‘Mbo ya ndɛ ya lo nyuma lo etena kahombama’
1. Ngande wakakokimanyiya ekongelo ka Losanganya la lânde lêke kambeta wɛ l’anto akina?
1 L’ɔkɔngɔ wa sho mbɔtɔ lo Losanganya la lânde, mbala efula sho totaka ɔnɛ: “Awui asɔ mbakiso mɛtɛ l’ohomba!” Omendji ɔmɔtshi w’otshimbedi akate dia l’ɔkɔngɔ wa vɔ ndjela ekongelo ka Losanganya la lânde, apandjudi amɔtshi wa l’otshimbedi ande wakɛnya mposa kawɔ ka ndeka ndjasha l’olimu w’esambishelo. Omendji ɔmɔtshi weteta akate ate: “Losanganya lɔsɔ lakatokimanyiya dia sho nkana yimba dimɛna lo kɛnɛ kendana la etena kasɛnaso kɛnɛ ndo nyomɔsɛdingola ɛsɔnwɛlɔ aso wa lo lɔsɛnɔ.” Omendji okina akate ate: “Apandjudi efula wakate dia losanganya lɔsɔ laki oko donga diemula onto oma lo djɔ, mbuta ate lɔ lakatokimanyiya dia sho ndjashikikɛ dia kana tekɔ lo ndeka ndjasha lo dui dioleki ohomba, mbuta ate l’olimu w’esambishelo.” Ngande wakakokimanyiya Losanganya la lânde la lushi ɔtɔi?
2. Naa asawo amɔtshi wayoshama lo Losanganya la lânde l’ɔnɔnyi w’olimu wayaye?
2 Ekongelo ka Losanganya la lânde l’ɔnɔnyi w’olimu wayaye kayonga mɛtɛ l’awui weso l’ohomba. Losanganya lɔsɔ layonga l’ɔtɛ wa dui wɔsami oma lo Osambu 118:8, 9 wata ɔnɛ: ‘Toyange eshamelo le Jehowa.’ Asawo amɔtshi wayoshama lo losanganya lɔsɔ vɔanɛ: “Ngande wele Jehowa longele la so lo tena dia pâ?,” “Tokimanyiya anto akina dia ntana eshamelo l’ahafu wa Jehowa,” “Tokoya Jehowa lo monga eshamelo le anto akina,” “Ɛlɔngɔlɔngɔ l’esekaseka le, nyoyaɛkɛke le Jehowa!” ndo “Paradiso kaso ka lo nyuma kekɔ dihole di’eshamelo diakatosha Jehowa.”
3. Ahombaso nsala dia sho ndeka nkondja wahɔ oma lo losanganya loyotɔtɔ?
3 Woho wakokaso nkondja wahɔ: Etena kayowotewoya datɛ dia losanganya lɔsɔ, katoyakongɛ dia ndjɔtɔ lɔkɔ ndo katele ambeki aso wa Bible dia vɔ ndjosangana kâmɛ la so. Dia sho ‘ntɔ elowa la ekikelo,’ sho pombaka nkimɛ kɛnɛ kokaso. (Luka 8:15) Ɔnkɔnɛ, katohokamɛke asawo wa lo losanganya lɔsɔ la yambalo tshɛ, ndo katɔsake nɔtɛ ya tomondo y’awui w’ohomba ndo y’alako wayotokamba la wɔ lo lɔsɛnɔ laso ndo l’olimu aso w’esambishelo. L’ɔkɔngɔ wa losanganya, kanyoyatshungwe etena ka kɛtshanya lo nkumbo awui wakatɛkɛtami lo losanganya lakɔ, ndo toho ta shikaa takokanyu oko nkumbo nkamba olimu l’awui w’oma lo losanganya lakɔ.
4. Lande na kahombaso kongɛ Losanganya la lânde l’asolo walomɔlomɔ?
4 L’ɛnyɛlɔ ka mbo ya ndɛ ya diɛndjɛ ndo yasha vitaminɛ lo demba, Losanganya la lânde l’ɔnɔnyi ɔnɛ lakalɔngɔswama la ngandji tshɛ ndo la yambalo y’efula. Jehowa atshɔkɔlɛ welo wayonyodja dia mbɔtɔ lo losanganya lɔsɔ ndo dia nyu nkondja wahɔ oma lo ‘mbo ya ndɛ yayonyolongola lo etena kahombama’ dia nkeketsha mbetawɔ k’ekambi waki Nzambi.—Mat. 24:45.