Tolamake nkum’otema kaso
1. Naa ɔtɛ wa dui wa Losanganya la lânde la lushi ɔtɔi la l’ɔnɔnyi w’olimu wa 2013?
1 Lushi tshɛ sho tanemaka la ntondo k’akambo wakoka tokonya lo nsala kɛnɛ katoshimba nkum’otema kaso. Diakɔ diele, Losanganya la lânde la lushi ɔtɔi la l’ɔnɔnyi w’olimu wa 2013 wayotatɛ lo Ngɔndɔ ka Divwa 1, 2012, lekɔ l’ɔtɛ a dui wata ɔnɛ: “Tolamake nkum’otema kaso.” (1 Tim. 1:19) Losanganya lɔnɛ lambɔlɔngɔsɔma dia nkimanyiya ɔmɔmɔ la l’atei aso dia nde mbidja yimba lo woho wakambande la woshasha wa lânde w’oma le Otungi aso ɔsɔ.
2. Naa ambola w’ohomba wayokadimɔma lo losanganya lɔnɛ?
2 Akambo wayɔkɛtshanyema: Losanganya lɔnɛ layokadimola lo ambola esambele w’ohomba wayela anɛ:
• Kakɔna kakoka mbidja nkum’otema kaso lo wâle?
• Ngande wakokaso mbekiya nkum’otema kaso?
• Akokaso nsala diaha monga l’onongo wa dikila di’onto kânga ɔtɔi?
• Woho wakanaso yimba l’atɔndɔ wa lo Bible ndo wakambaso la wɔ kɛnɛmɔlaka na lo dikambo diaso?
• Ngande wakokaso mbewɔ dia mpomuya nkum’otema k’anto akina?
• Ɛlɔngɔlɔngɔ la esekaseka le, ngande wakokanyu nshika ekelo etena katshutshuyamanyu dia nsekola ɛlɛmbɛ waki Nzambi?
• Ɛtshɔkɔ akɔna wakondja wanɛ wetawɔ kɛnɛ kawatatɛ nkum’otema kawɔ kalɔmbwama la nyuma kaki Nzambi?
3. Ngande wakokaso nkondja wahɔ oma lo Losanganya la lânde la lushi ɔtɔi?
3 L’ekimayielo kaki Jehowa, sho kokaka nshika tanga la ntondo ka welo tshɛ wadja Satana dia ndanya nkum’otema kaso. L’ekimanyielo ka Ɔtɛkɛta wa Nzambi ndo k’okongamelo ande, Shɛso ka ngandji kele l’olongo totɛka ɔnɛ: ‘Mboka tɔ kɛnɛ, nyɔkɛndɛkɛndɛ lɔkɔ.’ (Iza. 30:21) Losanganya lɔnɛ lekɔ yoho mɔtshi yatosha Jehowa ɛlɔmbwelɔ kɛsɔ. Ɔnkɔnɛ, toyalɔngɔsɔlɛ dia sho mbɔtɔ lo tenyi tshɛ dia losanganya lɔsɔ. Katodje yambalo yaso tshɛ l’asawo wayoshama ndo katende woho wakokaso nkamba l’awui akɔ. Etena kenyu la ngelo, nyosawole lo nkumbo awui wakatɛkɛtami lo losanganya. Naka sho nkamba l’awui wayotetshama lo losanganya lɔnɛ, kete dui sɔ diayotokeketsha dia sho ntetemala “monga la nkum’otema k’ɔlɔlɔ” ndo diayotokimanyiya dia sho mbewɔ dia ɛngɛnɔngɛnɔ wa l’andja ɔnɛ waki Satana totakoya mboka.—1 Pet. 3:16.