Toke akɔfi aso la lomba
1. Ngande wendana 1 Koreto 9:26 l’olimu aso?
1 Ɔpɔstɔlɔ Paulo akafunde ate: “Dimi latusakaka luwangu aha la wengengo. Dimi latolokaka aha uku untu lakomola lopepe.” (1 Kor. 9:26) Paulo akatɛkɛtaka dia woho wakandayashikikɛ dia mbesa eyango wa lo nyuma. Koko ɛtɛkɛta ɛnɛ mendanaka ndo l’olimu w’esambishelo. Sho nangaka mboka ‘akɔfi’ aso la lomba, mbuta ate mbidja welo lo yoho yayotokimanyiya dia ndeka nkondja etombelo w’ɔlɔlɔ. Ngande wakokaso nsala dui sɔ?
2. Ngande wakokaso mbokoya Paulo la esambisha ekina wa lo ntambe ka ntondo etena kasɔnaso wonya ndo dihole dia tosambisha?
2 Totshu l’ahole watanema anto: Paulo ndo esambisha ekina wa lo ntambe ka ntondo wakasambishaka l’ahole wakawalongamɛka dia ntana anto. (Etsha 5:42; 16:13; 17:17) Ɔnkɔnɛ, naka anto efula wa l’ɛtshi kaso ka nkɛtɛ tanemaka lawakawɔ l’akɔlɔ, kete ɔsɔ mbeyaka monga etena koleki dimɛna ka nsambisha lo luudu la luudu. Onde anto tanemaka l’ahole wɔsawɔ mituka kana wemala kawolo lo ngelo kanyu la pindju k’efula ndo l’akɔlɔ wa yɔɔ etena katshɔwɔ otsha l’olimu kana kakalolawɔ lawakawɔ? Etena kakɔna katololanɛka anto l’ahole wasondjawɔ diangɔ? Lo tena dia ngasɔ, esambishelo ka lo toshinga mbeyaka monga l’etombelo w’amɛna efula.
3. Ngande wakokaso mboka akɔfi aso la lomba etena kasambishaso l’ɛtshi kaso ka nkɛtɛ?
3 Tosambisha l’ɛtshi kaso ka nkɛtɛ la lomba: Sho pombaka mbidja yimba dimɛna lo woho wadjaso welo aso la lomba dia sho mbeya nsambisha l’ɛtshi kaso ka nkɛtɛ. Ɛnyɛlɔ, lo dihole dia sho ntshɔ olui w’anto efula lo dihole diamɛ dialɔmba dia mbetsha wenya efula ndo mbidja welo efula dia nkongɛ olui dimɛna dia mbeya nsambisha, mbeyaka monga ohomba nkahanya anto lo tolui ta totshitshɛ. Woho akɔ wâmɛ mbele, etena kasambishaso lo bɛtshi dia nkɛtɛ dia tale tayoshidiya nkindjakindja ɛtshi ka nkɛtɛ esadi ndo tayonga la waaso efula wa ntɛkɛta naka sho ntshɔ anto yema tshitshɛ. Onde sho kokaka nkondja ɛtshi kaso ka nkɛtɛ kosukanyi la lɛnɛ adjasɛso kayotokimanyiya dia sho nkitshakitsha lofulo la wenya wahombaso nkɛndakɛnda?
4. Kakɔna kayotokimanyiya dia sho monga ‘amundji wa nse’ wa tomanamana?
4 Yeso akɛdika esambisha ‘l’amundji wa nse.’ (Mako 1:17) Omundji wa nse bu tsho l’oyango wa mbidja ɔtɛi l’ashi koko wa munda nse. Ɔnkɔnɛ, amundji wa nse wa tomanamana tshɔka l’ahole ndo lo wonya walongamɛwɔ dia ndjitana ko oma lâsɔ, vɔ ntatɛ nkamba la dihomɔ diawɔ dia munda nse aha la ntshimbatshimba. Vɔ mbidjaka welo awɔ la lomba tshɛ. Nyɛsɔ sho lawɔ tonge l’ohetoheto wa ngasɔ l’olimu aso.—Heb. 6:11.