Tɔsɔnɛ Asawo Lo Menda Saki K’anto

¹ Oko ambuki wa mpito watɔtɔlɔnganyaka mpito yawɔ la nyama la ntondo ka ndjioka, apandjudi efula ndo ambatshi mboka kondjaka etombelo w’ɔlɔlɔ efula l’ekimanyielo k’asawo wele lo Tshoto y’Etangelo la Réveillez-vous ! wasɔnawɔ lo menda saki k’anto wele lo mbilo kawɔ. Vɔ shikikɛka akɔna ayokoka nanga mbâdia. Tênde woho watowotshaka.

² Ntondo, vɔ mbadiaka numɛlɔ tshɛ oma ko tshatelo polo l’ekomelo. L’ɔkɔngɔ, vɔ ndjambolaka woho w’anto akɔna wayɔngɛnangɛna sawo la sawo. Ko vɔ ndjatshutshuya dia ntshɔ la tênda anto wayokoka mbadia sawo diakɔ. Naka vɔ fɔnyaka ɔnɛ numɛlɔ kɛmɔtshi ka lânde kayoleka ngɛnyangɛnya anto lo mbilo kawɔ, ko vɔ ntsha kɔmandɛ kekina nto.

³ Nɛmɔ dia Periodikɛ Yaso Mbeyamaka: Onto ɔmɔtshi lakɔshi abɔnɛma aso kambaka lo jurunalɛ yata nsango yeta l’andja ndo yoleki mbadiema la Nigeria. Enda kɛnɛ kakandate lo dikambo dia Réveillez-vous !: “Djɔki lo jurunalɛ ya dimɛna efula yendana l’awui tshɛ weta l’andja.” Ombadi mbadi ɔmɔtshi wa tojurunalɛ taso ate: “Ande ɛngɔ k’oshinga wolo ka lomba le! Ndoko dikambo diangɛnyangɛnya diahafundami lo mɔtshi kana kina.”

⁴ Periodikɛ tɛkɛtaka akambo heyama: Bible, akambo watomba l’andja, nkumbo, ekakatanu wa l’atshunda w’anto, akambo wakete, siansɛ, lɔsɛnɔ la nyama ndo la tombatomba, ndo akambo akina wahatashidi. Onto ayongaka mɛtɛ la saki ka mbadia dikambo dimɔtshi diatɛkɛta di’ehomba ande, dia eongelo kande kana di’olimu ande. Lam’ele anto watɛkɛta la so tshikitana, onto l’onto la diangɔ diatondolangaka ndo ekakatanu ande hita, lam’asɔnaso asawo lo menda nsaki yawɔ, dui sɔ mbishaka etombelo w’ɔlɔlɔ.

⁵ Tênde kɛnɛ kakakomɛ Ɛmɛnyi ehende wa Jehowa wakasha ofundji ɔmɔtshi wa tojurunalɛ w’edjedja edjedja Réveillez-vous ! wa Ngɔndɔ ka Samalo 8, 1996. Nde akafunde ate: “La ntondo ka dimi kondja diaaso dia mbuta nte hayingɛnangɛna, ɔmɔtshi a l’atei awɔ akakotsha ate: ‘Sawo dimɔtshi diekɔ lɔkɔ diatɛkɛta dikambo di’Ase Inde wa l’Amerikɛ. Sho mbeyaka shate nyambofunda awui efula lo dikambo diawɔ.’ ” Nde akalongola periodikɛ kakɔ ndo akadia ɔkɔndɔ w’Ase Inde lam’akandalɛka yangɔ ya pindju. Nde aketawɔ ate “periodikɛ kakɔ kaki dimɛna efula” ndo “kekɔ l’oyango wa woke.”

⁶ Kakɔna Kangɛnyangɛnya Anto wa lo Mbilo Kanyu Na ? Akayâdia lo periodikɛ ngɔndɔ yetshi nyɛ kokoki ngɛnyangɛnya wa kɔmɛlɛsa ndo anto wakamba elimu awɔ vâmɛ lo mbilo kanyu, kana asukanyi ayɛ, asekayɛ wa l’olimu ndo wa la kalasa? Kakɔna kokoki ngɛnyangɛnya atɛkɛtɛdi (avocats), embetsha, wanɛ washana alako wendana la diodja di’ana ndo wa nkumbo, wanɛ wodia ana, akambi w’elimu wakimanyiya anto tshɛ ndo enganga? Naka wɛ sɛdingola numɛlɔ tshɛ ko kanyiya anto wayoyosha, kete wɛ ayonga la waaso efula wa dianganya ɔtɛkɛta wa sɔlɔ.

⁷ Lam’angɛnangɛna onto sawo dimɔtshi dia lo Tshoto y’Etangelo kana lo Réveillez-vous ! ndo ambolongola periodikɛ kakɔ, wɛ koka mbuta wate: “Mbala kekina kayomadia sawo dimɔtshi diayokoka kɔngɛnyangɛnya, layokeladiɔ.” Ondo lo ntsha ngasɔ wɛ ayokotsha onto okina lo otadimbo ayɛ wa periodikɛ lo kalolaka etena tshɛ keyɛ la diaaso dia ndjowɛnya numɛlɔ y’eyoyo. Dui sɔ fɔnaka la nganɛ atototshaka etena katoshawɔ dikimɔ dia kalola dia ndjenda wanɛ walanga weho ɛmɔtshi w’asawo. Asawo wa ngasɔ wekɔ efula lo periodikɛ yaso y’edjedja. Sho kokaka ndjisɔtɔla ko mbâtɔlɛ. Naka sho ntsha ngasɔ, kete ondo tayoshidiya periodikɛ tshɛ y’edjedja yele lo lɔkɔtɔ.

⁸ Toyale l’Oyango wa lo Nyuma: Ambeta ɛnɔnyi ɛmɔtshi, pami kɛmɔtshi kaki l’oweso wâmɛ wa kotsha nsaki yande akalongola numɛlɔ kɛmɔtshi ka Réveillez-vous ! kakɔ̂ngɛnyangɛnya. Koko pami kɛsɔ k’ombetawudi akadia ndo Tshoto y’Etangelo mɔtshi yakandakondja etena kakɔ kâmɛ. Sawo dimɔtshi diakôtshutshuya dia nde sɛdingola Losato l’Osanto dimɛna, wetshelo wokondetawɔka nshi tshɛ. L’ɔkɔngɔ wa ngɔndɔ shamalo, nde akabatizama! Ɔnkɔnɛ, tatokandakandake dia sawola asawo wa Bible l’anto wadia periodikɛ yaso. Sho koka mbasha biukubuku Kakɔna Katɔlɔmba Nzambi? ndo mbâlɔmba dia mendaka wetshelo ɔtɔi, lo taahe tongana toto, etena tshɛ kayotâtɔlɛka periodikɛ.

⁹ Kanyiya dimɛna dimɛna akɔna l’atei w’anto wembolayɛ ndo wanɛ weyana la yɛ l’ahole w’elimu, ayolanga kondja numɛlɔ yeke ka tomba ya Tshoto y’Etangelo la Réveillez-vous ! L’ɔkɔngɔ, totshe tshɛ dia mɛnana la wɔ. Totshu totênde anto efula la periodikɛ yaso, yele la nɛmɔ hakoke. Ndo tatohɛke pondjo ɔnɛ lam’atshaso la wolo aso tshɛ dia anto mbadia periodikɛ, tekɔ lo ‘mbikadja ma diaso lâdiko di’ashi.’ L’edjedja a wonya, tayokoka kondja ambeki w’eyoyo.​—⁠Und. 11:​1, 6.