‘Lolango laki Nzambi latshame’
1. Naa ɔtɛ a dui wa Losanganya la lânde la lushi ɔtɔi la l’ɔnɔnyi w’olimu wa 2012, ndo lande na kele ekɔ ohomba dia sho nsɛdingola ɔtɛ a dui ɔsɔ?
1 Takatongama oma lo lolango la Jehowa. (Eny. 4:11) Lâsɔ hatokoke kotsha oyango wakatatongama aha la mbeya ndo nsala lolango laki Nzambi. Ɔsɔ kema dui dia tshitshɛ oko wakokadiɔ mɛnama, nɛ dia sho pombaka ndɔshana la nsaki yaso ya l’etei k’otema yatotshutshuya dia ndjakimɔ lo “saki y’alimba asu la tukanyi tasu” kana dia nsala “saki y’asi wedja.” (Ef. 2:3; 1 Pet. 4:3; 2 Pet. 2:10) Naka Nzambi hatokimanyiyisha, kete tayonga lo wâle ‘wa mundama tasɛna oma le Diabolo dikambo dia lolango lande.’ (2 Tim. 2:26) Losanganya laso la lânde la lushi ɔtɔi la l’ɔnɔnyi w’olimu wa 2012 layotokimanyiya sho tshɛ dia nkamba kâmɛ lo yoho yɔtɔnɛ la dikambo dia sato dia lo dɔmbɛlɔ di’ɛnyɛlɔ diata ɔnɛ: “Lulangu laye latshami.”—Mat. 6:9, 10.
2. Ambola akɔna wayokadimwama lo losanganya lakɔ?
2 Ambola wayokadimwama: Etena kahokamɛso asawo wa lo losanganya lɔnɛ, toyange dia ntana ekadimwelo lo ambola anɛ: Naa dui dikina di’ohomba diahombaso nsala lâdiko wa mpokamɛ Ɔtɛkɛta wa Nzambi? Ngande wakokaso ntetemala nshihodia kɛnɛ kele lolango laki Nzambi le so? Lande na kahombaso mbetawɔ dia nsambisha weho w’anto tshɛ? Ngande wakokaso monga la lɔsɛnɔ l’ɔngɛnɔngɛnɔ? Ɛlɔngɔlɔngɔ l’esekaseka le, kakɔna kahombanyu mɛnya Jehowa? Ɛtshɔkɔ akɔna wayotokondja lo nsala lolango laki Nzambi? Lande na kele ekɔ ohomba efula dia sho mbodia ndo nkeketsha anto akina?
3. Ngande wakokaso nkondja wahɔ tshɛ lo tshɛ oma lo yɛdikɔ ya lo nyuma nyɛ?
3 Toyashikikɛ dia mbɔtɔ ndo mbidja yimba dimɛna lo losanganya lakɔ. Onyimpala wa Bɛtɛlɛ kana omendji weteta mbayonga ɔtɛkɛtshi w’ɔngɛndangɛnda lo losanganya lakɔ. La ntondo ndo l’ɔkɔngɔ wa losanganya, tatengengake dia nsawola la nde ndo la wadɛnde naka nde ambotshuka. Etena kayotokalola la ngelo, tatongake ‘amboki wa dui ato,’ koko katotovusole awui wa lo losanganya lo nkumbo ndo katotɔkɛtshanya woho wakokaso nsala lolango laki Nzambi tshɛ lo tshɛ.—Jak. 1:25.
4. Lande na kele ekɔ ohomba dia sho mbetsha osalelo wa lolango laki Nzambi lo dihole dia ntondo?
4 Kem’edja wanɛ wayadjɛ eyango dia nsala paka lolango lawɔ ndo watona dia nsala lolango laki Jehowa wayolanyema. (1 Joa. 2:17) Ɔnkɔnɛ, tekɔ la lowando lo woho wambotɔlɔngɔsɔlɛ Jehowa losanganya lɔsɔ dia tokimanyiya dia mbetsha osalelo wa lolango lande lo dihole dia ntondo!