Numɛlɔ ka wekelo k’oyoyo ka Tshoto y’Etangelo

PERIODIKƐ keyɛ lo mbadia kɛnɛ kekɔ numɛlɔ ka ntondo ka Tshoto y’Etangelo ya wekelo. Tambolanga kolembetshiya awui amɔtshi wendana la yoho y’oyoyo yotomba periodikɛ kɛnɛ.

Numɛlɔ ka wekelo kekɔ dikambo di’Ɛmɛnyi wa Jehowa ndo di’ambeki wa Bible watahame. Tɔ kayotombaka mbala ɔtɔi lo ngɔndɔ ndo kayongaka la asawo anɛi kana atanu wa wekelo. Ekongelo kendana la ɔsɛdingwelo w’asawo wa wekelo wa lɔkɔ kayofundamaka lo lohoso la periodikɛ. Otshikitanyi la numɛlɔ k’anto tshɛ ka Tshoto y’Etangelo, numɛlɔ ka wekelo kayongaka la osato akɔ ɔtɔi lo lohoso la numɛlɔ tshɛ, nɛ dia hatotokikahɛka anto lo esambishelo.

Lo lɛkɛ 2 la periodikɛ kɛnɛ, wɛ ayɛna dia vɔ mbisha lo tshena pe ndo lo yoho ya dimɛna efula oyango wa sawo tshɛ dia wekelo kana w’asawo wa wekelo ndo listɛ l’asawo akina. Ɛnɔmbɔdi wa Wekelo wa Tshoto y’Etangelo, wayɛna dia dikambo sɔ diayowakimanyiya efula etena kayalɔngɔsɔlawɔ dia tɔlɔmbɔla ɔkɛtshanyelo wa dimɛna efula w’asawo asɔ lo losanganya la lo etshumanelo.

Wɛ ayɛna dia asawo wa wekelo waya bu etale efula oko wakiwɔ ntondo. Omalɔkɔ, etena kayongaka efula ka sɛdingola avɛsa w’ohomba efula wonya wa Wekelo wa Tshoto y’Etangelo. Tambokokeketsha la wangasanu tshɛ dia mbokaka sso lo avɛsa tshɛ woshilami lomingu tshɛ. Lo avɛsa amɔtshi woshilami, vɔ funda ɔnɛ “adia” ndo avɛsa akɔ pombaka mbadiema ndo kɛtshanyema wonya wa Wekelo wa Tshoto y’Etangelo. Avɛsa akina kokaka mbadiema nto naka wonya wekekɔ. Lo asawo amɔtshi, wɛ mbeyaka mɛna dia vɔ funda lo avɛsa amɔtshi ɔnɛ “ɛdika la.” Lam’ele avɛsa asɔ bu avɛsa woleki ohomba wa lo odingɔ, mbala efula vɔ hawotadiemaka lo losanganya la lo etshumanelo. Avɛsa wofundjiwɔ ɔnɛ “ɛdika la” bu l’awui wa lâdiko w’ohomba efula, koko vɔ kokaka sukɛ awui wakɛtshanyema lo yoho kina. Tambokokeketsha dia wɛ mbadiaka avɛsa asɔ etena kalɔngɔsɔlayɛ Wekelo wa Tshoto y’Etangelo. Ondo lo kɔmatɛrɛ yayɛ, wɛ kokaka mbidja awui amɔtshi w’oma l’avɛsa akɔ.

Alapɔlɔ w’olimu wa l’ɔnɔnyi hawototombaka nto lo Tshoto y’Etangelo. Tatɛ lo 2008, vɔ wayotombaka lo dikatshi di’okotsha dia Olimu aso wa Diolelo ndo lo Annuaire. Koko, oko wɛnyamidiɔ la diko, numɛlɔ ka wekelo kekɔ ndo l’asawo akina. Kânga mbahatekamaka efula k’asawo asɔ lo losanganya la lo etshumanelo, wɛ keketshamaka dia mbadia asawo akɔ la yambalo tshɛ. Vɔ lawɔ wekɔ la mbo ya ndɛ ya lo nyuma y’oma le ‘ɔhɔmbɔ wa kɔlamelo ndo wa kɛsɔ.’​—⁠Mat. 24:​45-47.

Dia komiya, eya dia numɛlɔ ka wekelo ndo numɛlɔ k’anto tshɛ ka Tshoto y’Etangelo kema periodikɛ hiende yotshikitanyi. Numɛlɔ yakɔ hiende yekɔ Tshoto y’Etangelo mbewoyaka Diolelo diaki Jehowa. Lo lɛkɛ 2, numɛlɔ yakɔ yekɔ la edingɔ ɛmɔtshi wa woho ɔtɔi walembetshiya oyango wa Tshoto y’Etangelo. Numɛlɔ yakɔ hiende yayotombaka lo vɔlimɛ rɛlie ya l’ɔnɔnyi. Ndo awui w’oma lo numɛlɔ yakɔ hiende wayotanemaka lo sawo diata ɔnɛ: “Onde wɛ âkohɔ?” diayotombaka lo numɛlɔ ka wekelo.

Tatɛ oma lo 1879, polo lo tena di’ata, di’ekakatanu wendana la ekondjelo ka falanga ndo k’ɛhɛnyɔhɛnyɔ, Tshoto y’Etangelo yekɔ lo tetemala mbewoya la kɔlamelo tshɛ akambo wa mɛtɛ wendana la Diolelo diaki Nzambi. Sho nɔmbaka dia lo ekimanyielo ka Jehowa, yɔ yatetemale sala dikambo sɔ lo yoho y’oyoyo yoyotomba nyɛ. Ndo tekɔ lo nɔmba Jehowa dia nde kɔtshɔkɔla, wɛ ombadi, etena kakambayɛ dimɛna la numɛlɔ ka wekelo k’oyoyo ka Tshoto y’Etangelo.