Ɔtɛkɛta wa Nzambi wekɔ ohomba dia mbetsha

1. Naa ɔtɛ adui wa Losanganya la laande la lushi ɔtɔi layosalema lo ɔnɔnyi w’olimu wa 2014 ndo dimbola diakɔna diayokadimɔma lo losanganya lɔsɔ?

¹ Jehowa lele ‘Ombetsha aso a Woke’ ekɔ ombetsha woleki dimɛna l’andja w’otondo. (Is. 30:20, 21) Ko ngande watetsha Jehowa? Nde akatosha dibuku dioleki abuku akina tshɛ, mbuta ate Bible, Ɔtɛkɛta ande wakasambiyama. Ngande wakoka wetshelo waki Nzambi tokimanyiya lo demba, lo yimba, lo tokanyi ndo lo nyuma? Tayokondja okadimwelo wa dimbola sɔ lo Losanganya la laande la lushi ɔtɔi la lo ɔnɔnyi w’olimu wa 2014. Losanganya lɔsɔ layonga l’ɔtɛ a dui wata ɔnɛ: “Ɔtɛkɛta wa Nzambi wekɔ ohomba dia mbetsha.” Vɔ mbɔsama oma lo 2 Timɔte 3:16.

2. Awui woleki ohomba wa lo losanganya lɔsɔ wayɔtɔtɔmiyama lo ekadimwelo wa ambola akɔna?

² Oka sso l’awui woleki ohomba anɛ: Awui woleki ohomba wa lo losanganya lɔsɔ wayɔtɔtɔmiyama lo ekadimwelo wa ambola wayela anɛ:

• Shɛngiya yakɔna yele la wetshelo waki Nzambi lo nsɛnɔ yaso? (Is. 48:17, 18)

• Naka sho nangaka nsala etshikitanu dia kambɛ Jehowa olimu wa lo tena tshɛ, kakɔna kahombaso ndjashikikɛ? (Mal. 3:10)

• Kakɔna kahombaso nsala naka wolanga tetsha “wetshelo ekina”? (Hɛb. 13:9)

• Ngande wakokaso mbokoya ‘yoho ya mbetsha’ yaki Yeso? (Mat. 7:28, 29)

• Lande na kahomba wanɛ wetsha lo etshumanelo ndjaetsha vwamɛ? (Rɔmɔ 2:21)

• Lo woho akɔna wele Ɔtɛkɛta wa Nzambi ohomba? (2 Tim. 3:16)

• Woho ‘wasutshasutshama’ wedja ekɔ la shɛngiya yakɔna le anto? (Hang. 2:6, 7)

• Eshikikelo kakɔna kele la Jehowa le so? (Ɛf. 5:1)

• Lande na kahombaso nsala la wolo dia sho ntetemala mbetshama oma le Jehowa? (Luka 13:24)

3. Lande na kele ayonga dui dia lomba dia sho ndjɔtɔ ndo ndjoyela losanganya lambɔlɔngɔswama l’etena kahombama lɔsɔ la yambalo tshɛ?

³ Lo 2 Timɔte tshapita 3, mbuta ate la ntondo ka nde ndjofuda ɛtɛkɛta wɔsami ɔtɛ a dui wa losanganya la so, Pɔɔlɔ akatɛkɛta dia tena dia wolo diakahombe mɛnya dia taya lo nshi y’ekomelo. Nde akafunde ate: “Anto wa kɔlɔ ndo akanga wa lokeso wayoleka mpama lo kɔlɔ, wayokesana ndo wayokesama.” (2 Tim. 3: 13) Ɔnkɔnɛ, diaha sho minganyiyama, ekɔ ohomba sho mpokamɛ wetshelo waki Nzambi ndo nkamba la wɔ. Diakɔ diele, toyashikikɛ ndo tɔshi tɛdikɔ tahombama dia sho ndjɔtɔ ndo ndjoyela losanganya lambɔlɔngɔswama l’etena kahombama lɔsɔ la yambalo tshɛ.