikitanyi ndo wele la mbetawɔ yotshikitanyi. (1 Kor. 9:22, 23) Dia sho nkamba dimɛna la Tshoto y’Etangelo ndo la Réveillez-vous !, sho pombaka tôki dimɛna akambo wele lɔkɔ ndo mbeya weho w’anto wendana l’akambo akɔ wahombaso mbisha.
2. Réveillez-vous ! salemaka dia nkimanyiya waa na?
2 Réveillez-vous !: Periodikɛ kɛnɛ tondjamaka l’oyango wa munanda weho w’anto wele oko wanɛ wakasambishaka ɔpɔstɔlɔ Paulo etena kakandasawolaka la “asi Atena.” (Etsha 17:22) Anto asɔ kombodiama lo nkumbo y’Akristo ndo waki la eokelo ka tshitshɛ k’Afundelo. Woho akɔ wâmɛ mbele, anto watondjɛwɔ Réveillez-vous ! wekɔ la ewo ka tshitshɛ keto kana bu k’awui wa lo Bible. Mbeyaka monga ko vɔ haweye ndoko dikambo lo kɛnɛ kendana la wetshelo w’Akristo, hawoyoyasha l’awui w’ɔtɛmwɛlɔ kana haweye dia Bible kekɔ l’akambo wahomba mbɔsama la nɛmɔ. Oyango wa ntondo wele la Réveillez-vous ! ele wa mbetawoya ambadi awɔ ɔnɛ Nzambi ka mɛtɛ ekɔ. Oyango okina wele la periodikɛ kɛnɛ ele wa nkimanyiya anto dia vɔ monga la mbetawɔ lo Bible ndo mbeya di’Ɛmɛnyi wa Jehowa ntshikitana l’ɛtɛmwɛlɔ ekina.
3. Waa na watondjɛwɔ Tshoto y’Etangelo?
3 Tshoto y’Etangelo: Wanɛ watondjɛwɔ Tshoto y’Etangelo y’anto tshɛ nɛmiyaka Nzambi ndo Afundelo lo yɛdikɔ mɔtshi. Vɔ mbeyaka Bible lo yɛdikɔ mɔtshi, koko hawoshihodia wetshelo atɔ dimɛna. Vɔ wekɔ oko wanɛ wakate Paulo ɔnɛ wekɔ anto “wuka [Nzambi] woma.” (Etsha 13:14-16) Tshoto y’Etangelo ya wekelo tondjamaka ntondotondo lo dikambo di’Ɛmɛnyi wa Jehowa. Paulo akɛnya dia wanɛ wakadiaka mikanda ande wakeyaka Afundelo ndo waki la ewo k’oshika k’akambo wa mɛtɛ. (1 Kor. 1:1, 2) Woho akɔ wâmɛ mbele, asawo watondjama lo Tshoto y’Etangelo ya wekelo tondjamaka dikambo dia wanɛ wɔtɔ lo nsanganya yaso ndo weya tɔtɛkɛta takamba la so.
4. Lande na kahombaso mbadiaka periodikɛ tshɛ yakamba la so l’olimu w’esambishelo?
4 Kânga mbatotoshaka anto periodikɛ yakɔ hiende, mbala efula sho tosalaka mbɔtwɛlɔ ka periodikɛ ɔtɔi keto. Oma lɔkɔ mbele, toyadje oyango wa mbadiaka periodikɛ tshɛ. Lo nsala ngasɔ, tayonga l’akoka wa nkotola yambalo y’anto wayohomana la so l’olimu w’esambishelo.